2
Krista i tahm apanem nai hawi nang parai nai
1 Hunaibaly Krista y pachei naira hawi, tamen naira i sa hai naira hawi, Phailo hawi amkawm naira hawi, paleung verei y tamen naira hawi pahen naira awm baly,
2 nangchi ly dawn nai vanrei atlyh u nai, tamen naira vanrei awm u nai, leu adyh naimy paleung vanrei awm u iy kai i kawn nai angym hai u.
3 Apreaung nai hawi tahm apasang nai deaungkho y ati sai py so u y naimy, khumi leaung leaungrei ly tahm apanem parai naimy amy tleaung y khumi takhra ly hawi kyh, nanai palawn bawibawi sy;
4 leaung leaungrei ly amymy i khen khyh y naimy, leaung leaungrei ly khumi takhrachi i py khen u bawibawi sy.
5 Hini paleung ly Krista Isu py awm nai ly nangmychi py awm sy.
6 Mymy ly Tameuh kamta awm iy, Tameuh tanrei awm nai ly patlaw vui thai y nai palawn y i,
7 apakeu lawh iy, khumi kamta tapen i miseaung kamta amlawn bo.
8 Naibaly khumi kamta awm iy tahm apnem i, dei ai nai pa-rei leu tangai bo, ne, kraws kypkyp tleaung y dei ai nai.
9 Hunai deaungkho y Isu i amyn y ati cheaungkhang--kani mang i py, khaileaung mang i py, khaileaung anui mang i py--kheukhu di ai nai hawi,
10 Ampo Tameuh ai palo ai nai Isu Krista ly Areng ne, nanai palai cheaungkhang my amthang hai ai nai py,Ref 2.10–11: Is 45.23
11 Tameuh my ni ai ly khri pa-rei palo i, amyn bawibawi y amyn asang keh nai ly pei bo.
Khaileaung pri y kangvang kamta angvang nai
12 Hunaibaly kai i ngai parai naichi awi, nangchi ly leu patawm u jojo nai kamta, kai awm nai khala y so khyh y naimy vai kai by y nai sala y py sa u keh lawh iy, jei nai hawi kaso theu nai tarawi y nangmychi i paheng naira ai ly pacheang u;
13 Ati mana nai mo nabaly nangmychi ai mymy i kawn ai naira vui y ngai ai nai hawi sa ai nai, nangmychi ai sa hai nai keung ly Tameuh ne.
14 Padeng ai by y nai hawi, avo y naira abawi y nai py, vai i kangthau paleung akawi nai hawi taphra naichi theung y Tameuh i chanau cheh naira by y naichi lawn u thai ai nai,
15 jo sei naira hawi aei naira by y naimy ati cheaungkhang so u; hunichi theung y ly heng nai leu amteng hai nai, khaileaung pri y angvang hai nai keungchi kamta amteng u reng;Ref 2.15: Leu 32.5
16 hunaibaly jawm my kangpreang atyhtyh nai ny y nai hawi, jawm my kasa akawm atyhtyh nai py ny y nai deaungkho y, Krista i kani y ly amlyh ai naira kanga thai ai.
17 Ne, nangchi i ym naira apathyp naira y hawi atiti sa naira tleaung y ly kai ai lei vui nai awm teu iy py kakawn nai ne, nangchi bawibawi ai py kang kawn hai mang.
18 Hunai kamta nangchi py kawn u ly, kai ai py kawn hai u teang.
Timothei hawi Epaphrodita
19 Na i py nangchi i satang kapany iy, kaawm nem teang thai ai nai, kra y nai sala chy y Timothei ai ly nangchi teng y pato ai nai Areng Isu y athang kakhai.
20 Hinai kamta paleung apu nai nangchi i awm nai sai meitang khyp dawn pi ai nai keung ami ai py kango y.
21 Nichi bawibawi ly Isu Krista i vui hau y naimy amy i vui hau u lawh veng.
22 Na i py mymy i cham pajau chum veng nai awm nai sai ly nangchi pany, chanau my ampo i kalop sa nai kamta Satang Kahawi ahei hai naira y kai hawi sa ahawi reng nai bo.
23 Hunaibaly kaimy i vui mana awm ai mo, nanai kapany bo nabaly, mymy ai ly pato praw ai nai athang kakhai.
24 Na i py kaimy kypkyp py kra y nai sala chy y kang jeu ai nai Areng y ly kaym cheng cheng nai ne.
25 Na i py Epaphrodita, kai i amjo amnau, kai i kalop sa ahawi nai hawi, kai hawi tavaimi lawn ahawi nai hawi, nangchi i amtaw thau nai hawi, kai atiti avaw nai khala y kai ai sabawm nai keung ai ly nangchi teng y pato ai aeang nai kapany.
26 Mymy ly nangchi bawibawi ai khri pa-rei adawn na: mymy ly no, nanai nangchi ly pany u nai deaungkho y mymy ly khri pa-rei paleung mawn na teang.
27 Ne, mymy ly dei ai nai no ly ne khyp; na i py Tameuh ly mymy ai pahen; na i py mymy ai khyh ny y leang, kai ly paleung mawn nai tleaung y mawn ra naira by y ai nai kai ai py ang pahen rau nai ne teang.
28 Hunaibaly nangchi ly mymy ai niu u ali nai khala y ly kawn u thai ai nai hawi, kai i paleung mawn naira rym kyh thai ai nai py mymy ai ly kang pato praw nai ne.
29 Hunaibaly nangchi ly mymy ai amo theu parai naimy kawn u ly, hinai kamta khumi ai ly tahm pasang u;
30 ati mana nai mo nabaly nangchi i kai ai sabawm nai kamchawn patawm u bi ai nai, dei ai dawn y naimy sa iy, Krista i kalop sa nai deaungkho y dei vi nai awm veng bo.