PETERA
I CHA PA NAI NYHREI
1
1 Simon Petera, Isu Krista i miseaung hawi amtaw thau nai my ly achi i Tameuh hawi achi ai Paheng Keung Isu Krista i hawi naira deaungkho y kaichi hawi vanrei ym naira vang teng parai nai nga teang naichi teng y ly:
2 Tameuh hawi Isu achi i Areng ai pany naira y ly nangchi teng y pahenra hawi awmnem naira py peung hai dudu sy.
Tameuh my vawi nai
3 Mymy i nang parai naira hawi, hawi naira saho y ang palau nai keung, mymy i satang pany nai deaungkho y mymy i Tameuh i atiti sa thai naira my heng naira hawi Tameuh ai dawn ryhryh nai lam y ly atiti bawibawi ang pei bo.
4 Huni i saho y mymy i leu adeu naichi vang teng parai nai hawi, khri pa-rei ji parai nai ang pei nai ne; hunaibaly ngai phi teng y nairachi deaungkho y khaileaung pri y phra naira awm nai ai ly angpreng veng chum iy, huni adeu nairachi deaungkho y nangchi ly Tameuh i awm nai sai phy nga pajau ai.
5 Ne, huni deaungkho y khypkhyp nangchi ly ajeng u ryry iy, nangchi i ym naira y ly hawi naira abawi u ly, naibaly hawi naira y ly pany naira abawi u ly,
6 naibaly pany naira y ly amkym naira abawi u ly, naibaly amkym naira y ly kham pajau naira abawi u ly, naibaly kham pajau naira y ly Tameuh ai dawn ryhryh naira abawi u ly,
7 naibaly Tameuh ai dawn ryhryh naira y ly amjo amnauchi ai aniu ngai naira abawi u ly, naibaly amjo amnauchi ai aniu ngai naira y ly tamen naira abawi u.
8 Hunichi ly nangchi i ne iy peung dudu lawh baly, achi i Areng Isu Krista ai pany naira ly nangchi ai atho si y nai hawi, athai y nai ny y nai py ang sa hai reng nai ne.
9 Ami py huni atitichi by y nai khumi ly mei kamju ne i, kasa deih chy naira y harei niu khyh, jangni i kamngochi pachai pi nai ly tami veng lawh.
10 Hunai deeaungkho y amjo amnauchi awi, ang palau nai hawi ang vawi takhra nai ly khaw hai ai nai atho angjeng nai tleaung y angjeng ra nai pathau u; nangchi ly huni atitichi sa baly mana khala y py atlym u y ai:
11 hunaibaly achi i Areng hawi Paheng Keung Isu Krista i deungtasarei peang naira y kun ai nai khri pa-rei ang nga hai ai.
12 Hunai deaungkho y nangchi ly huni atitichi ai ly pany iy, nangchi teng y awm nai leu meitang naira y khaw u iy py, huni atitichi ai ly kang pany hai ai nai kangvei rym jojo ai.
13 Naibaly hini taichy y kaawm nai sala ryrei ly nangchi ai adawn hai vau iy amcheng hai ai nai avo, nanai dawn kai ly;
14 ati mana nai mo nabaly achi i Areng Isu Krista my kai ai ang pany hai nai kamta ly kai i taichy khai vui ai nai neng ly tym praw ai, nanai kapany bo.
15 Ne, kai theu nai bo y nangchi ly huni atitichi ai mana khala y py adawn vau jojo thai ai nai atho kapathau ai.
Krista i phum nang parai nai ai niu nai keungchi
16 Kaichi ly achi i Areng Isu Krista i atiti sa thai nai sai hawi mymy i ang jeu bi ai nai leuchih patawm nai ny y leang; kaichi ly mymy i nang parai nai sai niu nai keungchi ne chy bo.
17 Naibaly khri pa-rei nang parai naira i dengdairei mymy teng y raawi tym i, “Hini ly kai i Chapo ngai parai nai ne: kai ly mymy i tlang tleaung y khri khti pa-rei kakawn parai,” nanai thym khala y ly, ni ly Ampo Tameuh teng i dengdairei tahm pasang naira hawi nang parai naira nga bo.Ref 1.17–18: Mt 17.1–5; Mk 9.2–7; Lk 9.28–35
18 Naibaly kaichi ly mawi kachai y mymy teng y awm nai thym khala y ly huni raawi kani mang i dengdairei kathiu nai ly kaimychi my thai bo.
19 Naibaly kaichi ly thui rym nai leu khaw nai tleaung y khaw ra nai nga nai bo; khutawi iy khawn tempo ly nangchi i paleung y si y ryrei ly kaveng meingtym y angvang nai maisi ai dawn pi u nai kamta, huni ai dawn pi u ai nai aly len parai:
20 Tameuh i cha-iu y thui rym nai leu ly amymy thui pi pachai ai nai ny y, nanai pany u man ba.
21 Thui rym nai leu ha py khumi i kangai y theu vai y leang: huni ny y naimy Phailo Kachai my khumichi ai dawn hai iy Tameuh teng i dengdairei thui nai ne.