5
Tameuh i Beram kanghu
1 Hunaibaly kai, miteaung keh ne teang nai hawi, Krista i patang naira niu nai hawi, amteng ai nai nang parai naira phy nga nai khumi ly nangchi theung y miteaung kehchi ai kang pachei:
2 Nangchi theung y awm nai Tameuh i beram kanghu ai ly kry u: sa ai nai tla nai deaungkho y ny y naimy Tameuh i ngai nai kamta ngai parai nai tarawi y kry u; chai y nai kamran nga ai nai ngai nai deaungkho y ny y naimy, paleung ngai parai naimy kry u;Ref 5.2: Jh 21.15–17
3 nangchi teng y au naichi i tlang tleaung y atho sa nai kamta ny y naimy, beram kanghu i vui y amtiu naira apalawn u.
4 Naibaly Beram Typ nai Keung kalen keh my ly amteng nai khala y ly nangchi ly rawm thai y nai nang parai nai areng lukhym nga u ai.
5 Hunai kamta ly nangchi cheangthli nangchi awi, miteaung kehchi teng y aau u. Ne, nangchi bawibawi ly asabawm u leungtang ai nai leu anui naira amthyp u; Tameuh my am-e naichi ai ly paka iy, tahm apanem naichi ai ly pahenra nga hai lawh reng.Ref 5.5: Lkch 3.34
6 Hunai deaungkho y neng khyp nai khala y ly nangchi ai tahm ang pasang thai ai nai, Tameuh i ham parai nai kiu anui y apanem u ly;Ref 5.6: Mt 23.12; Lk 14.11, 18.14
7 mymy ly nangchi ai dawn hai reng nai deaungkho y nangchi i paleung bi naira bawibawi ly mymy tleaung y amtei u bebe.
8 Amkym u ly, atyp u; nangchi i paleung ka-e diabola ly pa-u reng nai khrangsi takai kamta ly ang cha thai ai naira hau nai ami kalaka na veng;
9 khaileaung pri y awm nai ngamjo ngamnauchi i tlang tleaung y hunai kamta patang naira ly tym reng nai ne, nanai pany u iy, khaw parai pa-rei ym iy ni ai tiu u.
10 Naibaly pahenra bawibawi i sangum Tameuh, mymy i deungtasarei nang parai naira nga ai nai Krista y ang palau nai keung kypkyp my ly, nangchi kra y nai sala chy patang nai bo y nangchi ai angym py angym hai ai, khaw py khaw hai ai, ham py ham hai ai mang.
11 Mymy teng y ly peang naira ly deungtasarei awm sy. Amen.
Kangkhym i kawn nai leuchi
12 Achi i amjo amnau ka-ym awm parai nai, athang kakhai nai Silvana i kiu y ly nangchi ai pachei ai nai hawi, huni ly Tameuh i pahenra tatang ne, nanai pany hai ai nai py nangchi teng y cha kadawi pe chy katajiu nai ne: hunira y ly kahawi angdo u.Ref 5.12: Ataw 15.22, 40
13 Nangmychi kamta vawi nai Babulon avang y awm nai neampachy hawi, kai i chapo Marka py kawn nai leu thui pi. Tamen nai pachawm naira akawn u.Ref 5.13: Ataw 12.12, 25, 13.13, 15.37–39; Kol 4.10; Phlm 24
14 Nangchi theung y Krista y awm nai ngiereichi teng y awmnem naira awm sy.