3
Ajuchi hawi juvochi
1 Hunai kamta ly nangchi ajuchi awi, amy i juvochi i ngaingai awm u; hunaibaly nichi theung y ami py leu tangai y teu i py, nangchi i tahm khai nai sai hawi amhi amtlau nai sa kahawi py khen nai,Ref 3.1: Eph 5.22; Kol 3.18
2 leu ny y naimy mymychi i ajuchi i amhi amtlau nai sai y nichi ai nga thai ai.
3 Nangchi i akatheng akathi nai ly angam mang y akatheng akathi nai, sam khui nai hawi, muku pahu awi nai hawi, ateaung kahawi amthyp nai ny y naimy,Ref 3.3: 1 Tim 2.9
4 paleung y heu nai awm nai sai ly leu anui hawi neaung hawi nai paleung, mawn pajau y nai ateaung phai amthyp u; huni ly Tameuh i mei ka-niu y khri pa-rei vang teng nai ne.
5 Hunai kamta teang jangni i neampachy kahawi, Tameuh ai athang khai naichi ly amy i juvochi i ngaingai awm nai amthyp lawh veng;
6 Sarai i Abraham ai “Areng” napi nai mymy i leu tangai nai kamta:nangchi ly atiti kahawi sa iy, jei y naimy kaso theu y nai awm baly mymy i chanauchi lawn u bo.Ref 3.6: AA 18.12
7 Nangchi juvochi awi, hunai kamta teang neampachy ly laawm kawi rai y nai deaungkho y hawi, pahen nai heng naira nga ahawi nai keung ne nai deaungkho y py, nangni i chiu sa ai naira y paka y ai nai, tahm khai nai tarawi y hawihai palai dawn naimy ajuchi teng y awm u.Ref 3.7: Eph 5.25; Kol 3.19
Hawi naira sa nai molam y patang naira avum nai
8 Kangkhym kangtem y ly nangchi bawibawi paleung vanrei awm u ly, pahen nai paleung awm u, amjo amnauchi kamta atamen u, neaung kahawi awm u, leu anui naimy awm u ly:
9 hawi y sa nai ly hawi y sa nai vawitheung tha u moh ly, jo sei nai py jo sei nai vawitheung tha u moh; hunai kamta ny y naimy amtheaung hai:ati mana nai mo nabaly nangchi ai ly amtheaung naira amtym ai nai ang palau veng bo.
10 “Heng naira ai ngai parai nai hawi, Kani kahawi avum ai nai ngai nai khumi lyRef 3.10–12: Sam 34.12–16
Kamngo ra y amy i palai atyp sy ly,
Amy i labeaung py tapawp nai leu
thui y ai nai atyp sy;
11 Kamngo ai hi veng iy atiti kahawi so sy;
Aly naira hau iy hui veangveang sy.
12 Areng i mei ly khumi kahawi ai khen pathyp reng, Mymy i kano py nichi i chiu sa nai mang y patheung reng:
Na i py Areng i meimai ly atiti hawi y sa nai keungchi i tlang tleaung y awm lawh reng,” nanai ne.
13 Nangchi ly atiti kahawi mang y dawn pathyp baly, nangchi i tlang tleaung y hawi y sa nai keung ly ami awm ai mo?
14 Na i py nangchi ly hawi naira deaungkho y patang u baly, nangchi ly taham hawi; naibaly nichi i pajei naira ai ly jei u moh ly, paleung py bi u moh:Ref 3.14–15: Mt 5.10; Is 8.12–13
15 na i py nangchi i paleung theung y Krista ai ly Areng y palawn u pathyp. Nangmychi i paleung theung y awm nai athang khai naira satang molam y ami py deng nai ngierei teng y pathang ai nai angvei u rym jojo; ne mang ly leu anui nai hawi, tahm khai nai tarawi y pathang:
16 hawi nai hawi y nai pany naira chai parai nai awm u ly, hunaibaly nichi i ang thui tamawn naira y ly nangchi i Krista y amhi amtlau nai sai kahawi ai thui tamawn nai keungchi ai ly amthang hai leaung ai.
17 Atiti hawi y nai sa nai deaungkho y ny y naimy, Tameuh i kangai my avo hai baly atiti kahawi sa nai deaungkho y patang ai nai hawi alam veng.
18 Ati mana nai mo nabaly Krista ly achi ai Tameuh teng y ang pahawi thai ai nai kamngo nairachi deaungkho y tlenrei patang, khumi kahawi ly hawi y naichi i vui y; tlang mang y padei nai awm i, phailo mang y paheng nai bo;
19 huni y ly mymy ly theaung y awm nai phailochi teng y satang aeu hai:
20 nichi ly jangni y Nova heng nai khala y paleaung sa nai sala ryrei ly Tameuh i kham pajau naira my ajeng nai thym y ly leu tangai u y naichi ne: huni paleaung y ly khumi maiden chy, leaung tajareichi ai ly tui i saho y lawi hai bo;Ref 3.20: AA 6.1—7.24
21 huni atawm hai nai baptisma ly Isu Krista i angthau bi nai deaungkho y vai ly nangchi ai paheng nai ne: huni ly tlang i anyng pachai nai ny y naimy, hawi nai hawi y nai pany naira kachai nga ai nai, Tameuh i mo y ahui nai ne lawh veng;
22 Isu Krista ly kani pri mang y lyn kalau iy Tameuh i lamtang mang y awm bo; kani pri i amtaw thau naichi hawi, aly peang nairachi hawi, atiti sa thai nairachi py mymy i ngaingai y awm hai bo.