2
Lengseaung kangheng hawi khumi kachaichi
1 Hunaibaly kamngo bawibawi hawi, tapawp paryp naira hawi, tapawp naira hawi, paleung no naira hawi, thui tamawn naira bawibawichi anawn u veng iy,
2 deaungdi chymblei nai kamta ly phailo mang i kanu hang, tapawp paryp naira ati sai py tabawi y nai ly khri pa-rei ngai u, hunira y ly hengra ka-lawn pa-rei veang u thai ai nai;
3 Areng ly khri pa-rei tamen parai nai ne, nanai pateng u chum bo nabaly.Ref 2.3: Sam 34.8
4 Mymy ly lengseaung kangheng, khumichi i ngai y nai khypkhyp ne i py, Tameuh i dawn naira y vawi takhra nai hawi vang teng parai nai ne:
5 mymy teng y jeu iy, nangchi ai py lengseaung kanghengchi kamta ly phailo mang i yhm sa naira y ang tabawi ai nai, Isu Krista i saho y Tameuh i ka-kawn phailo mang i apathyp naira ly talam iy, pathyp pi nai keung kachaichi lawn thai ai nai.
6 Ati mana nai mo nabaly Tameuh i cha-iu leu y ly,Ref 2.6: Is 28.16
“Khen cham, Zion y ly taki i lengseaung aly len keh nai,
Vawi takhra nai hawi vang teng parai nai kakhai nai ne;
Ami py mymy ai ym nai ngierei ly amthang leaung y ai,” nanai tajiu nai ne.
7 Hunaibaly nangchi ym naichi i vui ly mymy ly vang teng parai nai ne; ym y naichi i vui naini,Ref 2.7: Sam 118.22
“Yhm sa nai keungchi i lengseaung ngai y nai ly, Huni kypkyp ai ly taki i lengseaung avo keh nai palawn bo,” nanai hawi,
8 “Atlym naira lengseaung hawi paka
naira lengseaung pui py lawn ai,”
nanai ne.Ref 2.8: Is 8.14–15
Ati mana nai mo nabaly nichi ly leu
tangai y nai deaungkho y atlym u lawh reng;
huna nai kamta awm ai nai nichi ai khai yb nai ne.
9 Na i py kaveng theung i nai mymy i kangvang rengrang tlai naira y kun ai nai nangchi ai ang palau nai keung i hawi parai nai sai nangchi ly amteng hai thai ai nai, nangchi ai ly cheng vawi takhra nai, pathyp pi nai keung tahm asang parai nai, theaung kachai, Tameuh i khumichi kypkyp ne;Ref 2.9: Theu 19.5–6; Is 43.20, 21; Leu 4.20, 7.6, 14.2; Tit 2.14; Is 9.2
10 nangchi ly jangni y mymy i khumichi ny y leang, vai ly Tameuh i khumichi lawn u bo; nangchi ly jangni y pahen naira ngo y leang, vai ly pahen naira nga u bo.Ref 2.10: Hos 2.23
Tameuh i miseaungchi
11 Ngai parai naichi awi, nangchi ly khuleaung chei naichi hawi angvynchi ne nai deaungkho y, phailo ai tiu reng nai tlang i ngai phi teng y nairachi ai ly anawn veng ai nai kang takeng;
12 Cheng Takhrachi theung y nangchi i amhi amtlau nai sai ly apu parai nai ne sy, hunaibaly nangchi ai kamngo sa nai keungchi kamta ang thui tamawn naira y ly nangchi i atiti kahawi sa naichi niu nai deaungkho y, de nai kani y ly Tameuh ai ang palo thai ai.
13 Areng my deaungkho y khumi i leu khai rym nai bawibawi teng y ly, samrang teng y mo (ni ly len keh nai ne),
14 kamngo sa nai keungchi i tlang tleaung y vawitheung tha ai nai hawi, atiti kahawi sa nai keungchi ai palo ai nai py mymy i pato nai peang nai keungchi teng y mo aau u.
15 Naibaly ly atiti kahawi sa naira y ly khumi cheng y naichi i pany y nai leu thui nai anawn hai thai ai nai Tameuh i kangai ne khyp.
16 Nangchi ly alaw nai ne, na i py nangchi i alaw nai ly kamngo ai khiu naira y teaung y naimy, Tameuh i miseaung y awm nai kamta teaung u.
17 Khumi bawibawichi ai tahm khai u. Amjo amnauchi ai ly tamen u. Tameuh ai ly tahm khai u. Samrang ai ly palo u.
Krista i patang nai ai amtiu nai
18 Miseaungchi awi, jei kaji naimy nangchi i yhmkeungchi i ngaingai awm u; khumi kahawi hawi khumi neaung kahawichi teng y harei khyh ny y naimy, khumi paleung kamtheangchi teng y py ne sy.
19 Ami my Tameuh ai dawn nai deaungkho y patang ai nai avo y naira y paleung mawn nai patang tanga baly, huni ly kawn ai nai awm lawh veng.
20 Nangchi ly kamngo sa iy ang tabeang nai khala kham tanga baly ati palo naira awm mo? Na i py nangchi ly kahawi sa nai patang iy kham tanga baly Tameuh i ka-kawn ne.
21 Ati mana nai mo nabaly nangchi ai ly hinai kamta sa ai nai ang palau nai ne; Krista ly ang patang pi iy mymy i lawi y abang u ai nai khen pata naira ang daw pi nai chy bo.
22 Mymy ly kamngo pipi so y leang, mymy i labeaung y py tapawp paryp naira ha py by y;Ref 2.22: Is 53.9
23 ami my mymy ai jo nai thym khala y py mymy ly jo teang y: mymy ly patang nai thym khala y ram y i, hawi parai naimy chih reng nai keung teng y aau lawh:Ref 2.23: Is 53.7
24 achi ly kamngo lam mang y dei veng iy hawi naira lam mang y heng thai ai nai mymy kypkyp ly achi i kamngochi ai dengkeaung tleaung y mymy i tlang y ang pho pi bo; nangchi ai ly mymy i pakhau nai satlang y hawi ang sa pi bo.Ref 2.24: Is 53.5
25 Nangchi ly beram kamta lam tamang nai ne i, vai ly nangchi i phailo ai ang typ nai hawi peang nai keung teng y vawi ali u teang veng bo he.Ref 2.25: Is 53.6