21
Kanan chengchi ai tiu pajau nai
1 Ref 21:2 Kati 33:40 Kanan pri tokalawi mang i, Arad mary y peang nai samrang ly Atharim lam mang Israela chengchi tako u dudu nai pany baly, nichi ai tavai tiu i phyrei ai patiu iy langheng y hawi vui bo.
2 Naibaly Israela chengchi my Areng teng y, “Nang ly kaichi ai hini khumichi ai tiu nai pajau hai baly, nichi hawi nichi i marychi ai nang teng y au be nai katalamra palawn iy, taphra chauchau ai mang,” nanai vaineng abeu u nai ne.
3 Areng ly nichi i hnei nai kamta Kanan chengchi ai tiu nai pajau hai. Hunai deaungkho y Israela chengchi ly huni khumichi i marychi taphra pi pawn iy, huni meingtym ai Hormah nanai amyn pathi bo. note 21:3\xk Hormah: Hebrai leu y “taphra naira” nanai sai ne.\x*
Kheupaja pavui myn
4 Naibaly Israela chengchi ly Hora mawi i nai theu u iy Edom pri en vui ai nai pangli kamsen katheaung lam mang tako u bo. Na i py nichi ly lam sala y paleung phra atho di u i,Ref 21:4 Leu 2:1
5 Tameuh hawi Mosi nini ai josei u; nichi my, “Teicha teinei by y nai hini daichi ka-vym theung y dei hai ai nai, ati mana nai y kaichi ai Aikupta pri i dengdairei pahawi nai mo? Hini meingtym y teicha teinei py tui py by y pui be? Kalum kathau by y nai hini teicha teineichi py kaichi paleih na bo” nanai josei u.
6 Naibaly Areng my Israela chengchi awm naira y pavui kangsochi pato i, khumi mipuichi ly pavui my patiu nai y dei u bo.Ref 21:6 1Kor 10:9
7 Hunaibaly khumi mipuichi ly Mosi teng y chei u i, “Kaichi ly Areng hawi nang ai py ka-awi sa iy katamang u bo. Hini pavuichi la pi pawn ai nai Areng teng y chiu so pi kyh,” nanai takeng u. Naibaly Mosi my nichi i vui Areng teng y chiu sa pi.
8 Naibaly Areng my Mosi teng y, tamo ngan hawi pavui myn sa iy teang tleaung y dang ai nai leu pei. Pavui my patiu nai khumichi ly huni pavui myn ai khen baly dei y naimy tleaung u ai, nanai thui hai bo.
9 Naibaly Mosi ly kheupaja pavui myn sa iy teang tleaung y dang i, pavui my patiu nai ngierei ly kheupaja pavui myn ai khen baly dei y nai ne.Ref 21:9 2 Areng 18:4, Johan 3:14
Hora mawi i dengdairei Moba chengchi awm nai leaunghawi mang y chei u nai
10 Israela chengchi ly khuleaung amsa u bi i, Oboth meingtym y tai u.
11 Nichi ly hu i dengdairei khuleaung amsa u bi i, Moba pri nisi mang y awm nai daichi ka-vym theung i Abarim mary kaphrara y tai u bo.
12 Huni bo y nichi ly Zered tavo jawn y tai u bi nai ne.
13 Nichi ly hu i nai khuleaung amsa u taleang bi i, Arnon tavo tosyh mang i Amori pri daichi ka-vym hawi amtawn prei nai daichi ka-vym theung y tai u. (Arnon tavo ly Moba pri hawi Amori prichi i khujyh ne.)
14 Naibaly Areng i tavai tiu nai cha-iu theung y tajiu nai ly “Supha khu theung y sa nai Vaheb mary hawi leaunghawichi, Arnon tavo hawi,
15 Moba pri khujyh Ara mary khrairei leaunghawi kamthauchi,” nanai abawi nai ne.
16 Israela chengchi ly hu i dengdairei tuikan, napi nai Bera tai naira y tym u. Huni meingtym y Areng my Mosi teng y, “Khumi mipuichi ai kachu iy jeu hai ly kaimy nichi ai tui kapei ai,” napi.
17 Naibaly Israela chengchi i phawi nai khulym ly:
“Tuikanchi awi, tui theu hai;
kaichi ly khulym thui naimy lamchung ai.
18 Samrang i chapochi hawi,
mipuichi ai lu sa naichi my tai nai tuikan,
samrangchi i jahaw tivi,
cheaungvawi hawi tai nai tuikan teu,” nanai ne.
Nichi ly huni daichi ka-vym theung i dengdairei Mattana tai naira mang py,
19 hu i bi baly Nahaliela tai naira dengdairei Bamoth tai naira mang py,
20 Bamoth tai naira dengdairei daichi ka-vym mang amtawi nai Piska mawi kheutangra i Moba leaunghawi mang py khuleaung amsa u nai ne.
Sihon samrang hawi Oka samrangchi ai eaung nai
(Leu 2:26-3:11)
21 Israela chengchi ly Amori samrang Sihon teng savaichi pato iy,
22 “Kaichi ly samrang nang i pri mang tako prei ai nai pei kyh. Kaichi hawi kaichi i tawnbawichi ly lam manglai kataw tako ai nai teu. Samrang nang i li hlauchi hawi kreip akhochi mang tako hai y leang. Nang i tuikanchira i tui py nei pi y leang. Kaichi ly nang i khu ka-peang kan nai ryrei lam manglai kataw naini katako u ai,” nanai takeng u nai ne.
23 Na i py samrang Sihon ly Israela chengchi ai mymy i pri theung mang tako prei ai nai pei pi y. Ni ly daichi ka-vymra i Jahaz mary mang y tavai amsa iy Israela chengchi ai tavai tiu bo.
24 Na i py Israela chengchi ly paleung ka-e neangneangchi ai tavai keung y padei iy, Arnon tavo tosyh mang Ammon pri khujyh Jabbok mary y khrairei, samrang Sihon i khu ka-peangchi pajau vui bo. Ammon pri khujyh ryrei naini tiu pajau khyh nai ly huni khujyh ai khaw pa-rei amtang pajau nai deaungkho y ne.
25 Huna nai kamta Israela chengchi ly Hesabon mary hawi tengpang i marychi raurei, Amori chengchi i mary bawibawichi ai pajau vui iy, huni marychira y awm u bo.
26 Hesabon mary ly samrang Sihon i mary pui ne. Samrang Sihon i khu ka-peang ly Arnon tavo khrairei kau nai, vaichi khala Moba pri samrang i khu ka-peang ne. Huni khu ka-peang ai tiu i, pajau vui bo.
27 Hunai deaungkho y khulym phawi kawp naichi my,
“Samrang Sihon i Hesabon mary pui y jeu u!
Achi ly huni mary pui ai kangtha palum teang sina.
28 Vaichi khala samrang Sihon i tavai kamkawm ly
Hesabon mary i dengdairei theu nai mai kadeu kamta tavai thau nai,
Moba pri Ara mary ai taphra vui iy,
Arnon Tavo leng mang i mawichi kang hai bo.Ref 21:28-29 Jer 48:45-46
29 Moba pri i khumichi awi, nangchi ly khri pa-rei ngari kamtang avum u na bo ly!
Khemosa tameuh ai chiu nai khumichi py phra u be bo!
Nangchi i tameuhchi ly nangmychi i chengchi ai tavai kapreangchi lawm hai iy,
neampachychi ai Amori samrang i langhengchi lawm hai bo.
30 Hunai deaungkho y nichi i kangpreangchi ly
Hesabon mary i dengdairei Dibon mary tym pa-rei py,
Nashim mary i dengdairei Medeba mary sahawi i Nopha mary tym pa-rei py taphra chauchau bo,” nanai khulym thui u.
31 Hunai deaungkho y Israela chengchi ly Amori pri y khuteng sa u nai ne.
32 Mosi ly Jaze mary ai tiu y rai khala khumi pato iy, tiu ai nai sai khen paviu hai bo; Israela chengchi ly huni mary hawi vanrei tengpang sahawi i marychi ai tiu pajau nai deaungkho y, Amori chengchi ly huni mary i dengdairei preang u pawn bo.
33 Naibaly Israela chengchi ly Basan pri mang y amsa u; huna nai khala Basan samrang Oka ly tavai amsa iy Israela chengchi ai Edrei meingtym y tavai tiu u bo.
34 Areng my Mosi teng y, “Ni ai jei u moh; ni hawi ni i khumi bawibawichi ai py, ni i pri ai py nang i kiu y kang au ai; nang ly Hesabon mary y peang nai Amori samrang Sihon ai sa nai kamta, ni ai py so teang,” napi.
35 Huna nai deaungkho y Israela chengchi my samrang Oka hawi ni i chapochi raurei mipuichi ai py, leaungrei py tleaung y pa-rei tleh chum baly, pri py peang vui nai ne.