19
Si nu kamleng i maidym
1 Areng my Mosi hawi Aron nini teng y,
2 Israela chengchi i vui hina nai reita leuchi pei pi bo. Nichi ly no-na by y iy kalop so hai vai y nai si nu kamleng harei, Mosi nini Aron teng y jeu hai iy,
3 nini ly pathyp pi nai keung Eleaza teng y pei pi ai nai tla. Huni si nu ai tai angam mang y pahawi iy, pathyp pi nai keung i mo y tleh ai nai tla.
4 Naibaly Eleaza ly kiu pajeung thi y tapo iy Tabynako mang y tlen saryhrei katheng ai nai tla.
5 Huni si i peih, nganbawi, thi, tivichi hawi ngan bom verei, pathyp pi nai keung i mo y leng patlum ai nai tla.
6 Naibaly ni ly saitleang ngam, hussop kateang hawi kalang kamlengchi la iy, mai theung y thun ai nai tla.
7 Huni bo y ni ly my i ateaungchi pasiu iy tui ahiu pan chum baly, tai naira theung y kun pajau bo; na i py ni ly reita leaungsai y dym mang khrairei chai y ai.
8 Si nu ai bomverei leng patlum nai keung py my i ateaungchi pasiu iy, tui ahiu pan ai nai tla; na i py ni ly dym mang khrairei chai y ai.
9 Naibaly reita y chai nai khumi leaungrei my si nu i maidym la iy, tai naira angam mang i reita leaungsai y chai nai meingtym y khai ai nai tla. Israela chengchi ly reita y chai y nai i vui chai ai nai tui hawi kachai sa naira y huni maidym teaung ai nai tla. Hini reita ly kamngo chai hai ai nai sa nai reita ne.Ref 19:9 Heb 9:13
10 Si nu i maidym leu nai khumi ly my i ateaungchi pasiu pan vui ai nai tla; na i py ni ly dym mang khrairei chai y ai. Israela chengchi hawi vanrei awm nai cheng takhrachi ly hini reita teaung patawm jojo ai nai tla.
Khumi tlaiveu ai nam nai
11 Khumi tlaiveu ai nam nai khumi ly reita leaungsai y kani saryhrei chai y ai.
12 Nichi ly pa-thom kani hawi saryh kani khala, tui hawi kachai sa ai nai amymy ai apachai ai nai tla. Naibaly ni ly chai ai mang. Na i py ni ly pa-thom kani hawi saryh kani y apachai y baly, ni ly chai ai ny y.
13 Tlaiveu ai nam nai khumi ly reita y kachai sa nai tui amymy ai katheng iy, apachai y baly chai y nai awm jo ai. Huni khumi ly Areng i Tabynako ai chai hai y nai deaungkho y, ni ai ly Tameuh i khumichi theung i nai nyn va vui ai.
14 Tai theung y khumi leaungrei dei su lawh baly, huni thym khala tai theung y awm nai khumi hawi, tai theung y kun nai khumi ly reita leaungsai y kani saryhrei chai y ai.
15 Tai theung i khym by y nai laawm sorachi py chai y ai.
16 Mary angam mang y pakhau ka iy dei nai, ti y baly dei kari y dei nai khumi i tlaiveu, hiu, tapreaung ai nam nai khumi ly kani saryhrei chai y ai.
17 Huna nai kamta chai y nai khumichi ai kachai sa ai na baly kamngo pahen nai leng patlum nai si nu kamleng i maidym laawmra tui kachai kanuh iy khai ai nai tla.
18 Yhm y khumi dei nai deaungkho y chai y naira tym lawh baly, reita leaungsai y chai nai khumi my, hussop kateang tui theung y panih iy, tai ai py, huni theung y awm nai ateaung ngiereichi hawi khumichi ai py katheng ai nai tla. Khumi kadei hiu, tlaiveu, ti y baly tapreaung ai nam iy chai y nai khumi ai, chai nai khumi my huni tui hawi katheng ai nai tla.
19 Pa-thom kani hawi saryh kani y ly reita y chai nai khumi my chai y nai khumichi i tlang tleaung y, huni tui hawi katheng pi ai nai tla. Chai y nai khumi ai chai nai khumi my, huna nai kamta kachai sa pi ai nai tla. Saryh kani y chai nai khumi ly mymy i ateaungchi pasiu iy tui ahiu pan chum baly, kani avah nai khala reita y chai ai.
20 Reita leaungsai y chai y nai khumi ly kachai sa nai tui hawi amymy ai katheng iy, kachai so y baly, chai y jojo ai. Huni khumi ly Areng i Tabynako ai chai hai y nai ne i, Tameuh i khumichi theung i nai nyn va vui ai.
21 Nangchi ly hini reita ai vai mo mang py teaung patawm jo ai nai tla. Kachai sa nai tui katheng nai khumi py, mymy i ateaungchi pasiu ai nai tla; huni tui ai nam nai khumi ly dym mang y khrairei chai y ai.
22 Chai y nai khumi i nam nai ngierei ly chai y nai ne i, huni atitichi ai nam nai khumi ly dym mang y khrairei chai y ai.