11
Tabera amyn pathi nai meingtym
1 Khumi mipuichi ly mymychi i ngari kamtang avum nai molam y, Areng ai josei u nai khala, mymy ly khri pa-rei kado theu i, nichi i tlang tleaung y mai tla hai. Mai ly tai naira kachawn mang y awm nai khumichi ai kang bo.
2 Naibaly Khumi mipuichi ly sabawmra nga ai nai Mosi ai palau u; Mosi my Areng teng y chiu sa pi i, mai ly rym chauchau vui bo.
3 Huni meingtym ai ly Tabera,note 11:3\xk Tabera: Hebrai leu y “mai kang nai” nanai sai ne. *\x*nanai amyn pathi; ati mana nai mo na baly Areng i mai my nichi i tlang tleaung y tla hai nai deaungkho y ne.
Mosi my lu sa nai leaung vui saryhrei vawi takhra nai
4 Israela chengchi hawi vanrei abang nai cheng takhrachi ly khri pa-rei mawi alam u; Israela chengchi malawn py, “Mawi kanglam pajau y na bo!
5 Kaichi ly Aikupta pri y ngo mawi van y naimy, ngai nai ryrei cha ai nai nga; jawitang athaichi, sangpho pajawichi, maje mareih, maje kamleng, maje kangleungchi py cha ai nai nga;
6 vai achi ly atho by y na bo, kani tleirei Manna tako ny y baly cha ai nai ati sai py by y na bo!” nanai tangam u bo.
7 (Manna ly an kadau pjaw nai thengthai hm hawi atawm.Ref 11:7-8 Theu 16:31
8-9 Hunichi ly vum y kadam hawi vanrei tai naira y tla mang; khutawi nai khala khumi mipuichi ly huni Mana pakym u nai ne. Huni ai ly nip i mo, deng i mo, tako dei palawn u; naibaly huni tako dei ai byh iy, tako phi palawn u. Kalum kathau ly olive asitui katlen iy paawp nai tako hawi atawm.) Ref 11:9 Theu 16:13-15
10 Khumi mipuichi ly mymychi i tai pa-kho tleirei y akachu u iy, josei tangam nai raawi Mosi ly thai bo. Areng my nichi ai kado theu hai nai deaungkho y, Mosi ly paleung hawi y nai ne.
11 Naibaly Mosi my Areng teng y, “Nang ly kai ai ati mana nai ngari kamtang avum hai lawh mo? Ati mana nai y kai ly nang teng y meimai ngo y lawh mo? Hini khumi mipuichi i vui y lu sa ai nai, ati mana nai kai ai pei lawh mo?
12 Kai ly nichi ai sa nai py ny y, nichi ai katapen nai py ny y! Nang ly nichi i amsi pajochi teng y pei ai adeu nai pri y chei nai lam jeungrei, ati mana nai kai ai deaungdi katyp khumi palawn iy, nichi ai peu hai lawh mo?
13 Hini khumichi cha ai nai mawi ly kaimy manira hau iy ka-leu kanga pajau ai mo? Nichi ly mawi hnei nai josei tangam u bo.
14 Hini khumi bawibawichi i vui kaimy tlairei ly so pi thai y leang; hini ly kai i vui khri pa-rei rai parai nai kalop ne!
15 Kai ly hini kalop sa jojo ai na baly, nang ly kai ai pahen na baly, vaimy padei iy, hini ngari kamtang i nai lawi hai ba,” nanai takeng bo.
16 Areng my Mosi teng y, “Israela cheng theung i tahm awm iy lu sa pajau nai keung leaung vui saryhreichi ai kai i awmra Tabynakora y jeu achu hai ly nang i sahawi y angdo hai.
17 Huni meingtym y kai kang jeu ai i, nang hawi leu arum ai; kaimy nang ai kang pei nai haiho phyrei la iy nichi teng y kapei ai. Naibaly hini khumi mipuichi i vui sa pi ai nai kalopchi, nichi my nang ai ang sabawm pajau ai i, huni kalop ly nangmy leaungrei sa ai nai ny y leang bo.
18 Vai nang ly khumi mipuichi teng y hina nai kamta thui pi; ‘Nangchi ly khawndam apachai u, nangchi mawi cha ai nai nga u ai. Kaichi ly Aikupta pri y mawi bym pa-rei cha ai nai nga, nanai thui nai py, hu y heng nai hawi keh alam, nanai josei tangam naichi py Areng ly thai bo. Areng my nangchi ai mawi ang pei ai bo i, nangchi cha ai nai nga u ai.
19 Nangchi ly kanirei, kani nyhrei, kani pangrei, kani horei, kani apom ryrei mawi cha ai nai khyh ny y i,
20 mawi ly amleu ano iy palei na pa-rei, lo jeungrei cha ai nai nga u ai. Ati mana nai mo na baly nangchi Aikupta pri y kadeaung naimy, nangchi hawi vanrei awm nai Areng ai patlaw su iy, josei tangam u nai deaungkho y ne’,” napi.
21 Mosi my Areng teng y, “Kai teng y khumi leaung 600,000rei awm; nang ly nichi ai lo jeungrei mawi pacho ai, nanai thui bo.
22 Nichi bym pa-rei cha ai nai si, beram, mi-i ka-lawn ngo pajau na a? Nichi i vui pangli theung i ngo ka-lawn pa-rei ngo pajau na a?” napi.
23 Areng my, “Kai so thai y nairachi awm a? Kai i thui naichi ly ne khyp mo, ne khyp y mo, nanai kra y naimy nang niu ai mang!” napi.
24 Hunaibaly Mosi ly Tabynako i nai theu iy, Areng my leu pei nai ngierei, khumi bawibawichi teng y amti pi teang bo. Ni ly Israela cheng lu sa nai leaung vui saryhreichi ai pangym iy, Tabynako ka-ki angdo hai nai ne.
25 Naibaly Areng ly tamai theung y satla kathiu i, Mosi hawi leu arum bo. Areng ly Mosi teng y pei nai phailo phyrei la iy lu sa nai leaung vui saryhreichi teng y pei pi bo. Nichi ly phailo nga u nai khala amochi kamta aeu u; na i py nichi ly tlenrei aeu u khyh.
26 Lu sa nai keung leaung vui saryhreichi theung i, Eldad hawi Medad nini ly Tabynako mang y chei y naimy, tai theung y awm hawi jo. Nini i tlang tleaung y phailo tym nai khala, nini py amochi kamta aeu hawi teang.
27 Thawndeang leaungrei my Eldad hawi Modad nini i sa nai saichi Mosi teng y angpreng iy amti pi bo.
28 Naibaly thawndeang deaungdi khala i dengdairei Mosi ai sabawm nai keung, Nun i chapo Josua my Mosi teng y, “Sara awi, nini ai kam kyh!” napi.
29 Mosi my, “Nang ly kai i molam y ati thui nai mo? Areng ly mymy i khumi mipuichi teng y phailo pei nai deaungkho y, nichi ly amochi kamta ly aeu u lengleang na sy!” napi.
30 Naibaly Mosi hawi Israela cheng lu sa nai leaung vui saryhreichi ly tai naira mang y vawi u ali teang bo.
Areng my thengmynchi pala pi nai
31 Areng ly tlenrei khyhmy pangli i dengdairei ali theu hai i, ali kamrawi y thengmynchi abawi hai bo. Huni thengmynchi ly khaileaung salo miu nyhrei ka-sang mang akheang tapai i, tai angam mang ka-ki, kanirei ka-teng kamlo ryrei y chym u nai ne.
32 Hunaibaly khumichi ly kani khengrei, vumtorei hawi khawn pa-nyh kani khengrei py, thengmynchi patiu u lengleang bo; khumi leaungrei y di keh nai thengmyn patiu nai ly teaung 125rei kawi nai ne. Nichi ly thengmynchi ai tai ka-ki pala jawn iy pajei u bo.
33 Nichi ly thengmyn mawi awm ma mang rai nai khala Areng my kado theu hai i, nichi ai no kanghawi man hai bo.
34 Huni meingtym y mawi abui nai khumichi i kadei veu up nai deaungkho y, Kibroth Hatava, nanai amyn palau bo; (huni ly “mawi abui nai khumichi i tapreaung,” nanai sai ne.)
35 Nichi ly huni meingtym i dengdairei khuleaung amsa u bi nai, Hazeroth y tym u i, hu y tai u bo.