KATI NAI
Israela chengchi Sinai mawi dengdairei theu u iy, nichi teng y Tameuh my adeu nai Kanan pri nisi ngan khujyh y tym nai sala, saneng vui palyhrei vi kra nai khuleaung satang ai Kati nai cha-iu theung tajiu typ nai ne. Hini cha-iu theung y amny keh naichi ly nichi khuleaung amso y kyh rai kha i Sinai mawi y awm nai thym khala py, deung kangthau harei tlum nai bo y, Jordan tavo nisi mang Moba adym y awm nai khala py, Israela chengchi i amyn la nai satangchi ne. Amyn tlen nyhrei la nai sala, Israelachi ly Kanan pri tokalawi ngan khujyh y awm nai Kadesa Barnea meingtym y tym u teu i py, hu i nai Kanan pri y kun thai y. Nichi ly hunira y saneng neangneang awm nai bo y, Jordan tavo nisi mang y tym u chum baly, khumi phyreichi ly hunira y khuteng sa i, phyreichi ly tavo angpeang iy Kanan pri mang y kun ai nai angvei u bo.
Hini Kati nai cha-iu theung y, ngari kamtang avum nai khala paleung phra jei hyn nai deaungkho y, Tameuh ai py, nichi ai lu sa pi ai nai Tameuh my vawi takhra nai Mosi ai py, avawrei tiu nai khumi chengchi i satang tajiu nai ne. Israela chengchi theung y tamang nai hawi leu tangai y nai ka-dawn awm i py, Tameuh my ly mymy i khumichi ai kry veangveang nai satang ai py, tlen tlenrei ly kham pajau y na nai pa-rei paleung phra nairachi avum teu i py, Tameuh hawi mymy i khumichi tlang tleaung y Mosi i ka-ym awm nai satang py, hini cha-iu theung y tajiu nai ne.
1
Israela chengchi ai amyn la angchei nai
1 Israela chengchi Aikupta pri i theu u nai pa-nyh saneng, pa-nyh lo angchei i kani y, Areng ly Sinai daichi ka-vym y awm nai Tabynako mang dengdairei Mosi teng y leu pei nai lyRef 1.1-46: Kati 26:1-51
2 “Nang hawi Aron ly Israela cheng nupai hawi yhm dengtheung ka-thui ka-thui amynchi la ai nai tla.
3 Tavai thau pajau nai tleaungri ka-cheang saneng apomrei hawi apomrei leng neampacho bawibawi amyn la ai nai tla.
4 Theaung ha harei i nupaira lu sa nai leaungrei my nangchi ai sabawm sy,” napi.
5-16 Khumi mipuichi theung i vawi takhra nai, cheng theungchi theung y lu sa naichi ly hinichi ne:
17 Mosi nini Aron ly huni cheng theaung lu sa naichi i kasabawm hawi,
18-19 pa-nyh lo i angchei kani y Israela cheng bawibawichi ai palau achu iy, nupai hawi yhm dengtheung ka-thui ka-thui amynchi la bo. Areng my leu pei nai kamta, saneng apomrei hawi apomrei leng khumi ka-cheang neampacho bawibawichi ai amyn la iy khai typ bo. Mosi ly Sinai daichi ka-vym y khumi amyn la nai ne.
20-46 Jakob i chapo chalu Ruben theaung dengdairei amteaung iy, tavai thau pajau nai saneng apomrei hawi saneng apomrei leng, tleaungri ka-cheang neampacho bawibawichi ai, nupai hawi yhm dengtheung ka-thui ka-thui amyn la bo; khumi vuikanai ly hinichi ne:
47 Amyn la naira y Levi theaungchi ai ly amyn lo y leang.
48 Ati mana nai mo na baly Areng my Mosi teng y,
49 “Nang ly tavai thau ai nai amyn la nai khala y Levi theaungchi tabawi moh.
50 Nichi ai tavai thau hai ai nai tleaung y ly kai i awmra Tabynako hawi huni i ateaung bawibawichi ai kry ai nai keung y khai. Nichi ly Tabynako hawi huni i ateaungchi tawn ai nai hawi, hunira y kalop sa ai nai deaungkho y, Tabynako ka-ki tai sa iy awm u ai nai tla.
51 Nangchi ly tai asyh nai tleirei Levi theaungchi my Tabynako ai vym iy, meingtym kangthara Tabynako ai tahyh bi ai nai tla. Levi theaungchi ny y naimy takhra khumi leaungrei ly Tabynako sahawi y ahai lawh baly, huni khumi ai ly padei takengkei ai nai tla.
52 Israelachi ly tai naira meingtym tahyh nai khala mychi i nupai kamkawm ka-thui ka-thui mychi i tamkhawn anui y meingtym la ai nai tla.
53 Na i py khumi leaung leaungrei ly Tabynako sahawi y ahai lawh baly, kai ly kado theu ai i, cheng theaung verei kapajeng lawh ai; hunaibaly Levi theaungchi ly Tabynako typ ai nai, Tabynako ka-ki tai sa iy awm u ai nai tla,” napi.
54 Areng my Mosi teng y leu pei nai kamta, Israela chengchi ly sa u bo.