27
Areng teng y talam nai i vui Reitachi
1-2 Areng my Mosi dengdairei Israela chengchi i vui reitachi pei pi bo. Amimi py Areng teng y vaineng abeu iy, amymy ai atalam lawh baly, ni ly hina nai kamta tangkachi apani nai pei iy amymy ai atleu pajau;
3-7 huni apani naichi ly:
— saneng apomrei hawi saneng vui tariurei sala i neampacho ka-cheang ly tangka chang 50 rei
— neampachy ka-cheang ly tangka chang 30 rei
— saneng pangrei hawi saneng apomrei sala i neampacho ly tangka chang 20 rei
— neampachy ly tangka chang tlau 10 rei
— saneng pangrei akui neampacho ly tangka chang tlau 5 rei
— saneng pangrei akui neampachy ly tangka chang tlau 3 rei
— saneng vuitariu leng neampacho ly tangka chang 15 rei
— saneng vuitariu leng neampachy ly tangka chang tlau 10 rei
8 Vaineng abeu iy amymy ai atalam nai khumi ly pani yb nai tangka pei pajau y lawh baly, ni ai pathyp pi nai keung teng y hawi ai nai tla; naibaly pathyp pi nai keung ly huni khumi i pei pajau nai ryrei, vang kadi pani pi ai nai tla.
9 Nang ly Areng teng y talam ai nai avo nai tawnbawi talam ai, nanai arawn yb lawh baly, huna nai tawnbawi ly kachai ne i,
10 arawn nai khumi ly huni tawnbawi jeng y takhra tawnbawi hawi apathyp vui ai nai avo y. Ni ly huna nai kamta jeng talam lawh baly, huni tawnbawi nyhrei ly Areng i vui lawm veng bo.
11 Na i py talam ai nai arawn yb nai tawnbawi ly reita y chai y lawh baly, Areng teng y talam ngau y. Ni ly huni tawnbawi ai pathyp pi nai keung teng y chei hai ai nai tla.
12 Pathyp pi nai keung my huni tawnbawi ai khen iy, vang pani pi ai nai tla. Huna nai pani pi nai vang ly ne khyp ai nai tla.
13 Huni khumi ly tawnbawi ai van teang ai ngai lawh baly, vang kapani bo y, chungphy apomrei tleang bi ai nai tla.
14 Amimi py Areng teng y amy i yhm talam nai khala, pathyp pi nai keung ly huni yhm i awm nai sai khen iy, vang pani pi ai nai tla. Huna nai pani pi nai vang ly ne khyp ai nai tla.
15 Amy i yhm ai talam nai khumi ly huni yhm van ali teang ai nai ngai lawh baly, vang kapani bo y chungphy apomrei tleang bi ai nai tla.
16 Amimi py amy i khaileaung phyrei Areng teng y talam baly, pathyp pi nai keung ly huni khaileaungra y amti amjang pati pajau nai kane iy, vang pani pi ai nai tla; vang ly chamaw chohti teaung nyhrei ka-chei na baly, tangka chang tlau horei pani pi ai nai tla.
17 Huni khumi ly my i khaileaung ai pei ali teang nai saneng khei nai khala talam lawh baly, vang angym pa-rei pei ai nai tla.
18 Ni ly khaileaung pei ali teang nai saneng khei nai bo y, neng ha harei khala talam lawh baly, pathyp pi nai keung my vai momang pei ali teang nai saneng ryrei awm rai nai saneng kati iy, vang kadi pani pi ai nai tla.
19 Huni khumi ly huni khaileaung van ali teang ai nai ngai lawh baly, pani pi nai vang bo y chungphy apomrei vang tleang bi ai nai tla.
20 Ni ly Areng teng i khaileaung van man y pui naimy, khumi leaungrei teng y jo vui lawh baly, ni ly huni khaileaung atleu teang ai nai ngo y leang bo.
21 Vai momang pei ali teang nai saneng tym nai khala y, huni khaileaung ly Areng teng y talam yb nai khaileaung ne i, Areng i vui lawm jojo ai. Hunai deaungkho y huni khaileaung ly pathyp pi nai keungchi i vui ne.
22 Amimi py amy i van nai khaileaung ai Areng teng y talam lawh baly,
23 pathyp pi nai keung ly vai momang pei ali teang nai saneng ryrei, awm rai nai sanengchi kane iy, khaileaung vang pani pi ai nai tla. Huni khumi ly khaileaung vang ai huni kani y my pei ryp ai nai tla. Huni tangka ly Areng i vui ne.
24 Pei ali teang nai saneng tym nai khala, huni khaileaung ai angchei i yhmkeung, ti y baly ni i yhmtheaung kamtymchi teng y pei pi ali teang ai nai tla.
25 Vang bawibawi ly pri i mitu miteaung vang pani ai nai tla.
26 Tawnbawi tapen man nai cho chalu ly Areng i vui ne nai deaungkho y, amimi py hunichi ai paleung kangai katalamra palawn iy, Areng teng y talam ai nai avo y. Si cho, beram cho, mi-i cho, hunichi ly Areng i vui ne;
27 na i py chai y nai tawnbawi cho chalu ai ly apani nai vang bo y chungphy apomrei vang tleang bi iy, van teang ai nai tla. Huni tawnbawi ai van teang y lawh baly, takhra khumi teng y apani nai vang hawi jo pi ai nai tla.
28 Areng teng y atalam kyp nai khumi ai mo, tawnbawi ai mo, khaileaung ai mo, ka-jo ka-van so ngau y. Huna nai talam patyp yb nai ngierei ly Areng my peang yb veng bo. Ref 27:28 Kati 18:14
29 Huna nai Areng teng y talam yb nai khumi ai ly atleu teang ngau y; huni khumi ai ly padei takengkei ai nai tla.
30 Khaileaung i theu nai amti amjang, ti y baly thengthai horei y harei ly Areng i vui ne.
31 Amimi py huni amti amjang ai atleu teang ai nai ngai lawh baly, vang kapani bo y chungphy apomrei tleang iy van ai nai tla.
32 Khawn nai tawnbawichi py horei y harei ly Areng i vui ne. Tawnbawichi ai kati nai khala y, horei y harei ly Areng i vui ne.
33 Yhmkeung ly veung jei nai tawnbawichi ai Areng i vui phy pi ngau y; phy pi yb nai tawnbawira y jeng theng ai nai avo y. Tawnbawi harei ai takhra tawnbawi harei hawi katheung vui lawh baly, huni tawnbawi nyhrei ly Areng i vui lawm vui i, huni ai atleu teang ngau y. Ref 27:30-33 Kati 18:21; Leu 14:22-29
34 Hini ly Areng my Sinai mawi salo y Mosi dengdairei, Israela chengchi teng y pei nai reitachi ne.