21
Eaung naimy Jerusalem y kun nai
(Mk 11:1-11; Lk 19:28-40; Jh 12:12-19)
1 Naibaly nichi ly Jerusalem avang y tym u kasa ai nai kha y, Bethphaki avang hawi Oliv mawi y tym u iy, Isu ly abangnai leaung nyhrei ai pato i nini teng y,
2 “Nangni i mo kataw i avang y chei hawi ly, nangni ly keaungngo kano kasau ai pakheng nai hawi, ahawi y cho awm nai py niu hawi ryp ai: su hawi ly, kai teng y pahawi hawi.
3 Naibaly ami py nangni teng y paka nai leu thui baly, ‘Areng my aly awm,’ tapi; naibaly ni my ang tha hai praw ryp ai mang,” napi.
4 “Khen cham, nang i Samrang ly paleung jypjyp naimy
keaungngo kano kasau tleaung y atang nai,
Ne, keaungngo kano kasau cho
kypkyp tleaung y my atang naimy
Nang teng y ang jeu ai,
Nanai Zion i chaniu ai thui pi,”
5 nanai, amo i labeaung thui nai ly tym thai ai nai huni ly awm nai bo.
6 Hunaibaly abangnai leaung nyhrei ly chei hawi iy, Isu my myni teng y leu pei nai kamta khyp sa hawi i, keaungngo kano kasau hawi cho ai ly pahawi hawi iy,
7 tlang tleaung y myni i kanih bai hawi i mymy ly atang bo.
8 Naibaly khumi mipuichi theung y nawi keh naichi ly lam y nichi i kanihchi bai u i, khumi takhrachi my ly lymlo tiu i lam y bai u teang.
9 Naibaly mymy i mo mang y tako nai hawi mymy ai hui nai khumi mipuichi ly, “Tameuh my Davida i chapo ai tahm pasang sy; Areng i amyn y jeu nai ly tahm hawi; salo mang i nai ly Tameuh my ni ai amtheaung hai sy,” nanai aeu u.Ref 21.9: Sam 118.25, 26
10 Naibaly mymy ly Jerusalem avang y kun iy avang theaungreichi my, “Huni khumi ly ami mo? ” nanai adeng u lengleang.
11 Naibaly khumi mipuichi my ly, “Hini ly amo Isu, Kalili pri Nazaret avang i khumi ne,” napi.
Isu ly Achura yhm y chei nai
(Mk 11:15-19; Lk 19:45-48; Jh 2:13-22)
12 Naibaly Isu ly achura yhm kalen pui y kun iy, achura yhm kalen pui i atiti jo nai hawi van nai keung bawibawichi ai patheu iy, tangka katheung nai keungchi i sabawi hawi, buhu jo nai keungchi i atehrachi py nui pi pawn teang;
13 naibaly mymy ly nichi teng y, “Kai i yhm ly chiu sa nai yhm napi ai,’ nanai tajiu nai ne: nangchi ly damrachi i tapiu palawn u lawh,” napi.Ref 21.13: Is 56.7; Jer 7.11
14 Naibaly achura yhm kalen pui y ly mei kamjuchi hawi kheu kangbaichi ly mymy teng y chei u i, mymy ly nichi ai hawi sa pi bo.
15 Na i py pathyp pi nai keung kalenchi hawi Reita patiu nai keungchi ly mymy i atiti rengrang sa naichi hawi, achura yhm kalen pui y, “Tameuh my Davida i chapo ai tahm pasang sy,” nanai aeu nai deaungdichi ai niu khala y ly nichi ly paleung hawi y i ni teng y, “Hinichi i thui nai ly thai a?” napi.
16 Naibaly Isu my nichi teng y, “Thai chy: Deaungdi chymplei naichi hawi kanu nei thym naichi i labeaung y theu nai ly nang ly palo naira angym hai bo,’ nanai ly phain u vai y a?” napi.Ref 21.16: Sam 8.2
17 Naibaly mymy ly nichi teng i nai chei iy avang pui dengdairei theu nai, Bethani avang y chei i hu y jei bo.
Isu ly thaidu keung ai pasawi nai
(Mk 11:12-14, 20-24)
18 Naibaly mymy ly khawn mang y avang pui y ali teang nai thym khala y ly kajeu alam bo.
19 Naibaly mymy ly lam teng y thaidu keung niu i chei tapai iy, ngam ny y baly ati sai py niu y; naibaly mymy ly huni teng y, “Vai dengdairei deungtasa khrairei athai moh sy,” napi.
20 Naibaly thaidu keung ly jei rawm ryp bo. Naibaly abangnaichi my ly huna nai niu u iy, “Ati mana nai sai kha thaidu keung ly jei rawn ryp lawh ly,?” nanai khri pa-rei lyh na.
21 Naibaly Isu my nichi teng y, “Meitang khyp kang thui pi, nangchi ly ym naira awm iy, ym thai y nai by y baly, nangchi ly thaidu keung y sa nai kamta sa khyh nai ny y i, hini mawi ka-sang teng y py, ‘Asyh ly, pangli tui y aphi vui,’ napi baly nangchi i thui nai kamta tym ai.Ref 21.21: Mt 17.20; 1 Kor 13.2
22 Naibaly nangchi i ati cheaungkhang ym naimy chiu sa nai hnei nai ngierei ly nga ai,” napi nai pathang.
Isu i sa thai naira ai deng chumchi nai
(Mk 11:29-33; Lk 20:1-8)
23 Naibaly mymy ly achura yhm kalen pui y kun nai bo y, atiti patiu nai thym khala y ly pathyp pi nai keung kalenchi hawi, khumi humchi i miteaung kehchi ly mymy teng y chei u i mymy teng y, “Hini nang i atitichi sa nai ly ami i leu y sa nai mo?
24 Ami my leu ang pei nai mo?” napi. Naibaly Isu my ly nichi teng y, “Kai py nangchi teng y leu sairei kang deng teang ai, huni ly kai ai nangchi my thui pi baly hini kai i atitichi sa nai py ami i leu y sa nai mo, nanai kang thui pi teang ai.
25 Johan i baptis sa nai ly ma mang i nai mo? Kani pri mang i nai a, khumi i nai a?” napi nai pathang. Naibaly nichi ly adawn u i, “Achi ly, ‘Kani pri mang i nai,’ napi baly, ‘Ati mana nai mymy i leu ym u y lawh? ang napi lawh ai.
26 Naibaly achi ly, Khumi i nai,’ napi i ai khy khumi mipuichi ai jei bi; nichi bawibawi my ly Johan ai ly amo ne, napi kheng bo,” nanai arum u.
27 Hunaibaly nichi my, “Kaichi ly pany y,” nanai Isu ai pathang. Mymy ly nichi teng y, “Kai py hini kai i atitichi sa nai ly ami i leu y sa nai mo, nanai kang thui pi y leang.
Chapo leaung nyhrei hawi pata nai
28 “Na i py nangchi ly mana dawn u mo? Khumi ami mo chapo leaung nyhrei awm i mymy ly leaungrei teng y chei iy” Deang awi, vaini ly kreip akho y kalop so,’ napi.
29 Naibaly ni my ly, ‘Kai ly ngai y,’ napi nai pathang; na i py hunai bo y ni ly paleung adawn ali i chei bo.
30 Naibaly mymy ly sawi teng y chei iy hunai kamta napi teang. Naibaly ni my ly, ‘Ngaai awi, kai chei ai mang,’ napi nai pathang; na i py ni ly chei y pasi lawh veng.
31 Hunini leaung nyhrei naira y ampo i kangai sa nai ly ami mo?” napi. Nichi my ly, “Kangman keh nai,” napi. Isu my ly nichi teng y, “Meitang khyp kang thui pi, akeu cheaung nai keungchi hawi bimachi py Tameuh i peang naira y nangchi ai ang kun pi kalym vui ai nai bo he.
32 Johan ly nangchi teng y hawi nai lam y ang jeu i, nangchi ly mymy ai ym y: na i py akeu cheaung nai keungchi hawi bimachi py mymy ai ym: naibaly nangchi ly huni niu u nai bo y py mymy ai ym thai ai nai nangchi i paleung y adawn u ali y.Ref 21.32: Lk 3.12, 7.29–30
Kreip akho kry nai keungchi hawi pata nai
(Mk 12:1-12; Lk 20:9-19)
33 “Pata nai leu takhra tangai u: Yhmkeung leaungrei mo awm i kreip akho sa, naibaly, apai akawm i, kreip athai ati ai nai angawm tai iy, chang ka-sang sa bo; naibaly mymy ly akho kry nai keungchi teng y hlau ai nai vang pei iy, pri takhra y chei vui.Ref 21.33: Is 5.1–2
34 Naibaly athai jaw ai nai neng kasa bo nabaly, mymy i athai nga ai nai akho kry nai keungchi teng y mymy i miseaungchi ai pato.
35 Naibaly akho kry nai keungchi my ly mymy i miseaungchi ai patiu iy, leaungrei ai ly pakhau, leaungrei ai ly padei, leaungrei ai ly lengseaung y aphi u ka.
36 Naibaly mymy ly kangman i kamkawmchi tleaung y miseaung takhrachi ai kanawi kyh pato bi i,nichi ai py hunai kamta khyp sa teang bi bo.
37 Hunai bo y mymy ly ni i chapo ai nichi teng y pato i, nichi ly kai i chapo ai ly tahm khai ai ngaw khyh,’ napi.
38 Na i py akho kry nai keungchi ly mymy i chapo ai niu bo nabaly, ‘Hini ly yhmtheaung kamtym ne; choh, padei u sina, mymy i yhmtheaung amtym ai nai ly lo pi sina,’ nanai mymychi tengtawi arum u bo.
39 Hunaibaly nichi ly mymy ai patiu i, kreip akho i nai ly patheu iy padei u bo.
40 Hunaibaly kreip akho keung ang jeu nai neng khala y ly huni akho kry nai keungchi i tlang tleaung y ly mana mana sa ai mo?” napi.
41 Nichi my ly mymy teng y, “Huni khumi kamngochi ai ly ngari patang parai naimy tama hai iy, jaw ai nai neng tleirei y athai ly mymy teng y pei veangveang ai nai, akho kry nai keung takhrachi teng y kreip akho hlau ai nai vang pei iy au ai,” napi.
42 Isu my ly nichi teng y,Ref 21.42: Sam 118.22–23
“Yhm sa nai keungchi i lengseaung ngai y nai ly,
Huni kypkyp ly taki i lengseaung avo keh nai
palawn bo:
Huni ly Areng i sa nai ne i,
Achi i mei ka-niu y rengrang tlai nai ne,’
nanai ly Tameuh i cha-iu y phai u vai y a?
43 Hunai deaungkho y kang thui pi, Tameuh i peang naira ly nangchi teng i nai la pi veng ai i, huni pri i athai kamta athai ai nai cheng teng y au ai.
44 Huni lengseaung tleaung y atlym nai ly kawi phiu ai i, ami ai py ti krup ipsaly dei piupa ai,” napi.
45 Naibaly pathyp pi nai keung kalenchi hawi Pharisaichi ly mymy i pata nai leu takhra takhra thai iy, huni leu ly mymychi i satang thui nai ne, nanai pany u bo.
46 Naibaly nichi ly mymy ai patiu ai nai sai hau; na i py khumi mipuichi ai jei, amo athang khai nai deaungkho y.