20
Kreip akho y kalop sa naichi
1 “Kani pri my peang nai ly yhmkeung my chei angthodyh iy tham naichi ai mymy i kreip akho y kalop sa hai nai kamta ne.
2 Naibaly mymy ly tham naichi hawi kanirei y pia vui pangrei pei ai nai aly bo nabaly, mymy i kreip akho y pato bo.
3 Naibaly mymy ly kani achaw deaung nai kha y chei i, khumi takhra ai seng meingtym y angdo atyhtyh nai niu bo;
4 naibaly mymy ly nichi teng y, ‘Nangchi py kreip akho y chei u teang, avo nai ryrei kang pei ai mang,’ napi. Naibaly nichi ly chei u bo.
5 Naibaly mymy ly kanithun kha y hawi kani ka-reu y py chei bi iy, hunai kamta sa bi.
6 Naibaly dyn biu theaung neng kha y chei iy, khumi takhrachi ai angdo nai niu i nichi teng y, ‘Nangchi ly ati mana nai hi y kani khengrei angdo u atyhtyh mo?’ napi.
7 Naibaly nichi my ly mymy teng y, ‘Ami py kalop so hai y nai deaungkho y teu,’ napi. Mymy ly nichi teng y, ‘Nangchi py kreip akho y chei u teang,’ napi.
8 “Naibaly dym mang y ly kreip akho keung my ly mymy i yhmtheaung kry nai keung teng y, ‘Tham naichi ai palau ly, kangkhym keh nai dengdairei pateaung iy kangman keh nai tym pa-rei nichi ai vang pei,’ napi.Ref 20.8: Lev 19.13; Leu 24.15
9 Naibaly dym biu theaung neng kha y jeu naichi ly pia vui pangrei nga u bawibawi.
10 Naibaly kangman keh naichi ly chei u iy nawi kyh nga u ai nai athang khai; na i py nichi py pia vui pangrei nga u bawibawi teang.
11 Naibaly nga u iy, ‘Nang ly nichi ai kaichi kani khengrei kani bi kangngo ajai iy,
12 ka-ui kakai tleaungleaung naichi kamta vanrei palawn bo,’ nanai yhmkeung i tlang tleaung y jo sei u bo.
13 Naibaly mymy ly nichi theung i leaungrei teng y, ‘Nai awi, kai ly nang i tlang tleaung y hawi y sa nai ati sai py by y chy bo: pia vui pangrei pei ai nai aly yb nai ny y a?
14 Nangmy i vui pei nai phai lo ly, tako tako jau; kai ly nang ai kang pei nai kamta khyp ly hini kangkhym keh naichi teng y py kapei ai nai ngai.
15 Kaimy i teu ly kaimy ngaingai so ngau y a? Ti y baly kai ly hawi nai deaungkho y nang ly khen hawi y nai sai a?’ napi nai pathang.
16 Hunai kamta kangkhym kangtem nai ly kangman y awm ai i, kangman keh nai py kangkhym kangtem y awm ai,” napi.Ref 20.16: Mt 19.30; Mk 10.31; Lk 13.30
Isu ly mymy dei ai nai tlen pa-thom pany hai nai
(Mk 10:32-34; Lk 18:31-34)
17 Naibaly Isu ly Jerusalem avang y kalau nai thym khala y abangnai leaung holai nyhreichi ai ly hawi takhra i, lam sala y ly nichi teng y,
18 “Khen cham, achi ly Jerusalem avang y kalau ai he; Khumi i Chapo ai ly pathyp pi nai keung kalenchi hawi Reita patiu nai keungchi i kiu y patiu hai ai; naibaly nichi my ly mymy i tlang tleaung y dei ai nai leu atlym hai ai i, panui hai ai nai hawi,
19 chip ai nai hawi, kraws y tahen ai nai py Cheng Takhrachi teng y au ai; naibaly kani thomrei kani y ni ai pathau teang ai,” napi.
Amhm leaungrei i takeng nai
(Mk 10:35-45)
20 Hunai thym khala y ly Zebedai i chapo i amhm ly chapo nini ai hawi iy mymy teng y chei, naibaly ni ai chiu iy atiti mo hnei bo.
21 Naibaly mymy ly ni teng y, “Nang ly ati ngai mo?” napi. Naibaly ni my ly mymy teng y, “Hini kai i chapo nini ai ly nang i peang naira y nang i lamtang mang y leaungrei, nang i langvawi mang y leaungrei ateh hawi thai ai nai leu pei kyh,” napi.
22 Isu my ly, “Nangni i hnei nai ly nangni ly pany y. Kai i khau nei ai nai ly nangni nei hawi thai a? ” napi nai pathang. Nini my ly mymy teng y, “nei thai chy,” napi.
23 Mymy ly nini teng y, “Kai i khau ly nangni ly nei hawi takengkei ai; na i py kai i lamtang mang y hawi langvawi mang y ateh ai nai leu ly kai i pei ai nai ny y leang Ngaai my sa pi rym naichi i vui ne ai,” napi.
24 Naibaly leaung horeichi ly huni satang thai i amjo amnau leaung nyhrei nini i tlang tleaung y khri pa-rei paleung hawi y bo.
25 Na i py Isu my ly nichi ai palau iy, “Cheng Takhrachi i tlang tleaung y peang nai keungchi ly nichi i tlang tleaung y khri pa-rei atho sa na, nichi i khumi kalenchi py nichi i tlang tleaung y khri pa-rei aly peang, nanai nangchi pany.Ref 20.25–26: Lk 22.25–26
26 Nangchi theung y hunai kamta awm ai nai tlo y: na i py nangchi theung y ami py khumi kalen lawn ai ngai nai ngierei ly nangchi ai sabawm nai keung y awm ai nai tla;Ref 20.26–27: Mt 23.11; Mk 9.35; Lk 22.26
27 ami py nangchi theung y kangman keh lawn ai ngai nai ngierei ly nangmychi i miseaung y awm ai nai tla;
28 hunai kamta teang khumi i Chapo ly mymy ai sabawm ai nai hau nai ny y i, kalangchi ai sabawm ai nai hawi khumi neangneangchi ai atleu ai nai mymy i hengra pei lawh ai nai py ang jeu nai ne,” napi.
Isu my mei kamju leaung nyhrei ai hawi sa pi nai
(Mk 10:46-52; Lk 18:35-43)
29 Naibaly nichi ly Jeriko avang i nai theu u nai thym khala y ly khumi mipui ka-teng ny y nai mymy teng y abang u bo.
30 Naibaly khen cham, mei kamju leaung nyhrei ly lam teng y ateh nai Isu tako, nanai thai hawi iy, “Areng Davida i chapo awi, kaini ai pahen kyh,” nanai aeu hawi.
31 Naibaly khumi mipuichi my ly katheu y ai nai nini ai jo; na i py nini ly “Areng Davida i chapo awi, kaini ai pahen kyh,” nanai aeu ra bo.
32 Naibaly Isu ly angdo pawp iy nini ai palau i, “Nangni ai ati kang sa pi ai nai ngai hawi no? ” napi.
33 Nini my ly mymy teng y, “Areng kaini ly mei angvang ai nai ngai,” napi.
34 Hunaibaly Isu ly khrikhri pa-rei pahen nai, nini i mei y nam i nini ly tlenrei khyh my mei angvang praw i, mymy teng y abang hawi bo.