6
Isu ai Nazaret my ngai y nai
(Mt 13:53-58; Lk 4:16-30)
1 Naibaly mymy ly hu i nai theu iy, mymy i awm nai avang mang y tym bo; mymy i abangnaichi py ni teng y abang veangveang.
2 Naibaly Anawn Kani ne i, mymy ly achura yhm y leu patiu amteaung bo: naibaly mymy i leu thai nai khumi neangneangchi my ly, “Hini khumi ly hini bawibawi ly ma mang i nga nai mo? Hini khumi teng y cheng naira pei nai ly ati cheng naira mo? Mymy i kiu y hina tanrei atiti rengrang sa naichi ly ati mana nai sai mo?
3 Hini khumi ly Mari i chapo, Jakob hawi Josepha hawi, Juda hawi, Simon hawi, nichi i amjo amnau lasama ny y lawh a? Mymy i tuichochi py achi teng y awm nai ny y lawh a?” napi nai khri pa-rei lyh na. Hunaibaly nichi ly mymy i tlang tleaung y paleung hawi y bo.
4 Naibaly Isu ly nichi teng y, “Amo ai ly mymy i avang y hawi, mymy i misochi theung y hawi, mymy i yhm y ny y baly palo y nai ly awm vai y leang,” napi.Ref 6.4: Jh 4.44
5 Naibaly mymy ly no nai khumi maidenreichy naichi i tlang tleaung y kiu tamam iy hawi sa pi nai harei ny y baly, hu y ly atiti rengrang pipi so thai y bo.
6 Naibaly mymy ly nichi i ym y nai sai deaungkho y rengrang tlai, napi.
Isu my abangnai leaung holai nyhreichi ai pato nai
(Mt 10:5-15; Lk 9:1-6)
Naibaly mymy ly leu patiu nai tarawi y avang tleirei y amki prei.
7 Naibaly mymy ly leaung holai nyhreichi ai ly mymy teng y palau iy, leaung nyh leaung nyhrei ai pato amteaung: vawinamchi tleaung y aly peang ai naira py nichi teng y pei.
8 Naibaly mymy ly nichi i khuleaung chei ai nai vui cheaungvawi ny y baly ati sai py syn y ai nai napi cheng veng: tako py, jibo py, nichi i khobai y tangka py syn ai nai tlo y;Ref 6.8–11: Lk 10.4–11
9 na i py phainai amchiu u, napi, baichu ly nyhrei amchiu u moh, napi bi.
10 Naibaly mymy my teang nichi teng y, “Nangchi ly ma ma y py yhm y lyn baly, hu i dengdairei nangchi theu y ryrei ly hu y ango u jojo.
11 Naibaly mani avang y py nichi my nangchi ai kawn y iy, nangchi i leu py tangai y nai ngierei y ly, hu i dengdairei theu u nai khala y ly, mymychi ai pany hai ai nai nangchi i kheu padawi i spryh ly katheng u,” napi.Ref 6.11: Ataw 13.51
12 Hunaibaly nichi ly theu u iy, khumichi ly uikhei ai nai tla, nanai leu thui pi.
13 Naibaly vawinam neangneangchi ai py patheu u iy, no nai neangneangchi ai py asi tui pajui i hawi sa pi.Ref 6.13: Jak 5.14
Baptis sa nai Johan dei nai
(Mt 14:1-12; Lk 9:7-9)
14 Naibaly mymy i amyn ly amthang nai deaungkho y samrang Heroda ly thai i, “Baptis sa nai keung Johan ly kadeichi theung i nai angthau teang nai bo, hunai deaungkho y hina nai sa thai nairachi ly mymy ai sa hai nai boto,” napi.Ref 6.14–15: Mt 16.14; Mk 8.28; Lk 9.19
15 Khumi takhrachi my ly, “Elija na a tu ly,” napi; takhrachi my ly, “Amo na a, amochi theung i leaungrei kamta ne na a tu ly,” napi bi.
16 Na i py Heroda my ly thai iy, “Johan ai kaimy lu katameang khyp nai ly angthau bi nai bo tu ly,” napi.
17 Heroda mymy kypkyp ly mymy i amjo amnau Philipa i aju Herodi molam y khumi pato iy Johan ai ly patiu i theaung y kawm rang naimy paeung veng bo; ati mana nai mo nabaly mymy ly Herodi ai ly lawm veng i,Ref 6.17–18: Lk 3.19–20
18 Johan my ly Heroda teng y, “Nang i amjo amnau i aju ai lawm ngau y,” napi chum veng bo.
19 Hunai deaungkho y Herodi my ly ni ai niu ngai y i, padei ai nai ngai: na i py pajau y:
20 ati mana nai mo nabaly Heroda ly Johan ai khumi kahawi hawi, khumi kachai ne, nanai pany nai deaungkho y ni ai jei i, kry jojo. Naibaly ni i leu tangai nai khala y mymy ly khri pa-rei paleung bi na; na i py ni i leu kawn parai naimy tangai lawh.
21 Naibaly Heroda mymy ai tapen nai neng alyp nai kani y mymy i khumi kalenchi hawi, tavaimi lu kalenchi hawi, Kalili pri i khumi kalenchi i vui py vum y pawi len parai nai sa nai khala y ly avo nai neng tym bo.
22 Naibaly Herodi i chaniu kypkyp ly kun iy lam i, Heroda hawi mymy i biu o ahawi naichi ai ly kawn hai; hunaibaly samrang my ly anglo teng y, “Nang i ngai nai ngierei kai teng y hnei, kang pei ai mang,” napi.
23 Naibaly mymy my teang, “Ati py nang hnei nai ngierei ly kaimy i pri ka-hyhrei khrairei kang pei ai mang,” napi nai ni teng y vaineng abeu veng.
24 Naibaly ni ly theu i amhm teng y, “Ati kahnei ai mo?” napi. Naibaly amhm my ly, “Baptis sa nai keung johan i lu hnei jau,” napi.
25 Naibaly ni ly awn parai naimy samrang teng y kun praw i, “Saibi y Baptis sa nai keung Johan i lu kai ai pei praw ai nai ngai,” nanai hnei.
26 Naibaly samrang ly khri pa-rei paleung mawn parai, na i py mymy i vaineng abeu nai hawi biu o ahawi naichi deaungkho y py ni ai aei ai nai ngai y.
27 Naibaly samrang ly mymy ai typ nai keung tavaimi leaungrei ai pato praw iy, ni i lu la ai nai leu pei: naibaly ni ly theaung y ni i lu tameang iy,
28 ni i lu ly saibi y syn i, anglo teng y pei: naibaly anglo my bi baly amhm teng y pei teang.
29 Naibaly Johan teng y abangnaichi ly huna nai thai iy, ni i veu kalawm i, angawm y up u.
Isu my khumi sang pangreichi ai pacho nai
(Mt 14:13-21; Lk 9:1-17; Jh 6:1-14)
30 Naibaly amtaw thau naichi ly Isu teng y achu iy, ati cheaungkhang nichi i atiti sa nai hawi patiu nai ngierei py ni teng y thui pi bebe.
31 Naibaly mymy ly nichi teng y, “Nangmychi my tlairei daichi ka-vym y jeu u takhra ly, anawn u rai,” napi. Ati mana nai mo nabaly khumi neangneangchi adeng meimeaung na i, biu khrairei cho u ra y na bo.
32 Hunaibaly nichi ly paleaung mang daichi ka-vym y chei u takhra.
33 Naibaly khumichi ly nichi chei u nai thym khala y niu i, neangneangchi ly nichi ai pany, naibaly avang tleirei i dengdairei hu y kheu y angpreng u achu nai nichi ai kalym vui.
34 Hunaibaly mymy ly kacheng y angkhyh kha y khumi mipui ka-teng ny y nai niu iy, typ nai keung by y nai beramchi kamta atawm nai deaungkho y khrikhri pa-rei pahen i, nichi ai leu neangneang patiu amteaung.Ref 6.34: Kati 27.17; 1 Ar 22.17; 2 Neng 18.16; Ezek 34.5; Mt 9.36
35 Naibaly kani patyh parai bo nabaly abangnaichi ly mymy teng y chei iy, “Hini ly daichi ka-vym meingtym ne, kani py patyh parai veng bo;
36 hinichi ai ly achi ahawi tengtang i hlau y hawi avang y py chei u iy, cha ai nai atiti mo van u thai ai nai chei hai kyh,” napi.
37 Na i py mymy ly nichi teng y, “Nangmychi my cha ai nai atiti pei u,” napi nai pathang. Naibaly nichi ly mymy teng y, “Kaichi ly tako pia vui pangrei nai tangka cho chungvai nyhrei vang van iy cha ai nai pei ai a?” napi.
38 Naibaly mymy ly nichi teng y, “Nangchi ly tako phi majierei awm mo? Khen u cham,” napi. Naibaly nichi ly pany bo nabaly, “Phi pangrei hawi ngo amai nyhrei py,” napi.
39 Naibaly mymy ly nichi bawibawi ai acha kangheng tleaung y kamkawm kamkawm ateh hai ai nai nichi teng y leu pei.
40 Naibaly nichi ly chungvai chungvairei, vui pang vui pangrei amjyn naimy ateh u.
41 Naibaly ni my ly tako phi pangrei hawi ngo amai nyhrei la i, kani mang y khen iy kawn nai leu thui i, theng baw theng baw, naibaly nichi i mo y pawi pi ai nai abangnaichi teng y pei; ngo amai nyhrei py bawibawichi theung y paji teang.
42 Naibaly nichi bawibawi ly cha i kajeu kawi u bebe.
43 Naibaly nichi i cha nai kamthom hawi ngo kamlai py akhui nai ly teaung holai nyhrei kawi teang.
44 Tako phi cha naichi ly neampacho ka-cheang ryry naimy sang pangrei awm.
Isu ly tui salo y aleaung nai
(Mt 14:22-33; Jh 6:15-21)
45 Naibaly mymy kypkyp my khumi mipuichi ai amprei hai nai sala y, mymy chei y rai kha y ho mang vai y Bethsaida avang y angpeang man ai nai abangnaichi ai ly paleaung y atang hai praw.
46 Naibaly mymy ly nichi ai amprei hai nai bo y ly, chiu sa ai nai mawi y lyn kalau.
47 Naibaly kani dym bo nabaly paleaung ly ang um pareaung y awm i, ni ly mymy tlairei kacheng y awm.
48 Naibaly ali paka ma nai deaungkho y nichi i ta-pai hai nai paleung bi nai sai ang niu iy, mymy ly khutawi y rai kha y ang tleaung y nichi mang y tako tapai naimy, nichi ai katlen ai nai tau bo.
49 Na i py nichi ly mymy ai ang tleaung y tako nai niu khala y ly, tavau khumi palawn i, aeu u: nichi bawibawi ly mymy ai niu nai paleung dah na na.
50 Na i py mymy ly nichi ai preng praw i, “Paleung awmnem naimy awm u; kai teu na a; jei u moh,” napi.
51 Naibaly mymy ly nichi teng y paleaung y atang teang iy, ali ly anawn ryp.
52 Naibaly nichi ly tako phi satang dawn pany y i, paleung kyh chawn veng nai deaungkho y paleung theung y khri pa-rei lyh parai.
Isu my Kenesaret y no naichi ai hawi sa pi nai
(Mt 14:34-36)
53 Naibaly nichi ly hu mang vai y angpeang iy Kenesaret pri i kacheng y tym i, paleaung ly tui peang y pakheng.
54 Naibaly nichi ly paleaung i nai angkhyh nai bo y khumi mipuichi ly mymy ai ma praw i,
55 huni ahawi tengtang meingtym tleirei y angpreng u tengteang na: naibaly mymy awm, nanai pany naira tleirei y ly no naichi ai ira tleaung y aseaung naimy ajeaung u.
56 Naibaly avang katheang y py, avang kalen y py, hlau y py, ma mang y py mymy i kun naira tleirei y, nichi ly no naichi ai seng meingtym y paseaung mang mang na: naibaly nichi ly mymy i kanih tawm y py nam thai i khyly, nanai takeng u; naibaly nam nai ngiereichi ly hawi ryp hawi ryp bo.