5
Isu my vawinam nam nai khumi ai hawi sa pi nai
(Mt 8:23-34; Lk 8:26-39)
1 Naibaly nichi ly ang vai mang y Kerasin khumichi i pri y tym u i,
2 mymy ly paleaung i nai angkhyh nai bo y khumi leaungrei vawinam my nam nai tapreaung i dengdairei theu iy, mymy hawi avum praw; huni khumi ly tapreaung y awm i, ni ai ly ami py kawm pajau y nai bo;
3 sengkry y malawn py kawm pajau y;
4 deaungki hawi sengkry py kawm reng nai bo, na i py mymy ly sengkry ai ly leu hai iy, deaungki py kadi piupa veng i, ni ai pakym ai nai ami py atho by y.
5 Naibaly mymy ly vum kanithun y tapreaung y hawi mawi y py aeu ryry iy, lengseaung hawi py ao ryry lawh.
6 Naibaly ni ly kamlo i dengdairei Isu ai niu iy angpreng i chiu ryp,
7 naibaly tao pajeng parai pa-rei my aeu nai, “Isu, Salo Kangteng Tameuh i Chapo awi, kai hawi nang hawi ati amtawm naira awm mo? Kai ai patang hai y ai nai Tameuh i amyn y kang takeng nai he,” napi.
8 Ati mana nai mo nabaly Isu ly ni teng y, “Vawinam awi, hini khumi i taku theung i dengdairei theu jau,” napi veng bo.
9 Naibaly mymy ly ni teng y, “Nang i amyn ami mo?” nanai deng. Naibaly ni my ly mymy teng y, “Kai i amyn ly Neang Neang ne, kaichi ly nawi parai nai deaungkho y,” napi.
10 Naibaly huni pri i dengdairei nichi ai patheu y ai nai mymy teng y khri pa-rei takeng.
11 Naibaly huni mawi kamthau y ly eu kanghu pui tlai bo.
12 Naibaly vawinamchi ly, “Kaichi ly nichi theung y kun thai ai nai kaichi ai euchi i taku theung y awm ai nai pato kyh,” nanai mymy teng y takeng u. Naibaly mymy ly avo napi.
13 Hunaibaly vawinamchi ly theu u iy euchi i taku theung y kun u; naibaly eu kanghu ly sang nyhrei mo awm i, angthiu mang y angpreng kathiu iy, ang y taba, naibaly ang y ly tui pathai i dei thleang.
14 Naibaly khawn nai keungchi ly angpreng u iy, avang y hawi hlau y py thui pi. Naibaly nichi ly, “Ati na lawh mo?” nanai khen ai nai chei u hawm.
15 Naibaly nichi ly Isu teng y tym u iy, vawinamchi my nam nai, Neang Neang my nam nai my ly kanih akhiu iy paleung kari awm naimy ateh nai niu i nichi ly jei u.
16 Naibaly niu nai keungchi my ly vawinam my nam nai i tlang tleaung y atiti tym nai sai hawi, euchi i satang ly nichi ai thui pi.
17 Naibaly nichi ly mymy ai ly mychi i pri i nai theu ai nai takeng amteaung.
18 Naibaly mymy ly paleaung y atang ai nai thym khyp khala y vawinamchi my nam vai reng nai khumi ly Isu teng y awm jo ai nai takeng.
19 Na i py Isu my ly pei y i ni teng y, “Nang i yhm y nangmy i ahawichi teng y vawi ly, Areng my nang i vui mana tanrei ang sa pi nai hawi, mymy i ang pahen nai sai ly thui pi,” napi lawh veng.
20 Hunaibaly ni ly chei iy Dekapoli pri y ly Isu my ni i vui mana tanrei ang sa pi nai sai ly amthang hai amteaung, naibaly khumi bawibawichi ly khri pa-rei lyh na.
Ja-ira i chaniu hawi Isu i kanih y nam nai neampachy
(Mt 9:18-26; Lk 8:40-56)
21 Naibaly Isu ly paleaung mang ho mang vai y angpeang bi baly khumi mipui ka-teng ny y nai mymy teng y chei achu bo: naibaly mymy ly ang peang y awm.
22 Naibaly achura yhm miteaung kehchi theung i khumi leaungrei, amyn Ja-ira ly jeu i, mymy ai niu baly mymy i kheu keung y ambeu iy,
23 “Kai i chaniu chy ly dei vi dei vi i, amcheng iy heng thai ai nai nang ly jeu iy ni i tlang tleaung y kiu tamam kyh,” nanai khri pa-rei takeng.
24 Hunaibaly mymy ly ni teng y chei iy, khumi mipui ka-teng ny y nai ni teng y abang i, mymy ai i meimeaung na.
25 Naibaly neampachy leaungrei, saneng holai nyhrei thi ahaw nai,
26 daitang neangneangchi teng y khri pa-rei patang nai, my i yhmtheaung bawibawi ly pasum krai i, hawi kyh ai nai tleaung y ty ra ty ra lawh;
27 ni ly Isu i atiti satang thai i, mymy i nithun mang khumi mipuichi theung y chei iy, mymy i kanih y nam;
28 ati mana nai mo nabaly mymy ly, “Kai ly mymy i kanih y py nam baly ang hawihai ryp ai,” nanai dawn.
29 Naibaly tlenrei khyh my mymy i thi ahaw nai ly akyn praw ryp iy, mymy i no nai ly ang hawihai bo, nanai ni i ngan y my amny ryp bo.
30 Naibaly Isu ly mymy theung i dengdairei sa thai naira theu bo, nanai apany praw iy, khumi mipuichi theung y hi i, “Kai i kanih y nam nai ly ami mo? ” napi.
31 Naibaly abangnaichi my ly ni teng y, “Khumi mipuichi my ang i meimeaung nai ly nang niu nai iy, ‘Kai ai ami nam mo? nanai ly ati mana nai sai mo?” napi.
32 Naibaly mymy ly huni sa nai keung neampachy ai niu ai tau nai khen akiprei.
33 Hunaibaly neampachy ly mymy ai atiti sa pi nai ly pany iy, jei nai hawi kaso theu naimy chei i, mymy i mo y ly ambeu iy kateng khyp my thui pi bebe.
34 Naibaly mymy ly ni teng y, “Lo awi, nang i ym naira my nang ai ang hawihai nai bo; awmnem naimy tako ly, nang i no naira ly hawi jo jau sy,” napi.
35 Naibaly mymy ly katheu dudu nai thym khala y achura yhm miteaung keh yhm i dengdairei ly khumichi jeu u i, “Nang i chaniu ly dei veng bo: ati mana nai sara ai ly akawm hai ai rai mo? ” napi.
36 Na i py Isu my ly nichi i leu thui nai ly dawn dan pi y naimy achura yhm miteaung keh teng y ly, “Jei moh, ym phai ym ryp,” napi.
37 Naibaly Petera nini Jakob hawi, Jakob i amnau Johan py, nichi ai ny y baly ami ai py mymy teng y abang ai nai pei y.
38 Naibaly achura yhm miteaung keh i yhm y tym u iy, Isu ly nichi i khrukhrala nai hawi vo hang tukulu nai ly niu.
39 Naibaly mymy ly kun baly nichi teng y, “Ati mana nai tukulula nai vo u ryry lawh mo? Deaungdi ly dei y leang, i ngym nai teu,” napi.
40 Naibaly nichi my ly mymy ai panui hai lawh. Na i py mymy ly nichi bawibawi ai patheu iy, deaungdi i amhm ampo ai hawi, mymy teng y awm naichi ai py hawi iy deaungdi i awm naira y kun.
41 Naibaly mymy ly deaungdi i kiu y amkhaw iy ni teng y, “Talitha kumi,” napi: huni ly, “Lo awi, angthau jau kang napi,” napi nai sai ne.
42 Naibaly anglo ly angthau praw iy tako ryp; ni ly saneng holai nyhrei awm nai bo. Naibaly nichi ly vaimy khri pa-rei lyh ala nai lyh y alam na.
43 Naibaly mymy ly nichi teng y, “Hini ly ami py pany moh sy,” napi cheng veng i, ni ai pacho ai nai leu pei.