6
Areng my Israela chengchi ai thui tamawn nai
1 Israela chengchi ai Areng i thui tamawn nai leu pei nai tangai u.
Aw Areng, ang thau ly nang i thui tamawn nai thui pi ba. Nang i leu pei nai ly mawi hawi mawi aheungchi thai u na sy.
2 Khaileaung y khaw hai nai sangum langdeng mawichi awi, Areng i leu pei nai tangai u! Areng ly mymy i khumichi teng y thui tamawn ai nai awm nai ne. Mymy ly Israela chengchi ai thui tamawn ai nai leu ka-rum awm.
3 Areng my, “Kai i khumichi awi, nangchi ly hina tanrei sa tamang u a? Nangchi i tlang tleaung y kai ati kang sa mo? Kai ai pathang pi u.
4 Kai ly nangchi ai Aikupta pri i dengdairei kang pahawi iy miseaung i nai atleu pi bo. Nangchi ai lam patei ai nai Mosi, Aron hawi Miriamchi ai kang pato pi nai ne.Ref 6:4 Theu 4:10-16, 12:50-51, 15:20
5 Kai i khumichi awi, Moba samrang Balak my, nangchi phra tleaung phra ra ai nai mana dawn mo, nanai py, Bera i chapo Balam my samrang teng y ati mana thui pi mo, nanai py, pany u jo. Akasia taira i dengdairei, Kilakala mary mang chei nai lam y avum nai leaungsaichi pany u jo baly, Areng ly nangchi ai ati mana atleu pi mo, nanai nangchi pany u ai,” napi. Ref 6:5 Kati 22:2—24:25; Jos 3:1—4:19
Areng my aly ngai nai sai
6 Kani pri mang y awm nai Areng Tameuh teng y chiu sa ai nai jeu nai khala y, kai ly ati kapathypra syn ai mo? Veung hawi nai si cho ai leng patlum ai nai kasyn ai a?
7 Kai ly beram sang neangneangchi ai py, olive asitui tavo leaung na pa-rei py, kasyn baly Areng my kawn pi na a? Kai i kamngo lawi ai nai nang teng y kai i chapo chalu talam ai a?
8 Areng ly hawi naira patei pi. Mymy i aly ngai naichi thui pi bo. Mymy i aly ngai nai ly leu meitang adyh adawi naimy sa nai, tamen naira awm nai, paleung apanem naimy, nang i Tameuh hawi vanrei awm naichi ne.
9 Areng ai jei kaji nai khumi ly khumi kacheng ne. Mymy ly mary y hina nai kamta thui pi bo. “Mary theung awm achu nai khumi bawibawichi awi, tangai u!
10 Khumi hawi y naichi i yhmchira y, teng y nai kalop hawi nga nai vawnsaichi awm. Nichi ly teng y nai sie khyrychi teaung u bo. Huni teng y nai sie khyrychi ai kai ly niu ngai nai ne.
11 Teng y nai sie khyry teaung nai khumichi ai, kai ly mana pahen thai ai mo?
12 Yhmtheaung katui nang nai khumichi ly khumi kamawnchi tlang tleaung y thi pajawp u bo. Nangchi bawibawi ly tapawp nai khumichi ne.
13 Hunai deaungkho y kai ly nangchi i kamngo nai molam y, vaimy nangchi ai pajeng iy phra hai ai; leu ka-chawi katheu u bo.
14 Nangchi ly teicha teinei cha teu i py, kajeu kawi u ai ny y; alam naimy awm u jojo ai. Nangchi i ko nai yhmtheaung katuichi pateung u pajau ai ny y. Pateung achu nai yhmtheaung katuichi ai py, tavai takai hawi taphra vui ai.
15 Nangchi ly amti amjang pati u i py, pateung achu ai nai ngo y ai. Nangchi ly olive asitui nip i py, cha ai nai ngo y ai. Kreip athai ati i py, kreip hang nei ai nai nga ai ny y.
16 Nangchi ly samrang Omari hawi, ni i chapo samrang Ahab nini i hawi y sa nai nithun abang u nai deaungkho y, huni phra naira avum u ai. Khumi lutengchinote 6:16 khumi lutengchi: Hebrai leu y kai i khumichi my nangchi ai thui tamawn u ai. Khumi cheaungkhangchi ly nangchi ai panui hai ai,” napi.Ref 6:16 1 Areng 16:23-34, 21:25-26