5
1 Jerusalem mary i khumichi awi, nangchi i tavaimichi ai kachu u! Kaichi ai paleung ka-echi my katanmeuh bo. Nichi ly Israela chengchi i lu sa naichi ai tamyh pawn ai nai atho sa u bo!
Tameuh my Bethlehem mary i nai samrang amthawn ai nai adeu pi nai
2 Areng my, “Ephrat ka-peang Bethlehem mary awi, nang ly Juda pri y tahm theang keh nai mary harei ne i py, jangni i samrang kangpreang theung i, Israela chengchi ai peang ai nai samrang leaungrei amthawn ai,” napi.Ref 5:2 Mt 2:6; Jh 7:42
3 Hunai deaungkho y Areng ly neampachy my chapo tapen nai neng tym pa-rei, mymy i khumichi ai paleung ka-echi teng y khai su ai. Naibaly pri palara avum nai khumichi ly mymychi i nupaichi hawi amkawm u teang ai.
4 Huni samrang ang jeu nai khala y, ni ly Areng teng i sa thai naira hawi py, my i Areng Tameuh teng i sa thai naira hawi py, mymy i khumichi ai peang ai. Khaileaung pri verei y awm nai khumi bawibawichi ly mymy i nang parai nai sai pany nai deaungkho y, my i khumichi ly chymme naimy awm u ai.
5 Naibaly pri py tlamsa ai.
Atleu nai hawi pajeng nai
Asuria chengchi ly kaichi i pri y tiu nai, kaichi i amtangrachi taphra iy kun u nai khala y, kaichi theung y atho awm nai luchi ai pato ai i, paleung ka-echi ai tiu ai.
6 Nichi ly tavai ateaung atho hawi Nimroda pri Asuriachi ai tiu iy eaung ai. Asuria chengchi my kaichi i khu ka-peang theung y tiu nai khala y, huni luchi ly kaichi ai paleung ka-e kiu i nai atleu ai.Ref 5:6 AA10:8-11
7 Dei kamthum Israela chengchi ly Areng my tla hai nai kadam kamta, pri neangneangchi ai atho awm hai ai. Thengthai keungchi salo y, nai hai nai kanitui kamta lawm ai. Hunichi ly khumichi i leu tangai y i, Tameuh i leu naini tangai khyh nai ne.
8 Daichi mawi kanghu theung y tym nai khrangsi kamta py, beram kanghuchi theung y tym nai khrangsi kamta py, dei kamthum Israela chengchi ly cheng takhrachi theung y tym ai. Khrangsi ly beram kanghuchi theung y kun iy, beramchi ai kei piupa ai i, ami my py atleu pajau ai ny y.
9 Israela chengchi ly paleung ka-echi ai tiu u ai.
10 Areng my, “Huni neng khala y kai ly nangchi i keaungngochi ai taphra iy, nangchi i tavai ka-richi taphra ai.
11 Kai ly nangchi i pri y awm nai marychi taphra iy, nangchi i amtangrachi taphra ai.
12 Kai ly nangchi i teaung nai atam, laphawichi ai taphra pi pawn nai deaungkho y, nangchi theung y leung sara awm ai ny y.
13 Kai ly nangchi i chiu nai mynchi hawi nangchi i chiu nai leungchengchi taphra ai. Mo mang y ly nangmychi kiu hawi sa naichi ai chiu u moh.
14 Kai ly nangchi i pri y awm nai Aserah tameuhnu mynchi taphra pawn ai.
15 Kai i leu tangai y nai pri takhrachi ai khri pa-rei kado theu hai iy kapajeng ai,” napi.