3
Pajeng naira, uikheih naira hawi athang khai naira
1 Kai ly Tameuh i kamngo pajeng naira mana mo, nanai pany nai khumi ne.
2 Mymy ly kai ai veng tleaung vengra nai, kaveng theung y ang tym hai iy,
3 pahen y naimy avaw avawrei ang pakhau nai ne.
4 Mymy ly kai i ngan tlang aseih hai piu iy, hiuchi py tleu hai piu i khai su bo.
5 Mymy ly kai ai paleung sangri nai hawi, paleung bi patang naira theung y ang pakheng cheng nai ne.
6 Mymy ly kai ai jangni i dei nai khumichi kamta kaveng theung y awm ai nai ang khai bo.
7 Mymy ly kai ai sengkrychi hawi ang pakheng cheng bo. Kai ly theaung tla nai khumi ne i, lawira nga ai nai athang khaira by y.
8 Kai ly sabawm naira nga ai nai tao pajeng parai naimy aeu teu i py, Tameuh ly tangai pi y nai ne.
9 Kai ly lam tako nai khala y, atlym khikha na. Kai amhi nai tleirei y lengseaung apaichi my ang patleang khyp.
10 Mymy ly tavym kamta kai ai oh iy, khrangsi kamta kai i tlang tleaung y ang taba na.
11 Mymy ly lam teng y kai ai patiu iy, ang theih piupa naimy ang khai su bo.
12 Mymy ly my i thailiho a-eaung iy, kai ai amthiura palawn bo.
13 Mymy ly thailihochi hawi kai i tlang tleaung y ko nai ne.
14 Khumichi ly kani khengrei, kai ai ang panui hai; kai ly khumichi i vui amnui tabu kalawn lawh bo.
15 Mymy ly kai i tlang tleaung y no patang naira ai, teicha teinei kamta ang pacho.
16 Mymy ly kai i meimai khaileaung y ang kata iy, kai i hochi ai py lengseaung salo y patleu bo.
17 Kai ly noso aho nai, tlamsa nai hawi amo theu nai py, katami pawn veng bo.
18 Kai ly heng sau ai ny y leang; kai ly Areng teng i athang khai naira py by y leang bo.
19 Kai i patang nai hawi, kai i yhm hlau amny y nai sai ka-dawn pasym baly, hawi y keh nai dei asi nei nai hawi atawm.
20 Huna nai kamta avaw avawrei dawn pasym i, kai i phailo ai atho di hai bo.
21 Na i py athang khai naira nga hai ali teang nai sai ly anui mang ichi ai kapany nai ne.
22 Areng i khei pajau y nai tamen naira hawi pahen naira ly
23 khawn khutawi neng kamta khesere naimy, kani si nai kamta khaw hai tatang nai ne.
24 Areng ly kai i vui ne nai deaungkho y, kai ly mymy ai athang khai.
25 Areng ly mymy ai ym nai khumi lutengchi teng y ly hawi hai reng.
26 Hunai deaungkho y achi ai atleu ai nai, mymy ai paleung sau parai naimy ajeng nai ly achi i vui hawi keh.
27 Huna nai kamta paleung sau parai naimy ajeng nai ly hawithym khala acham nai hawi keh nai ne.
28 Achi patang naira avum nai thym khala kham tanga iy, amy tlairei tym teang y naimy, ateh jo ai nai tla.
29 Athang khai naira awm py awm lym ai i, achi ly ahui naimy khaileaung y lu meung ai nai avo.
30 Ang pakhau nai hawi khumi aniu y nai avum teu i py, pany thai iy kham tanga ai nai avo.
31 Areng ly pahen reng nai deaungkho y, achi ai deungtasarei ang khai su ai ny y.
32 Mymy ly achi ai paleung si vo tangam naira ang pei teu i py, achi i tlang tleaung y ang pei nai pahen naira hawi tamen naira ly len parai nai ne.
33 Mymy ly achi ai paleung si vo tangam hai iy patang hai teu i py, paleung ka-dawn hawi hai y.
34 Achi theaung tla iy paleung ka-dawn phra nai thym khala py, mymy ly pany pi nai ne.
35 Mymy ly my i pei yb nai nga ai avo naichi, achi ngo thai y nai khala py, ang pany pi se nai ne.
36 Jeung y tara chih nai sai tamang piupa nai thym khala py, mymy ly pany.
37 Areng i ngai nai kamta naini, sa nai sai amcheang ai tla.
38 Hawi nai hawi y nai ly mymy i leu pei nai kamta, lawm nai ne.
39 Achi ly amychi i kamngo molam y pajeng naira avum nai thym khala, ati mana nai y tangam u lawh ai mo?
40 Achi ly amychi i tako nai lam dawn pasym iy, Areng teng y ali u teang sina.
41 Kani pri mang y awm nai Tameuh teng y achi i paleung am-eaung naimy, anui i chiu sa naira thui u sina.
42 “Kaichi ly kamngo sa tamang u bo; nang ai kang tiu u bo. Aw Areng, nangmy py, kaichi i kamngochi palawi pi y nai ne.
43 “Nang ly kaichi ai hui naimy patiu iy padei bo. Nang i pahen naira ly nang i kado theu naira my taphum vui bo.
44 Kaichi i chiu sa nai ly kado theu naira veng nanai khupanym ai, ta-i pajau y.
45 Nang ly kaichi ai khaileaung pri y, chainem y nai anyn angso lawm hai bo.
46 “Kaichi ly paleung ka-echi i mei aniu y naimy, panui hai nai avum u.
47 Kaichi ly phra seaungkhrang naichi ka-vum u bo. Kaichi ly paka naira hawi, ka-jeirachi theung y kaheng u nai ne.
48 Kaichi i khumichi myh kang pawn nai deaungkho y, kaichi i mei theung i mei katuichi ly tavo tui kamta leaung na bo.
49-50 “Areng ly kani pri mang dengdai khen kathiu iy niu nai pa-rei, kai i mei katuichi ly anawn y naimy leaung jo bo.
51 Kai ly mary theung i neampachychi i tlang tleaung y tym nai leaungsaichi niu nai molam y, kai i paleung phra nai ne.
52 “Kai ly niu ngai y ai nai leaungsai ny y pui naimy, paleung ka-echi ly kai ai tavo palawn iy, deaung pateung u.
53 Nangchi ly kai ai kanghengtang naimy angawm theung y aphi u iy, angawm pa-kho y lengseaung hawi pali hai cheng bo.
54 Tui ly kai ai ang um dudu nai deaungkho y, kai ly kadei ai bo, nanai kadawn bo.
55 “Aw Areng, angawm theung mang dengdairei, kai ly nang ai kaau bo.
56 Huna nai kaau nai raawi tangai ai nai, kai i takeng nai khala nang ly thai.
57 Kai ai jei moh, nanai pathang pi bo.
58 “Aw Areng, nang ly kai ai sabawm ai nai jeu i, atleu pi bo.
59 Kai i avum nai teng y nai saichi nang pany i, kai ai meimai khen ly tara chih pi kyh ba.
60 Paleung ka-echi ly kai ai mana tanrei niu ngai y na mo, nanai py. kangviu y kai ai mana tiu na mo, nanai py, nang ly pany pi se nai ne.
61 “Nang ly nichi my kai ai mei aniu y nai sa naichi thai iy, Aw Areng, nang ly nichi i kangviu y dawn tau nai bawibawichi py pany pi se.
62 Nichi ly kai i satang kani khengrei thui u iy, mychi i dawn nai saichi sa u.
63 Khawn mang dengdai kani dym pa-rei, kai ai ang panui hai ryry bo.
64 “Aw Areng, nichi i sa nai sai molam y, nichi ai pajeng kyh ba.
65 Nichi ai pasawi ly nichi ai paleung phra naira tym hai kyh ba!
66 Nichi ai hui iy patiu ly khaileaung tleaung i nai nichi ai ha py by y pa-rei, tamyh pawn kyh ba!”