2
Isu ai tapen nai
(Mt 1:18-25)
1 Naibaly hunai thym khala y ly hina nai ne. Awkusta Kaisara my khaileaung pri i khumi amyn tajiu ai nai leu pei.
2 Huni ly Suri pri y Khurini ly aripeng y awm nai khala i amyn tajiu angchei nai ne.
3 Hunaibaly khumichi bawibawi ly amyn tajiu ai nai amymy avang y chei bawibawi.
4 Naibaly Josepha py Davida i dengtheung hawi kangpreang teang nai deaungkho y Kalili pri i Nazaret avang dengdairei Judai pri i Bethlehem avang napi naira y chei teang;
5 my i aju angam nai Mari hawi amyn tajiu ai nai chei hawi: ni ly deaungdi tapen ai nai kasa bo.
6 Naibaly hina nai ne, nini ly hu y awm nai khala y ly deeaungdi tapen ai nai neng bo.
7 Naibaly chalu y neampacho tapen; naibaly kanih y bam me iy, charai y akeaung y nai deaungkho y tawnbawi teicha pei naira y paseaung.
Beram typ keungchi hawi kani pri amtaw thauchi
8 Naibaly huni pri y ly beram typ nai keungchi awm i, vum y beram typ nai prang y jei hai.
9 Naibaly Areng i kani pri i amtaw thau nai leaungrei ly mychi ahawi y angdo iy, Areng i nang parai nai ly mychi ahawi y angvang, hunaibaly nichi ly khri pa-rei jei.
10 Naibaly kani pri amtaw thau nai my ly mychi teng y, “Jei u moh; khen cham, khumi cheaungkhang i vui Satang Kahawi khri pa-rei kawn ai awm nai kang tym hai nai teu.
11 Vaini ly nangchi i vui Davida i avang y Paheng Keung tapen bo, Areng Krista ly.
12 Naibaly hini ly nangchi i vui ka-ma-ra ne: deaungdicho kanih y bam me nai, tawnbawi teicha pei naira y aseaung nai niu ai,” napi.
13 Naibaly tlenrei khyh my kani pri i amtaw thau nai teng y ly kani pri mang i awm nai mipui neangneang awm i,
14 “Salo Kangteng i Tameuh nang parai nai awm sy,
Khaileaung tleaung i mymy i kawn parai nai khuhmichi
teng y aly nai awm sy,” nanai Tameuh ai palo.
15 Naibaly hina nai ne, kani pri i amtaw thau naichi ly kani pri mang y chei pi pawn nai bo y beram typ nai keungchi my ly, “Vai Bethlehem avang y tym pa-rei chei u sina, Areng my achi ai leu thui pi nai tym nai ly khen u sina,” nanai arum.
16 Hunaibaly tako u kaliki i, Mari hawi, Josepha hawi, tawnbawi teicha pei naira y deaungdicho aseaung nai py niu.
17 Naibaly nichi my niu baly deaungdicho i satang kani pri i amtaw thau nai my thui nai ly thui pi pateang.
18 Naibaly thai nai ngierei my ly beram typ nai keungchi i thui nai ly lyh parai.
19 Na i py Mari my ly huni leu thui nai bawibawi ly mymy i paleung theung y dawn iy pateung me jo.
20 Naibaly beram typ nai keungchi my ly mychi teng y thui pi nai ka-tawn khyp naimy atiti thai py thai, niu py niu nai deaungkho y Tameuh ai palo nai tarawi y ali u teang.
Isu amyn pathi nai
21 Naibaly lengkhym takip ai nai kani tajarei chi baly, kajeu y aniu y rai khala y kani pri i amtaw thau nai my amyn pathi angchi nai Isu pathi.Ref 2.21: Lev 12.3; Lk 1.31
Isu ai Achura yhm y talam nai
22 Naibaly Mosi i Reita kamta myni i amchai nai kani chi baly mymy ai Areng teng y au ai nai Jerusalem y hawi;Ref 2.22–24: Lev 12.6–8
23 (Areng i Reita y, “Chalu y neampacho tapen nai ngierei ly Areng i vui y Khai Takhra Nai ne napi ai nai tla,” nanai tajiu nai kamta;)Ref 2.23: Theu 13.2, 12
24 naibaly Areng i Reita y tajiu nai kamta amprym buhu bomrei mo, yhm bubu bomrei mo apathyp ai nai chei.
25 Naibaly khen cham, Jerusalem y ly amyn Simeon khumi leaungrei awm: huni khumi ly khumi kahawi hawi, Tameuh ai dawn parai nai khumi ne: Israelachi ai awm hai nem nai keung ai ly ajeng: mymy teng y Phailo Kachai awm.
26 Naibaly mymy ly Areng i Krista ai niu y ryrei ly dei ai ny y, nanai Phailo Kachai my thai hai rym bo.
27 Naibaly Phailo i pany hai nai deaungkho y achura yhm kalen pui y kun i, deauungdicho Isu ai ly amhm ampo my Reita i leu kamta sa pi ai nai jeu hai khala y,
28 ni my ly takawi i,
29 “Aw Areng, vai nangmy i leu kamta Nang i miseaung ai ly paleung awmnem naimy chei hai ai;,
30 Ati mana nai mo nabaly Cheng Takhrachi teng y
amteng hai ai nai kangvang hawi,
Nang i khumi Israelachi ai tahm paseng ai nai py.
31 Nang i paheng naira cheng cheaungkhangchi
niu ai nai sa rym nai ly
32 Kai i mei y kaniu bo,”
nanai Tameuh ai palo.Ref 2.32: Is 42.6, 49.6, 52.10
33 Naibaly amhm ampo my ly deaungdicho i satang thui nai ly lyh parai.
34 Naibaly Simeon my nichi ai amtheaung hai i amhm Mari teng y, “Khen cham, hini deaungdi ly khumi neangneangchi i paleung y dawn nairachi ai amteng hai thai ai nai, Israelachi theung i khumi neangneangchi ai atlym hai ai nai hawi, aei nai ka-ma-ra lawn ai nai py khai nai ne:
35 ne, nang i paleung ai py haisau my thun vau ai,” napi.
36 Naibaly amo leaungrei,phanuela i chaniu Anna, Aser cheng khumi leaungrei awm; mymy ly anglo kachai ateang nai bo y juvo teng y saneng saryhrei awm bo;
37 naibaly saneng vui taja takaw saneng palyhrei lumai ateang i, miteaung pui na bo. Ni my ly achura yhm kalen pui ai khai su y naimy biu hai nai hawi, chiu sa nai hawi vum kanithun Tameuh ai chiu reng.
38 Hunai thym khala y mymy ly jeu khyp i Tameuh teng y kawn nai leu thui i, Jerusalem atleu ai nai athang khai nai ngiereichi teng y ly ni i satang thui pi.
Nazaret y vawi ali teang nai
39 Naibaly nini ly Areng i Reita kamta atiti bawibawi sa pajau baly Kalili pri y myni i avang Nazaret y vawi ali teang.Ref 2.39: Mt 2.23
40 Naibaly deaungdicho ly cheang ryh cheang ryh i, atho awm ryhryh iy, cheng naira kawi; Tameuh i pahenra py mymy teng y awm.
Achura yhm theung i deaungdi Isu
41 Naibaly saneng tleirei Katlen Vui nai pawi neng baly,mymy i amhm ampo ly Jerusalem y chei jojo.Ref 2.41: Theu 12.1–27; Leu 16.1–8
42 Naibaly mymy ly saneng holai nyhrei awm khala, reita kamta pawi y chei i,
43 pawi lui nai vawi khala y deaungdi Isu my ly Jerusalem y awm pi veng, amhm ampo ly pany y.
44 Hunaibaly mychi i kamkawm theung y awm mo, nanai kanirei lam chei iy, mychi i amjychi hawi meimai kamnychi theung y ni ai hau hawi.
45 Naibaly niu y nai deaungkho y hau hawi prei naimy Jerusalem y ali hawi teang.
46 Naibaly hina nai ne, kani thomrei khala ly sarachi theung y ateh nai, mychi i leu tangai iy atiti deng nai achura yhm kalen pui y niu hawi.
47 Naibaly mymy i leu thai nai ngiereichi ly ni i pany thai nai sai hawi pathang nai sai py lyh parai.
48 Naibaly mymy i amhm ampo my ly mymy ai niu baly rengrang tlai ly, napi; hunaibaly amhm my mymy teng y, “Deang awi, ati mana nai y kaini ai hina nai sa lawh mo? Khen cham, ngampo kaini my paleung si hyh naimy kang hau na a, ” napi.
49 Naibaly mymy ly nini teng y, “Ati mana nai y kai ai hau hawi mo? Ngaai i yhm y kaawm ai nai tla, nanai pany y a?” napi.
50 Naibaly nini teng y mymy i leu thui nai ly dawn ai nai pany hawi y.
51 Hunaibaly mymy ly nini hawi chei kathiu i, Nazaret avang y tym iy, nini i leu tangai jojo. Naibaly amhm my ly huni atiti bawibawi ly mymy i paleung theung y pateung me jo.
52 Naibaly Isu ly cheng ryh cheng ryh i, len py len ryh len ryh; naibaly Tameuh hawi khumichi khi y ly kawn naira nga.Ref 2.52: 1 Sam 2.26; Lkch 3.4