18
Neampachy lumai hawi tara chih nai keung pata nai
1 Naibaly atho si y naimy chiu sa jojo ai nai tla, nanai pany hai ai nai mychi teng y pata nai leu thui i,
2 “Mani avang y mo tara chih nai keung leaungrei awm. Huni khumi ly Tameuh ai py jei y, khumi ai py dawn hai y.
3 Naibaly huni avang y neampachy lumai leaungrei awm i ni my ly, ‘Kai i paleung ka-e teng y vawitheung tha pi kyh,’ nanai my teng y chei jojo.
4 Naibaly ni my ly mymy i paleung y, ‘Kai ly Tameuh ai py jei y,
5 khumi ai py dawn hai y i py, hini neampachy lumai ly kai ai khrukhra hai nai deaungkho y vawitheung tha pi si, ti y baly ang jeu jojo ai i, kai ai akawm hai bymbym lawh na,’ napi,” nanai thui.
6 Naibaly Areng my ly, “Tara chih nai keung hawi y nai i leu thui nai ly pany u.
7 Naibaly mymychi i tlang tleaung y neaung kham pi rai i py, mymy i vawi naichi, vum kanithun y mymy ai palau nai keungchi ai ly Tameuh my vawitheung tha pi y ai a?
8 Kang thui pi, mymy ly nichi ai vawitheung tha pi praw ai. Na i py Khumi i Chapo jeu ai nai neng khala ly khaileaung pri y ym naira niu ai a?” napi.
Pharisai hawi akeu cheaung nai keung pata nai
9 Naibaly khumi kahawi ne, nanai athang akhai iy, khumi takhra bawibawichi ai tahm khai y nai keung amichi teng y mo ly hini pata nai leu py thui i,
10 “Khumi leaung nyhrei achura yhm kalen pui y chiu sa ai nai lyn kalau i, leaungrei nai ly Pharisai,leaungrei nai ly akeu cheaung nai keung ne.
11 Pharisai ly angdo i mymy naimy hina nai chiu asa ryp, ‘Aw Tameuh, kai ly khumi takhra kamta, um paviu naichi, hawi y naichi, pajang sa naichi ny y nai hawi, hini akeu cheaung nai keung kamta py kai ly ny y nai deaungkho y nang teng y kai kawn parai ba.
12 Kani saryhei y biu tlen nyhrei kahai; kai i nga nai ngierei horei y harei kapei,’ napi.
13 Na i py akeu cheaung nai keung ly palo paraira y angdo i, kani mang y py dengtheang vam y nai, ‘Aw Tameuh, kai khumi kamngo ai pahen kyh,’ nanai paleung y atum ryry lawh.
14 Kang thui pi, huni khumi tleaung y ly hini khumi ly eaung naimy yhm y vawi kathiu bo.Tahm apasang nai ngierei ai ly tahm panem ai, na i py tahm apanem nai ai ly tahm pasang ai,” napi.Ref 18.14: Mt 23.12; Lk 14.11
Deaungdichychi ai amtheaung hai nai
(Mt 19:13-15; Mk 10:13-16)
15 Naibaly nam ai nai deaungdi chymplei naichi ai py mymy teng y chei hai, na i py abangnaichi my ly huna nai niu khala nichi ai jo.
16 Na i py Isu my nichi ai palau i, “Deaungdichychi ai kai teng y jeu ai nai pei u, paka u reng moh; Tameuh i peang nai ly hina naichi i vui teu.
17 Meitang khyp kang thui pi, ami py Tameuh i peang nai ly deaungdichy my kawn nai ka-tawm kawn y nai ngierei ly theung y kun ai nai ly aveng,” napi.
Khumi kanang
(Mt 19:16-30; Mk 10:17-31)
18 Naibaly miteaung keh ami mo mymy teng y, “Sara kahawi, deungtasarei hengra kanga thai ai nai mana kasa ai mo?” nanai deng.
19 Naibaly Isu my ni teng y, “Ati mana nai kai ai kahawi napi mo? Leaungrei ny y baly ami py kahawi by y, huni ly Tameuh ne.
20 Leu pei naichi ly nang pany be: Pajang sa moh, Khumi ai padei moh, Paviu moh,Seu rumrammoh, Ngamhm ngampo ai tahm khai, nanaichi ly,” napi.Ref 18.20: Theu 20.12–16; Leu 5.16–20
21 Naibaly ni my ly, “Huni leu bawibawi ly kai deaungdichy khala i dengdairei kapatawm nai bo,” napi
22 Naibaly Isu my huna nai ly pany i ni teng y, “Nang ly lamrei takhawi rai; nang i awm nai ngierei jo ly, kamawnchi teng y paji, hunaibaly nang kani pri y yhmtheaung nga ai; naibaly jeu ly, kai tng y abang,” napi.
23 Na i py ni my ly khri pa-rei nang nai deaungkho y huna nai leu thai i khrikhri pa-rei paleung mawn na.
24 Hunaibaly Isu ly mymy ai khen iy, “Yhmtheaung nang naichi ly Tameuh i peang naira y kun ai nai mana tanrei rai na mo!
25 Khumi kanang Tameuh i peang naira y kun ai nai tleaung y ly kula-iu saprym kho y a-i praw ai nai rai y keh,” napi.
26 Naibaly huni leu thai naichi ly, “Huna nabaly heng naira ami nga pajau ai mo?” napi.
27 Ni my ly, “Khumi i so pajau y nai ly Tameuh my sa thai na a,” napi.
28 Naibaly Petera my, “Khen cham, kaichi ly kaimychi i bawibawi khai su iy nang teng y abang bo,” napi.
29 Naibaly mymy ly nichi teng y, “Meitang khyp kang thui pi, ami py Tameuh i peang nai deaungkho y yhm mo, aju ai mo, amjo amnauchi ai mo, amhm ampo ai mo, chanauchi ai mo khai jo nai ngierei ly,
30 vai heng nai khala y my py huni tleaung y nawi keh nai hawi, neng tym ai nai deungtasarei hengra py ngo y ai nai ami py awm ai ny y,” napi.
Isu mymy dei ai nai tlen pa-thom pany hai nai
(Mt 20:17-19; Mk 10:32-34)
31 Naibaly holai nyhreichi ai ly mymy teng y hawi takhra i nichi teng y, “Khen cham, achi ly Jerusalem avang y kalau ai i, amochi i leu tajiu nai bawibawi ly Khumi i Chapo i tlang tleaung y tym ai.
32 Mymy ai ly Cheng Takhrachi teng y patiu hai iy, panui hai ai i angji ngalai pa-rei sa iy ni ai pachi pathawi ai;
33 naibaly chip ai i padei ai; naibaly mymy ly kani thomrei kani y angthau teang ai,” napi.
34 Naibaly huni leu thui nai ly nichi ly den py dawn naira ngo y: huni leu thui nai ly mymychi teng y aheu hai i, ati thui nai mo, nanai pany y.
Isu my mei kamju cheaung nai ai hawi sa pi nai
(Mt 20:29-34; Mk 10:46-52)
35 Naibaly hina nai ne, mymy ly Jeriko avang y tym ai nai kha y mei kamju ami mo cheaung nai lam teng y ateh;
36 naibaly khumi mipuichi tako nai katyn thai i, “Ati na lawh?” nanai deng.
37 Naibaly nichi my ly, “Nazaret Isu tako na a,” nanai thui pi.
38 Hunaibaly ni ly, “Isu Davida i Chapo awi, kai ai pahen kyh,” nanai aeu.
39 Naibaly tako man naichi my ly leu katheu y ai nai ni ai jo; na i py ni ly, “Davida i Chapo awi, kai ai pahen kyh ba,” nanai aeu ra veng.
40 Hunaibaly Isu ly angdo paw iy mymy teng y ni ai pahawi ai nai leu pei.
41 Naibaly mymy i ahawi y tym baly, “Nang i tlang tleaung y ati kang sa pi ai nai ngai mo?” nanai deng. Naibaly mymy ly, “Areng, niu thai ai nai kangai,” napi.
42 Naibaly Isu ly mymy teng y, “Niu thai jau, nang i ym naira my ang hawihai nai bo,” napi.
43 Naibaly tlenrei khyh my niu praw i, Tameuh ai palo prei naimy mymy teng y abang ryp; naibaly khumi bawibawichi ly huna nai niu i Tameuh ai palo.