17
Kamngo
(Mt 18:6-7, 21-22; Mk 9:42)
1 Naibaly mymy ly abangnaichi teng y, “Atlym nairachi ly awm y ai nai awm thai y leang; na i py atlym naira awm hai nai keungchi ly taham si!
2 Hini khumi theangchichy nai tleaung y leaungrei ai atlym hai ai nai keung ai ly, my i kaneaung y choh nip naira lengseaung awi hai iy pangli tui y pala i khyly, mymy i vui hawi keh alam ai.
3 Hawi hai palai adawn u: ngamjo ngamnau my atiti kamngo sa baly ni ai parip; mymy ly paleung adawn ali baly ni ai pahen.Ref 17.3: Mt 18.15
4 Mymy ly kanirei y nang i tlang tleaung y tlen saryhrei atiti tamang iy, ‘Kai paleung adawn ali bo,’ nanai tlen saryhrei nang mang y mo leng teang baly, nang ly ni ai pahen ai nai tla,” napi.
Ym naira
5 Naibaly amtaw thau naichi ly Areng teng y, “Kaichi i ym naira pei panawi khyh ba,” napi.
6 Naibaly Areng my ly, “Nangchi i ym naira anmawi hm amairei ka-tawm awm baly, sukamin dengkeaung teng y ly, ‘Nangmy akyn ryp ly, pangli y a-ui vui,’ nanai nangchi my napi ai i, nangchi i leu tangai ryp ai.
Miseaung i kalop
7 Naibaly nangchi theung y ami py li thawn nai mo, beram typ nai mo miseaung awm i khyly, li thawn nai vawi khala y, ‘De, biu o jau,’ nanai thui pi praw na a?
8 ‘Kai i cha ai nai pawi pi ly, neina atha ly, kai cho nei pajau y ryrei ly biu an amsi pi; hunai bo y nang ly cho, nei,’ nanai thui pi y ai a?
9 Mymy i leu pei nai kamta my sa pi nai deaungkho y mymy i miseaung teng y ly kawn nai leu thui vai a?
10 Hunai kamta teng nangchi py nangchi teng y leu pei nai kamta sa u bawibawi nai bo y, ‘Achi ly miseaung vang y nai tla he; sa avo naira sa nai teu,’ na u,” napi.
Keaungsi man nai leaung horeichi ai hawi sa pi nai
11 Naibaly hina nai ne, nichi ly Jerusalem y chei ai nai khala y mymy ly Samari hawi Kalili pri y ly tako katlen vui.
12 Naibaly mani avang y mo kun ai nai khala y keaungsi awm nai cheichei khumi leaung horei mymy hawi avum u i, kamlora y angdo iy athorei my,
13 “Isu Areng awi, kaichi ai pahen kyh,” napi.
14 Naibaly mymy ly nichi ai niu baly nichi teng y, “Chei, pathyp pi nai keungchi teng y akhen hai u,” napi. Naibaly hina nai ne, nichi ly tako u nai thym khala y my chai u bo.Ref 17.14: Lev 14.1–32
15 Naibaly mychi theung i leaungrei my hawi bo, nanai apany baly tao pajeng parai naimy Tameuh ai palo nai vawi ali teang i,
16 mymy i kheu keung y ambeu iy kawn nai leu thui; huni ly samari khumi ne.
17 Hunaibaly Isu my pathang i, “Khumi leaung horeichi ai ly pachai u mo kana?
18 Leaung takawreichi ly ma y awm mo? Hini cheng takhra khumi leaungrei ny y baly Tameuh ai palo ai nai amipy vawi ali teang y mo kana be,?” napi.
19 Naibaly mymy teng y, “Angthau ly, tako ba, nang i ym naira my ang hawihai nai bo he,” napi.
Tameuh i peang nai neng
(Mt 24:23-28, 37-41)
20 Naibaly Pharisaichi my Tameuh i peang nai tym ai nai neng deng nai deaungkho y ni ly mymychi teng y, “Tameuh i peang nai ly niu thai naira y tym y leang;
21 ‘Khen cham,hi y he: hu y ho,’ nanai py ang tapi y ai; khen cham, Tameuh i peang nai ly nangchi i paleung theung y awm,” nanai pathang.
22 Naibaly mymy ly abangnaichi teng y, “Khumi i Chapo heng nai khala i kanirei niu ai ngai nai neng awm ai, na i py niu ai ny y leang bo.
23 Naibaly nangchi teng y, ‘Khen cham, hu y ho: khen cham, hi y he,’ ang napi ai; chei u moh,nichi teng y abang py abang u moh.
24 Amlosadi theu iy, kani anui y meingtym harei dengdairei angvang i, kani anui y meingtym takhra khrairei kangvang ko nai kamta ly, Khumi i Chapo py mymy jeu nai kani y ly hunai kamta awm teang ai.
25 Na i py huna nai ny y rai khala y mymy ly atiti neangneang patang ai nai tla i, vai deung i kangthauchi my ly ni ai ngai y naimy awm ai nai tla.
26 Nova heng nai khala y atiti awm nai kamta ly, Khumi i Chapo ang jeu bi nai kani y ly awm teang ai.Ref 17.26: AA 6.5–8
27 Nova ly paleaung y kun i,tuibai theu nai nichi bawibawi ai padei be veng nai kani tym y ryrei ly nichi ly cha py cha, nei py nei, apom py apom, apom ai nai py deaung paseng.Ref 17.27: AA 7.6–24
28 Hunai kamta ly Lota heng khala y awm teang; nichi ly cha py cha, nei py nei, van py van, jo py jo, pati py pati, yhm py sa;Ref 17.28–29: AA 18.20—19.25
29 na i py Sodom avang i nai Lota theu nai kani ly kani mang i dengdairei mai hawi kan kani nai i, nichi ai padei bebe.
30 Hunai kamta ly Khumi i Chapo my amteng nai kani y ly awm teang ai.
31 “Huni kani y ly ami py mymy i vawnsai angtheung y awm nai, mymy ly amphu y awm baly, tawn ai nai satlo moh sy; hlau y awm nai khumi py vawi moh sy.Ref 17.31: Mt 24.17–18; Mk 13.15–16
32 Lota i aju ai pany u jojo ba.Ref 17.32: AA 19.26
33 Ami py amy i hengra palawi ai naira hau nai ngierei ly tama ai; ami py amy i hengra tama nai ngierei ly apalawi ai.Ref 17.33: Mt 10.39, 16.25; Mk 8.35; Lk 9.24; Jh 12.25
34 Kang thui pi, huni vum y ly i naira harei y khumi leaung nyhrei awm ai i, leaungrei ai ly la vui ai, leaungrei ai ly daw jo ai.
35 Neampachy leaung nyhrei choh nip nai awm ai i, leaungrei ai ly la vui ai, leaungrei ai ly daw jo ai.
36 [Naibaly neampacho leaung nyhrei hlau y awm ai i, leaungrei ai ly la vui ai, leaungrei ai ly daw jo ai,]” napi.
37 Naibaly nichi my ly ni teng y, “Areng ma mang y mo? ” nanai pathang. Naibaly mymy ly nichi teng y, “Mawi veu awm naira tleirei y langnachi py tym achu ai,” napi.