7
1 Elisa my, “Areng my leu pei nai tangai ba! Khawndam hini neng tym baly Samari mary theung y hawi keh nai chohnei sie holai nyhrei, ti y baly chohpui chamaw chohnei sie apom phai palyhrei nai y, tangka chang tlaurei hawi van ai nai nga u ai,” napi.
2 Samrang ai typ nai tavailu leaungrei ly Elisa teng y, “Areng kypkyp my, vaimy kani nai hai teu i malawn py, tuna nai ly tym pajau ai ny y leang!,” napi.
Elisa my, “Nang ly hina nai tym nai niu i py, cha ai nai ngo y ai,” nanai pathang.
Suria tavaimi kamkawm theu u pawn nai
3 Keaungsi man nai khumi leaung palyhreichi ly Samari mary apai pa-kho angam mang y ateh iy, “Achi ly dei ai nai pa-rei, ati mana nai hini meingtym y ajeng jojo ai mo?
4 Achi ly mary theung y kun baly kajeu kanglam y dei ai; hi y awm jo i py dei ai. Hunai deaungkho y achi ly Suria tavaimichi i Tai naira y phai chei u sina. Nichi my pahen baly heng ai; nichi my padei baly dei ai,” nanai arum u nai ne.
5 Hunaibaly nichi ly dym tengsa neng khala, Suria tavaimichi i Tai naira mang y chei u tapai bo. Na i py huni meingtym y nichi tym u nai khala ly khumi leaungrei ai py avum y.
6 Areng my Suria khumichi teng y, keaungngo atang nai risachi, tavai ka-richi hawi tavaimi kamkawm pui tavai thau nai katyn thai hai nai deaungkho y, Suria khumichi my, “Israela samrang ly achi ai tiu ai nai Hiti samrang hawi Aikupta samrangchi teng y kasabawmra hnei nai bo,” nanai thui u.
7 Hunai deaungkho y huni dym my, nichi ly mychi i Tai nairachi, keaungngochi hawi keaungngo kano kasauchi daw su iy, mychi tleaung ai nai angpreng u pawn bo. Nichi i tavai Tai nairachi ly taphra y naimy khai u su nai ne.
8 Huni khumi leaung palyhreichi ly Tai naira sahawi y tym nai khala, Tai harei ra y kun u i, hunira awm nai teicha teineichi cha nei u. Naibaly nichi niu u nai muku, tangka, ateaungchi la u iy theu u i, huni vawnsaichi ai heu u bo. Nichi ly ali u teang bi iy takhra Tai harei theung y kun u i, vaichi khala i kamta sa u nai ne.
9 Na i py nichi ly “Achi ly hina nai kamta sa ai nai avo y! Achi teng y satang kahawi awm nai ne iy, huni satang ly payh vui ai nai avo y. Achi ly hini satang ai thui y naimy, khutawi pa-rei awm lawh teu baly pajeng naira avum takengkei ai. Hunai deaungkho y vaimy, samrang i bangtangchi teng y thui pi u sina!” nanai mychi tengtawi arum u.
10 Naibaly nichi ly Suria tavaimichi Taira i theu u iy mary mang y chei u i, mary katheu pa-kho typ nai risachi teng y, “Kaichi ly Suria khumichi i Tai naira y chei u i, khumi leaungrei py by y, katyn py thai y. keaungngochi hawi keaungngo kano kasauchi py pakheng naimy awm. Taichira py Suria khumichi i khai su nai kamta awm,” napi.
11 Naibaly tamcheaungchi ly huni satang thai hai i, samrang yhm y satang tym bo.
12 Huni neng khala khutawi y i py, samrang ly i ang thau iy bangtangchi teng y, “Suria khumichi i tau akeaung nai kang thui pi ai! Nichi ly hini mary theung y takang theu nai pany u nai deaungkho y, nichi ly mymychi i tavai Taira i nai theu u iy, lampawm patheng u bo. Achi ly mary angam mang y theu iy teicha teinei hau u nai thym khala y, achi ai patiu ai i, mary peang vui ai,” napi.
13 Bangtang leaungrei my, “Hini mary i khumichi ly dei chum nai khumichi kamta dei u ai bo. Hunai deaungkho y satang ly teng khyp mo, nanai pany pajau ai nai achi teng y awm rai nai keaungngo pangrei hawi khumi phyreichi ai pato,” napi.
14 Naibaly nichi ly khumi phyreichi ai vawi u bo. Samrang ly huni khumichi ai Suria tavaimichi i satang pany ai nai ka-ri nyhrei hawi pato bo.
15 Nichi ly Jordan tavo y tym pa-rei chei u i, Suria khumichi preang u nai khala khai u su nai ateaungchi hawi tavai ateaungchi, lam jeungrei avum nai ne. Naibaly nichi ly ali u teang iy samrang teng y amti pi bo.
16 Samari khumichi ly ampreng naimy theu u iy, Suria khumichi i Tai theung i vawnsaichi la u nai ne. Naibaly Areng my leu pei nai kamta, hawi keh nai chohnei sie holai nyhrei, ti y baly chohpui chomaw choh sie apom phai palyhrei nai y tangka chang tlaurei hawi jo u bo.
17 Israela samrang i tamcheaung sa nai tavailu ly huni neng khala mary apai katheu tym nai risachi ai lu sa nai ne i, khumichi i-mengmeaung naimy ni ai chiu i dei bo. Samrang ly Elisa hawi avum ai nai jeu nai thym khala, Elisa my thui yb nai kamta tym nai ne.
18 Elisa my, “Kani pa-nyh hini neng tym baly Samari mary theung y hawi keh nai chohnei sie holai nyhrei, ti y baly chohpui chomaw choh sie apom phai palyhrei nai y, tangka chang tlaurei hawi jo u ai,” nanai samrang teng y thui pi nai khala y,
19 huni tavailu my,” Areng kypkyp my, vaimy kani nai hai teu i malawn py tuna nai ly tym pajau ai ny y leang,” nanai thui nai ne. Huna nai khala Elisa my, “Nang ly hina nai niu i py, cha ai nai ngo y ai,” nanai thui pi.
20 Elisa my thui nai kamta khyp, tavailu ly mary apai katheu pa-khora y khumichi my chiu i dei nai ne.