5
Neaman i roka hawi vui nai
1 Suria tavailu areng Neaman ai ly Suria samrang my, khri pa-rei tahm khai nai ne. Ati mana nai mo nabaly Neaman saho y Areng ly Suria tavaimichi ai, tavai eaung hai nai deaungkho y ne. Neaman ly sorai pui leaungrei ne i py, ka-jei awm nai keaungsi man bo.Ref 5.1-14: Lk 4:27
2 Tlenrei nai khala Suria chengchi ly Israela chengchi ai tiu u i, Israela anglo leaungrei ai patiu bo. Ni ly Neaman i aju teng y miseaung lawm bo.
3 Kanirei nai khala y ni ly my i yhmkeung neampachy teng y, “Achi i yhmkeung ly Samari mary y awm nai amo teng y chei baly, khri pa-rei hawi ai! Huni amo ly yhmkeung i roka hawi pa-rei sa pi pajau ai,” napi.
4 Neaman ly anglo i thui nai leu thai nai khala, samrang teng y chei iy amti pi.
5 Samrang my, Israela samrang teng y chei ly hini cha pei pi,” napi.
Hunaibaly Neaman ly tangka chang 30,000 rei, muku tangcheng 6,000 rei hawi baichu ateaung horei syn naimy chei bo.
6 Ni i syn nai cha theung y, “Hini cha hawi jeu nai kai i bangtang Neaman i roka hawi pa-rei sa pi ai nai, hini cha hawi vanrei nang teng y kang pato nai ne,” nanai tajiu.
7 Israela samrang ly huni cha phain nai khala, ateaung sei iy, “Suria samrang ly kaimy hini khumi i roka tama hai ai, nanai athang khai lawh mo? Kai ly hengra pei pajau, la vui pajau nai sa thai naira awm nai Tameuh lawh sai a? Ni ly kai ai ka-jo hau nai teu bo!” nanai thui.
8 Amo Elisa ly huni atitichi thai nai khala, samrang teng y, “Ati mana nai y nang ly paleung khrukhra naira tym lawh mo? Israela pri y amo awm!, nanai pany hai ai nai, ni ai kai teng y pato,” napi.
9 Hunaibaly Neaman ly keaungngochi my ryh nai ka-ri atang iy, Elisa i yhm mo y tym i, angdo.
10 Elisa my ni teng y, “Nang ly Jordan tavo y tui tlen saryhrei ahiu baly, nang i keaungsi ly chai pyn ryp ai mang,” nanai miseaung ai pato iy thui hai bo.
11 Na i py Neaman ly khri pa-rei kado theu i, “Amo ly kai teng y jeu iy, mymy i Areng Tameuh teng y chiu sa pi naimy, kai i no roka salo y cheaungvawi pheu pi teu i khyly, kai i keaungsi ly chai ai, nanai kadawn!
12 Naibaly Damaska mary y awm nai Abana tavo hawi Pharpa tavochi ly Israela pri i tavochi tleaung y hawi keh nai ny y a? Huni tavochira y tui ahiu baly no roka hawi pajau nai ne!” nanai thui iy vawi vui bo.
13 Ni i miseaungchi ly ni teng ahihawi iy, “Areng awi, amo my nang teng y rai parai nai saisairei sa hai lawh teu i khyly, nang ly so y ai a? ‘Tui ahiu iy roka hawi ai,’ nanai ang thui pi nai ly sa ai avo nai ny y lawh a?” napi u.
14 Hunaibaly Neaman ly Jordan tavo y satla i, Elisa my thui pi nai kamta, tui tlen saryhrei miu nai khala ly roka hawi pyn nai ne. Ni i ngan tlang ly deaungdi i ngan tlang kamta lawm bo.
15 Ni ly mymy i khumichi hawi vanrei, Elisa teng y ali teang iy, “Israela chengchi i Tameuh ny y baly, tameuh takhra by y, nanai vai ly kapany bo. Hunai deaungkho y areng awi, kai i pei nai langseaung talam ba,” napi.
16 Elisa my, “Kai ly langseaung talam ai ny y, nanai kai i chiu nai heng nai keung Areng i amyn y vaineng abeu bo,” napi.
Neaman ly my i pei nai langseaung talam ai nai takeng veangveang teu i py, Elisa ly lo pi y nai ne.
17 Hunaibaly Neaman my, “Kai i pei nai langseaung ai nang lo pi y lawh baly, keaungngo kano kasau nyhrei hawi tang iy kaimychi pri y syn ai nai khaileaungnote 5:17\xk kaimychi pri y syn ai nai khaileaung: amy awm nai pri i tameuh ai, huni tameuh i khaileaung tleaung y naini chiu pajau khyh, nanai dawn bo. \x* pei kyh ba. Ati mana nai mo nabaly kai ly vai i dengdairei Areng ai ny y baly tameuh takhra teng y leng patlum nai kapathypra, ti y baly mani kapathypra py talam ai ny y.
18 Hunaibaly kai ly kaimy i samrang hawi vanrei, Suria tameuh Rimon achura yhm y chei iy chiu nai kamngo molam y, Areng ly kai i kamngo pahen ai nai athang khai. Areng ly kai i kamngo pahen pi takengkei ai!” napi.
19 Huna nai khala Elisa my, “Paleung awmnem naimy tako ba,” napi. Naibaly Neaman ly hu i nai theu bo.
Ni ly tako nai kamlora tym y rai.
20 Elisa i miseaung Kehazi ly “Kai i yhmkeung ly Neaman teng i ati sai py lo y naimy ni ai pato vui lawh ly! Yhmkeung ly Suria khumi my pei nai langseaung ly la ai nai hawi; Kai ly Neaman nithun hui ai i, ni teng i vawnsai ha harei kahnei ai, nanai heng nai Areng i amyn y vaineng abeu bo,” nanai dawn.
21 Hunaibaly ni ly Neaman nithun hui bo. Neaman ly mymy nithun khumi leaungrei hui nai niu i, huni khumi hawi avum ai nai ka-ri tleaung i nai satla iy, “Saisairei aly awm a?” nanai deng.
22 Kehazi my, “By y leang; na i py kai i yhmkeung my, vai Ephraim mawi mang i amo leaung nyhrei tym i, nini i vui tangka chang sang thomrei hawi baichu ateaung ka-bom nyhrei, nang teng y hnei ai nai kai ai pato nai ne,” napi.
23 Neaman my, “Pahen parai naimy tangka chang sang tariurei lo ba,” napi chum baly huni tangka ai paisiu nyhrei theung y lum pi iy, ateaung ka-bom nyhrei hawi miseaung leaungnyhrei teng y pei i, Kehazi mo mang apu hai bo.
24 Nichi ly Elisa awm nai mawi y tym u nai khala, Kehazi ly tangka khai nai paisiu nyhrei la iy, yhm theung y tawn jo. Naibaly Neaman i miseaung ni ai ly pato ali teang bo.
25 Ni ly yhm theung y kun teang nai khala, Elisa my, “Nang ly ma y chei jo mo?” nanai deng.
Kehazi my, “Areng awi, kai ly ma y py chei y leang,” napi.
26 Na i py Elisa my, “Huni khumi ly nang hawi avum ai nai ka-ri salo mang satla nai meingtym y, kai i phailo ly tym nai ny y a? Huni neng ly tangka, ateaungchi, olive akhochi, kreip akhochi, beram hawi sichi, miseaungchi talam ai nai neng ny y!
27 Vai, Neaman i roka ly nang i tlang tleaung y tym ai i, nang hawi nang i katu chanauchi teng y deungtasarei man jo ai!” napi.
Kehazi theu nai thym khala, huni roka man i, ni i tlang ly ji kamta kaleung na bo.