3
Israela pri hawi Moba pri tavai atiu nai
1 Juda samrang Jehoshapha i peang nai saneng holai tajarei khala y, Ahad i chapo Joram ly Israela pri samrang lawm i, Samari mary y saneng holai nyhrei peang nai ne.
2 Ni py Areng i tlang tleaung y kamngo sa; na i py my i ampo, ti y baly amhm Jezebela tanrei ly akhum y. Ni ly ampo i sa nai Bala tameuh mynchi ai taphra.
3 Ni ly mymy ny y rai khala i peang nai Neba i chapo samrang Jeroboam kamta, Israela chengchi ai kamngo sa ai nai lu sa iy lam patei bo. Huna nai kamta kamngo sa jojo nai ne.
4 Moba samrang Mesha ly saneng tleirei Israela samrang teng y beramcho 100,000 rei hawi beram 100,000 rei ra i nga nai beram muichi ai kahm pei reng nai ne.
5 Na i py Israela samrang Ahad dei nai bo y Mesha ly Israela pri ai ka-awi sa bo.
6 Samrang Joram ly vaimy Samari mary i nai theu iy, my i tavaimichi ai pangym bo.
7 Ni ly Juda samrang Jehoshapha teng y savai pato i, “Moba samrang ly kai ai ka-awi sa bo. Hunai deaungkho y, ni ai tiu ai nai nang ly kai hawi vanrei amkawm y bo a?” napi.
Samrang Jehoshapha my, “Kai amkawm ai mang; kai ly nang i sa hai nai kamta sa ai nai aeng yb bo. Kai i khumichi py, kai i keaungngochi py, nang i khumichi hawi keaungngochi kamta ne.
8 Atiu ai nai ly mani lam mang amsa ai mo?” napi.
Joram my, “Achi ly Edom daichi ka-vym lam kasau mang amsa ai,” nanai pathang.
9 Hunaibaly samrang Joram hawi Juda samrang, Edom samrangchi ly amsa u i, kani saryhrei kra nai khala, tavaimichi i vui py, vawnsai tang nai tawnbawichi i vui py, nei ai nai tui kheih nai deaungkho y,
10 samrang Joram my, “Achi ly rai naira avum bo! Areng ly achi samrang leaung thomreichi ai, Moba samrang i kiu y au lawh bo ly!” nanai thui.
11 Samrang Jehoshapha my, “Areng teng y leu deng pi ai nai, hi y amo leaungrei py by y nai sai a?” napi.
Samrang Joram i tavailu my, “Sapha i chapo Elisa awm; ni ly Elija i bangtang ne,” napi.
12 Samrang Jehoshapha my, “Ni ly amo tatang ne,” napi i, samrang leaung thomreichi ly Elisa teng y chei u bo.
13 Elisa my Israela samrang teng y, “Ati mana nai y kai ly nang ai sabawm ai mo? Nang i ngamhm, ngampochi ai tau pei reng nai amochi teng y phai chei iy adeng u,” napi.
Joram my, “Hina nai thui moh! kaichi samrang leaung thomreichi ai Moba samrang kiu y au nai keung ly Areng my ne lawh veng,” napi.
14 Elisa my, “Kai i chiu nai ati cheaungkhang sa thai nai keung, heng nai Areng i saho y, kai ly Juda samrang Jehoshapha i meimai y dawn pi y lawh ip khyly, nang ai kang sabawm y leang.
15 Vai ly taro beu kawp nai khumi leaungrei ai kai teng y jeu hai,” napi.
Taro beu kawp nai khumi ly taro beu nai thym khala, Areng i sa thai naira ly Elisa teng y tym bo.
16 Hunaibaly Elisa ly “Areng my, ‘tui kang nai huni tavo micheaungchi ai leaunghawi tai u;
17 Nangchi ly kani kanai hawi ali aho nai niu y teu i py, huni tavo micheaung ly tui kawi ai. Nangchi hawi nangmychi i tawnbawichi, vawn tang nai tawnbawichi i vui nei ai nai tui bym pa-rei nga u ai,’ nanai leu ang pei bo,” napi.
18 Naibaly Elisa my thui pi bi nai ly “Hinichi ly Areng my sa ai nai rai y nai ne. Mymy ly Moba khumichi ai nangchi i kiu tleaung y au ai.
19 Nangchi ly nichi i apu parai nai amtangra marychi peang vui iy, nichi i thengthai keungchi py, paliu pi pawn ai. Nichi i tuikan bawibawichi ai taphum pawn ai. Nichi i paitiu khuta kahawi ngiereichi ai lengseaungchi hawi taphum iy taphra pi pawn ai,” napi.
20 Kani pa-nyh khawn mang apathyp reng nai neng khala, tui ly Edom pri mang dengdairei leaung kathiu i, khaileaung angdym ra kawi na bo.
21 Moba khumichi ly samrang leaung thomreichi my, nichi ai tavai tiu bo, nanai pany u nai khala y, tavai ateaung syn pajau nai khumi katheang, kalen bawibawichi ai palau achu iy, pri khujyh ra amo hai bo.
22 Kani pa-nyh kawn, nichi i anglaw nai neng khala y, kani si nai kangvang sangso ly tui salo y ko i, thi kamta niu u nai ne.
23 Moba khumichi my, “Huni ly thichi ne lawh ly! paleung ka-e tavaimi kamkawm thomreichi ly mychi tengtawi atleh u lawh bo ly! Achi chei iy nichi i Taira y lawm u sina!” nanai aeu u.
24 Na i py nichi ly huni Tai naira y tym u nai khala, Israela chengchi my, nichi ai tiu u bo. Israela chengchi ly Moba khumichi ai hui u i, tleh chauchau iy
25 nichi i marychi py taphra pi pawn nai ne. Israela chengchi ly pa-tiu khuta kahawi avum nai tleirei, khumi luteng lengseaung ha harei aphi u nai deaungkho y, huni khaileaungchira y lengseaungchi kawi na bo. Micheaung tuikan bawibawichi ai py taphum iy, thengthai keungchi py paliu pi pawn bo. Kangkhym y Kir Here mary pui naini tleaung khyh bo i, lijai pa nai risachi ly huni mary ai katanmeuh iy tiu u nai ne.
26 Moba samrang ly mymy tavai sum bo, nanai apany nai khala y, ni ly haisau syn nai risa leaung 700 reichi hawi vanrei, paleung ka-echi theung i nai theu vui iy, Surianote 3:26\xk Suria: Hebrai leu y “Edom” napi. \x*samrang teng y preang vui ai nai atho sa; na i py ngo thai y bo.
27 Hunai deaungkho y ni ly my i meingtym amtym ai nai chapo chalu ai, mary apai salo y Moba tameuh teng y apathyp vui bo. Huna nai khala Israela chengchi ly jei u i, Moba chengchi i tameuh my saisairei so hai lawh na mo, nanai jei nai deaungkho py, ti y baly Israela chengchi i Areng Tameuh my saisairei so hai lawh na mo, nanai jei nai deaungkho py, huni mary i nai anaw iy mymychi i pri mang y vawi u bo.