2
Elija ai kani pri mang y hawi kalau vui nai
1 Elija ai Areng my ali lengli hawi kani pri mang y hawi kalau vui ai nai neng tym bo. Elija hawi Elisa nini ly Kilakala mary i dengdairei theu hawi i,
2 lam y Elija my Elisa teng y, “Vai ly hi y awm jo ba; Areng my kai ai Bethela mary mang y chei ai nai leu ang pei,” napi.
Na i py Elisa my, “Kai ly nang hawi amprei ai ny y, nanai deungtasarei heng nai Areng hawi nang i tlang tleaung y kai i ka-ym awm nai sai y vaineng abeu bo,” napi. Naibaly nini ly Bethela mary mang y chei hawi nai ne.
3 Huni mary y awm nai amo kamkawm harei ly Elisa teng y chei i ni teng y, “Nang i yhmkeung ai nang teng i nai vaini, Areng my ang la pi vui ai, nanai nang pany a?” napi.
Elisa my, “Kapany; na i py awm u pypy,” nanai pathang.
4 Naibaly Elija my Elisa teng y, “Vai ly hi y awm jo ba; Areng my kai ai Jeriko mary mang y chei ai nai leu ang pei,” napi.
Na i py Elisa my, “Kai ly nang hawi amprei ai ny y, nanai deungtasarei heng nai Areng hawi nang i tlang tleaung y kai i ka-ym awm nai sai y vaineng abeu bo,” napi. Naibaly nini ly Jeriko mary mang y chei hawi nai ne.
5 Huni mary y awm nai amo kamkawm harei ly Elisa teng y chei i ni teng y, “Nang i yhmkeung ai nang teng i nai vaini, Areng my ang la pi vui ai, nanai nang pany a?” napi.
Elisa my, “Kapany; na i py awm u pypy,” nanai pathang.
6 Naibaly Elija my Elisa teng y, “Vai ly hi y awm jo ba; Areng my kai ai Jordan tavo mang y chei ai nai leu ang pei bo,” napi.
Na i py Elisa my, “Kai ly nang hawi amprei ai ny y, nanai deungtasarei heng nai Areng hawi nang i tlang tleaung y kai i ka-ym awm nai sai y vaineng abeu bo,” napi. Naibaly nini ly chei hawi bo.
7 Naibaly amo leaung vuipangreichi ly Jordan tavo ryrei, nini nithun abang u bo. Elija hawi Elisa nini ly tavo peang y angdo hawi nai khala, amo leaung vuipangreichi ly kamlo mang angdo u nai ne.
8 Naibaly Elija ly my i ateaung aleng iy taeang i, tui y pakhau bo. Huna nai khala tui ly akhawi vui i, nini leaung nyhrei ly khaileaung kaphui salo y tako iy, tavo vai mang y ang peang hawi nai ne.
9 Hu y tym nai khala Elija my Elisa teng y, “Nang hawi amprei y rai khala, kai teng y saisairei hnei ba,” napi.Ref 2.9: Leu 21:17
Elisa my, “Nang i kalop amtym thai ai nai chapo chalu i nga ai avo nai sa thai naira ly kai ai pei ba,” nanai takeng.
10 Elija my, “Nang i hnei nai kang pei ai nai rai parai; na i py nang ly kai ai hawi kalau vui nai niu baly, nang i hnei nai nga ai; niu y lawh baly nga ai ny y,” napi.
11 Nini ly leu katheu naimy tako hawi nai thym khala, tlenrei khyhmy nini sala y mai keaungngochi my ryh nai mai angveaung nai ka-ri harei amteng i, Elija ai ly ali lengli hawi kani mang y hawi kalau vui bo.
12 Elisa ly huna nai nui i Elija teng y, “Aw kai i ngaai, aw kai i ngaai! sa thai naira len parai iy, Israela chengchi ai ama hai nai keung awi! nang ly tako vui lawh bo ly!” nanai aeu bo. Naibaly ni ly Elija ai niu ali bi y leang bo.Ref 2.12: 2 Areng 13:14
Elisa ly paleung si parai nai deaungkho y my i ateaung seih nyhrei sei vui na.
13 Naibaly ni ly Elija teng i tla nai ateaung akhui iy Jordan tavo mang y ali teang.
14 Ni ly tavo peang y angdo iy Elija i ateaung hawi tui y pakhau. Na i py tui ly akhawi y. Elisa ly “Elija i Tameuh napi nai Areng ly ma mang y mo?” nanai aeu iy tui y pakhau bi. Huna nai khala tui ly akhawi i, ni ly tavo vai mang y tako jo nai ne.
15 Jeriko mary i amo leaung vuipangreichi ly Elisa ai niu u i, “Elija i sa thai naira ly Elisa my nga vui bo!” nanai thui u bo. Nichi ly Elisa ai lamchung u i, ni i mo y lu meung u iy,
16 “Hi y kaichi khumi leaung vuipangreichi awm; kaichi bawibawi ly atho awm naichi ne. Kaichi ai nang i yhmkeung ai hau ai nai pei ba. Areng i phailo my ni ai hawi vui iy mawi saleung y mo, leaunghawi theung y mo, meingtym ha harei ra y khai lym ai,” napi u.
Elisa my, “Nangchi chei u moh,” nanai paka.
17 Na i py nichi ly hau cham ai nai takeng u veangveang nai deaungkho y, Elisa my pei pi bo. Nichi leaung vuipangreichi ly kani thomrei mawi saleung y lyn kalau, ang vum kathiu iy hau u i py, Elija ai niu u y nai ne.
18 Naibaly nichi ly Jeriko mary y ajeng jo nai Elisa teng y ali u teang bo. Huna nai khala Elisa my nichi teng y, “Nangchi ai hau ai nai chei u moh, kang napi be?” napi.
Elisa i rengrang ka-ma-rachi
19 Jeriko mary i khumi phyreichi ly Elisa teng y chei u iy, “Areng awi, nangmy pany nai kamta hini mary ly ajeaung parai nai mary ne; na i py tui ly hawi y nai deaungkho y, hu y awm naichi ly deaungdi pahaw reng nai ne,” napi u.
20 Elisa my, “Rahum kangtha ra y palawi maidenrei khai iy, kai teng y jeu hai u,” napi. Naibaly nichi ly jeu hai u nai khala,
21 ni ly tavo micheaung mang y chei i, tui y palawi hei chum baly, Areng my, ‘kai ly hini tui y chai hai bo; dei nai mo, deaungdi pahaw nai mo, awm bi y leang bo,’ nanai leu ang pei,” napi.
22 Elisa my thui nai kamta huni kani dengdai vaini khrairei, huni tui ly chai nai ne.
23 Elisa ly Jeriko mary i dengdairei Bethela mary mang y chei. Lam y mary harei i deaungdi phyreichi ly theu u i, ni ai panui hai u bo. Nichi my, “Lu kamngai, lu kangbiuliu awi, hi i nai theu vui!” nanai aeu u.
24 Elisa ly alengli iy nichi ai khen kalingie chum baly, Areng i amyn hawi nichi ai pasawi. Naibaly daichi theung mang tavym nu nyhrei theu iy, huni deaungdi leaung 42 reichi ai be piupa bo.
25 Elisa ly Karamela mawi y chei kalau chum baly, Samari mary y vawi ali teang nai ne.