14
Juda samrang Amazia
(2 Neng 25:1-24)
1 Jehoaha i chapo Israela samrang Jehoasa my peang nai pa-nyh saneng y, Joasa i chapo Amazia ly saneng apomphai pangrei awm nai khala y,
2 Juda samrang lawm i, Jerusalem mary y saneng apomphai takawrei peang nai ne. Ni i amhm ly Jerusalem mary i neampachy Jehoadin ne.
3 Amazia ly Areng i kangai sa. Na i py ni ly my i pajo samrang Davida i sa nai kamta so y i, ampo Joasa i sa nai kamta sa nai ne.
4 Ni ly myn chiu nai meingtymchi taphra y nai deaungkho y, khumi mipuichi ly huni meingtymchi ra y, apathyp iy rimuichi patawi u bo.
5 Amazia ly mymy sa thai naira nga phai nga baly, ampo samrang ai padei nai bangtangchi ai padei teang.
6 Na i py hi ly huni khumichi i cho chanauchi ai ly padei y i, “Amhm ampochi ai cho chanauchi i kamngo nai molam y padei moh; cho chanauchi ai py amhm ampochi i kamngo nai molam y padei moh. Khumi ly mymy i sa nai kamngo molam y naini padei ai nai tla,” nanai Mosi i reita cha-iu theung y awm nai Areng i Reita leu pei nai ai teaung patawm nai ne. Ref 14.6: Leu thui 24:16
7 Amazia ly palawi leaunghawira y Edom tavaimi leaung 10,000 reichi ai padei. Ni ly Selah mary py peang vui iy mary amyn py palai vui i, Jothela mary nanai vaini khrairei palau jo nai ne.
8 Naibaly Amazia ly Israela samrang Jehoasa teng y savaichi pato i, mymy hawi tavai atiu ai nai palau.
9 Na i py samrang Jehoasa my, “Vaichi khala Lebanon mawi saleung y aleng keung harei my saitleang keung teng y, ‘nang i chaniu ai kai i chapo teng y deaung paseng ba,’ nanai leu pei. Na i py sahawi mang aleaung nai mawi kasi ly huni aleng keung ai chiu piupa vui bo.
10 Amazia awi, vai nang ly Edom khumichi ai pajau nai deaungkho y, paleung len nai ne. Nangmy i amyn amthang nai hawimy paleung tuinem iy, nangmy i yhm y phai awmnem ba. Nang ly nangmy i khumichi tama hai ai nai patangra ly ati mana nai hau lawh mo?,” nanai leu pathang pi teang bo.
11 Na i py ni i leu ai Amazia ly tangai pi y. Hunai deaungkho y samrang Jehoasa ly my i tavaimichi hawi amsa i, Amazia ai Juda pri Beth Sheme mary y tiu.
12 Amazia i tavaimichi ly tavai sum nai deaungkho y, risa bawibawichi ly mymychi i yhm mang y preang u pawn bo.
13 Jehoasa ly Amazia ai patiu iy Jerusalem mary mang y chei i, Ephraim katheu pa-kho dengdai apai taki tym pa-rei, miu 200 rei taphra vui nai ne.
14 Ni ly my i niu nai ngierei muku, tangka, Achura yhm ateaung ngiereichi hawi vang katengchi la pawn iy, Samari mary y vawi hai bo. Ni ly tavai keung y patiu naichi ai py hawi pawn nai ne.
15 Juda samrang i tavai atiu naira y Jehoasa i vam nai sai hawi, ni i atiti sa naichi ly Israela razavang cha-iu theung y tajiu pi typ nai ne.
16 Jehoasa dei nai khala ni ai ly Samari mary samrangchi i tapreaung y up bo. Naibaly ni i chapo, pa-nyh Jeroboam ly ampo i meingtym amtym i, samrang lawm bo.
Juda samrang Amazia dei nai
(2 Neng 25:25-28)
17 Juda samrang Amazia ly Israela samrang Jehoasa dei nai bo y, saneng holai pangrei heng rai nai ne.
18 Amazia i atiti cheaungkhang sa naichi ly Juda razavang cha-iu theung y tajiu pi typ nai ne.
19 Amazia ly mymy ai kangviu y padei ai nai tau nai leaungsai awm nai deaungkho y, Lakhisa mary mang y preang vui. Na i py ni i paleung ka-echi ly huni mary y hui i, ni ai padei u bo.
20 Ni i veu ai keaungngo tleaung y tang iy syn i, Davida mary samrangchi i tapreaung y heung u nai ne.
21 Naibaly Juda mipuichi ly saneng holai tariurei awm nai chapo Uzia ai samrang palyn u bo.
22 Uzia ly ampo dei nai bo y Ela mary y tiu nai eaung i, palum ali teang nai ne.
Israela samrang pa-nyh Jeroboam
23 Joasa i chapo Juda samrang Amazia i peang nai saneng holai pangrei saneng y Jehoasa i chapo, pa-nyh Jeroboam ly Israela samrang lawm i, Samari mary y saneng 41 tym pa-rei peang nai ne.
24 Ni ly Areng i tlang tleaung y kamngo sa iy, Israela chengchi ai kamngo sa ai nai lam patei pi nai Neba i chapo Jeroboam i hawi y nai lam y abang nai ne.
25 Ni ly tosyh mang y nabaly Hamath mawi aleaung lam, tokalawi mang y nabaly pangli kadei khrairei, vaichi khala i Israela pri khu ka-peang bawibawichi ai peang ali teang bo. Hini ly Israela chengchi i Areng Tameuh my, mymy i miseaung Kath Hepha mary y awm nai Amittai i chapo amo Jona dengdairei, leu pei nai kamta ne. Ref 14.25: Jon 1:1
26 Areng ly Israela chengchi avum nai khri pa-rei ngari patang nai niu bo. Nichi ai sabawm ai nai khumi leaungrei py by y.
27 Na i py Areng ly Israela chengchi ai deungtasarei phra ai nai ngai hai y nai deaungkho y, samrang pa-nyh Jeroboam dengdairei atleu pi bo.
28 Pa-nyh Jeroboam i atiti sa naichi, tavai keung y ni i vam naichi, Damaska mary hawi Hamath mary ai Israela pri khu ka-peang theung y tabawi ali teang pajau nai saichi ai ly Israela razavang cha-iu theung y tajiu pi typ nai ne.
29 Jeroboam dei nai khala ni ai samrangchi i tapreaung y heung u. Naibaly ni i chapo Zekhariah ly ampo i meingtym amtym i, samrang lawm bo.