7
Solomon i samrang yhm sa nai
1 Solomon ly mymy i vui samrang yhm sa i, saneng holai thomrei ateng nai ne.
2-3 Lebanon daichi, napi nai hall ly jeng kasau miu chungvairei, kah kalen miu vuipangrei, tamdo ka-sang miu phairei awm. Huni hallra y saitleang keung yhmmawm holai pangrei ai lam thomrei leng iy, huni yhmmawmra y saitleang pjeng satleang takawp nai ne. Sileng py saitleang pjeng hawi sa.
4 Dengpang nyhrei ra y adengdang nai thaibeng pa-kho lam thomrei awm.
5 Katheu pa-khochi hawi thaibeng pa-khochi ly jeng, kah angeng meaung nai katheu laibeaungchi awm.
6 Yhmtawichi abawi nai hall ly jeng kasau miu vuipangrei, kah kalen miu phairei awm; huni i mo kataw y yhmmawmchi hawi vanrei amphu awm.
7 Solomon i tara chih nai meingtym napi nai samrang atehra hall ly paichi dengdairei katleungchira tym pa-rei saitleang pjengchi hawi pachi nai ne.
8 Tara chih nai meingtym hall nithun mang i apai theung y, Solomon i samrang yhm ly takhra yhmchi kamta sa nai ne. Samrang ly my i aju, Aikupta samrang chaniu i vui py samrang i yhm kamta sa pi teang.Ref 7.8: 1 Areng 3:1
9 Hini yhm bawibawichi ai ly yhm langdeng panui nai dengdairei amphu kup ra tym pa-rei, lengseaung hawi sa nai ne. Huni lengseaungchi ly lengseaung si nai meingtym y pata yb iy si nai ne i, angam mang py, theung mang py raw hawi pangeng typ bo.
10 Yhm langdeng panui nai lengseaungchi ly lengseaung si nai meingtymra y si yb nai lengseaung puichi ne i, phyrei ly jeng miu takawrei, phyrei ly miu horei awm.
11 Lengseaung puichi salo y pata yb nai takhra lengseaungchi, saitleang keung kaleaungchi hawi tleangleang iy sa bo.
12 Samrang yhm apai, Achura Yhm apai hawi Achura Yhm mo i kun nai katheu pa-kho yhm dengpangchi ai py, si yb nai lengseaung thomrei tleangleang chum nai tleirei, saitleang kaleaung ha harei tleangleang iy sa nai ne.
Hiram i sa nai kalop
13 Samrang Solomon ly Turu mary y awm nai kheupaja thip kawp nai kupe kakawp amyn ly Hiram, napi nai khumi ai palau.
14 Dei chum nai ni i ampo py Turu mary y awm nai ne i, kheupaja thip kawp naira y kupe hawi parai nai khumi ne. Ni i amhm ly Naphtali cheng ne. Hiram ly cheng parai i, kalopra y kyh chawn nai khumi ne. Ni ly samrang Solomon my palau iy sa hai nai kamta, kheupaja hawi sa nai kalop ngierei sa pi nai keung ne.
Kheupaja yhmmawm pui nyhrei
(2 Neng 3:15-17)
15 Hiram ly ka-sang miu holai tajarei, ka-hi miu holai nyhrei awm nai kheupaja yhmmawm pui nyhrei sa i, Achura Yhm katheu pa-kho mo y pado bo.
16 Huni yhmmawm pui meaungra y tai ai nai kasau miu pangrei awm nai kheupaja lukhym nyhrei py sa.
17 Yhmmawm meaung tleirei ra py kheupaja hawi sa nai paleu ka-tawm py,
18 kheupaja thaisi athai leng nyhrei hawi py sa nai ne.
19 Yhmmawm meaung lukhymchi ai kasau miu palyhrei awm nai amai pau myn sa iy,
20 paleu myn salo i satleang tleaung y tai. Yhmmawm meaung ha harei ka-kira i thaisi athai leng nyhrei ra y, thaisi athai chungvai nyhrei tai nai ne.
21 Hiram ly kheupaja yhmmawm pui nyhrei ai Achura Yhm katheu pa-kho mo y leng. Harei nai ly tokalawi ngan mang y leng i, Jakinnote 7:21\xk Jakin: Hebrai leung y “Tameuh my sa” nanai sai ne. \x*nanai amyn pathi; harei nai ly tosyh ngan mang y leng i, Bozanote 7:21\xk Boza: Hebrai leu y “Tameuh i atho y” nanai sai ne. \x*nanai amyn pathi bo.
22 Huni yhmmawm pui nyhrei meaungra y amai pau mynchi tai nai ne.
Naibaly huni yhmmawm pui sa nai kalop ly pajau bo.
Kheupaja tuikan
(2 Neng 4:2-5)
23 Hiram ly kathiu miu pangrei, kakau miu horei, ka-hi miu phairei awm nai kheupaja tuikan sa.
24 Tuikan i angam mang teng kamkira y kheupaja hawi sa nai an-um athai myn lam nyhrei ai, tuikan pui hawi tabiri iy sa.
25 Huni tuikan ly angam mang y mo tha hai nai kheupaja si katai myn holai nyhrei salo y panui nai ne. Si katai thom thomrei ai tosyh, tokalawi, nidym, nisi mang y mo tha hai bo.
26 Tuikan i katho ly bi-thomrei awm; salo i tavai ly rahum tavai kamta, amai pau angdai nai hawi atawm. Huni tuikanra y tui beung 2,500 rei avai nai ne.
Kiu hawi nui nai kheupaja ka-richi
27 Hiram ly kiu hawi nui nai kheupaja ka-ri horei py sa. Huni ka-richi ly jeng miu palyhrei, kah miu palyhrei, ka-sang miu thomrei awm riri nai ne.
28 Hunichi ai jeng, kah kangngeng amhi mawichi hawi sa bo.
29 Huni amhi mawichira y khrangsi myn, si katai myn hawi kheruben mynchi sa; khrangsi mynchi hawi si katai mynchi i salo mang py, anui mang py awm nai kawichi salo y, seaunglawi mynchi o-pangen nai ka-puchi sa.
30 Ka-ri hareira y kheupaja hawi sa nai amlira kheu palyhrei hawi, kheupaja kaleaungchi py tai; ka-ri i taki palyhrei ra y rahum khai ai nai i vui y, kheupaja tawira palyh awm. Huni tawirachi py seaunglawi mynchi thiu iy, ka-pu sa pi nai ne.
31 Rahum khai ai nai i vui y yhmtawi meaungchi ra y tarai myn kamta kawichi sa. Huni kawi ly ka-ri tleaung y miurei asang i, ka-ri theung mang y peu nyhrei kamta kun bo. Huni i ka-ki ra py mynchi thiu prei nai ne.
32 Amlira kheuchi ly kiupui bikha holai pangrei asang bawibawi i, amhi mawi anui y khai bo. Kaleaungchi py ka-ri hawi tabimei nai ne.
33 Amlira kheuchi ly ka-ri amlira kheuchi hawi atawm iy kaleaungchi, katyhchi, tawirachi, mawmrachi ai kheupaja hawi sa.
34 Ka-ri yhm anui mang i taki palyhreira y, ka-ri hawi patawm prei iy sa nai tawi palyhrei awm.
35 Ka-richi i salo mang y ly katho ka-rei awm nai kheupaja katyh hawi mawm typ bo. Tawichi hawi amhi mawichi ai ka-ri hawi tabimei nai ne.
36 Tawichi hawi amhi mawichira y avai nai ryrei ly kheruben myn, khrangsi myn, olive keung mynchi hawi, teng ka-ki seaunglawi mawi mynchi thiu iy ka-pu sa.
37 Hini ly kiu hawi nui nai ka-richi sa nai sai ne. Huni ka-ri bawibawichi ly katheang kalen angeng riri.
38 Hiram ly ka-ri harei y rahum pui harei, rahum pui horei sa. Angdeung harei i kangdai kakau ly miu palyhrei awm; hunira y tui palang 1,200 rei chei.Ref 7.38: Theu 30:17-21
39 Hiram ly Achura Yhm tokalawi ngan mang y ka-ri pangrei, tosyh ngan mang y ka-ri pangrei khai iy, tuikan ai ly Achura Yhm i nisi tokalawi taki y khai nai ne.
Achura Yhm i ateaung alang vuikanai
(2 Neng 4:11-5:1)
40-45 Hiram ly laawmchi, khaileaung chawnchi, khauchi py sa. Ni ly Areng i vui samrang Solomon my sa hai nai ngiereichi angym pa-rei sa bo. Ni i sa nai ateaung alangchi ly:
Yhmmawm kalen nyhrei
Rahum kamta yhmmawm meaung mymra nyhrei
Yhmmawm meaung mymra i vui thunchengchi
Thuncheng ka-ki tai ai nai chungvairei riri awm nai thaisi leng nyhrei i vui, thaisi athai chungvai palyhrei
Kiu hawi nui nai ka-ri horei
Rahum pui horei
Tuikan harei
Tuikan panuira si katai myn holai nyhrei hawi laawmchi, khaileaung chawnchi, khauchi ne.
Achura Yhm y teaung ai nai samrang Solomon i vui Hiram my sa pi nai hini ateaung alangchi ly kheupaja hawi an paleaung nai ne.
46 Samrang ly Jordan tavo leaunghawira awm nai Sukkoth mary hawi Zarethan mary sala i kheupaja an patlawn nai meingtym y, huni ateaung alangchi sa nai ne.
47 Huni ateaung alangchi ly khri pa-rei nawi nai deaungkho y, kaji neh y naimy khai bo. Huna nai y hunichi i kaji ly pany pajau y.
48 Solomon ly Achura Yhm i vui muku ateaungchi py sa hai nai ne. Hunichi ly maicham, Tameuh i vui tako khaira sabawi,Ref 7.48: Theu 25:23-30, 30:1-3
49 khri pa-rei chai nai meingtym mo i lamtang mang y khai nai maisi yhm pangrei hawi langvawi mang y khai nai maisi yhm pangrei, muku kaseaung pauchi, muku maisi yhm, muku hawi sa nai mai syn nai ateaungchi, Ref 7.49: Theu 25:31-40
50 muku khauchi, muku tangkeihchi, muku samtangchi, muku chawnchi, maidym khai nai muku laawmchi, Achura Yhm theung i chai keh nai meingtym katheuchi hawi Achura Yhm angam mang katheuchi i vui muku angtleangrachi ne.
51 Samrang Solomon ly Achura Yhm i vui sa ai awm nai kalopchi sa chum baly, Areng teng y ampo Davida my talam yb nai muku, tangka hawi takhra vawnsaichi ai Achura Yhm vawnsai khaira takunchira y kryme nai ne.