6
Solomon ly Achura Yhm sa nai
1 Israela chengchi Aikupta pri i dengdairei theu u nai saneng chungvai palyh pa-ngo vui tajarei awm nai khala y, Israela samrang Solomon ly samrang lyn nai palyh saneng, Zipha napi nai pa-nyh lo y Achura Yhm sa amtheaung bo.
2 Huni Achura Yhm i angtheung ly jeng kasau miu vui tariurei, kah kalen miu apomrei, tamdo ka-sang miu phairei awm.
3 Mo mang i dangkhung py Achura Yhm kamta jeng kasau miu horei, kah kalen miu apomrei awm.
4 Achura yhm dengpangchira y thaibeng pa-khochi awm iy, hunichi angam mang ly theung mang i tleaung y pa-kho amchei nai ne.
5 Achura Yhm angam mang angpang phei nyhrei hawi nithun mang dengpangra tabi typ iy, takunchi sa; huni takunchi ly paichi thomrei awm iy sambeu ha harei ly tamdo ka-sang miu pangrei awm.
6 Anui keh i sambeu takunchi ly kah miu pangrei awm; sala i sambeu takunchi ly miu tariurei riri awm, salo keh sambeu i takunchi ly miu saryhrei riri awm nai ne. Huni takunchi sa naira y tapangchi ly angpang ai kho so y naimy angpang salo y panui iy, sa thai ai nai Achura Yhm dengpangchi ai salo i sambeura y ly anui i sambeu tleaung y kangpo sa nai ne.
7 Achura yhm sa naira y teaung nai lengseaungchi ly lengseaung angawmra y si yb iy syn nai deaungkho y, Achura Yhm sa nai thym khala y saki, atiu napi nai tamo ateaungchi hawi atum nai katynchi ly thai y leang bo.
8 Anui keh i takunchy kunra ly Achura Yhm tokalawi mang y awm; pa-nyh hawi pa-thom sambeuchira lyn ai nai khaileichi thei.
9 Achura Yhm cheang nai khala Solomon ly saitleang keung tapangchi, pjengchi hawi ceiling sa u bo.
10 Takunchy harei ly miu pangrei asang iy sambeu thomrei awm nai takunchychi ai, Achura Yhm angam mang i dengpangchi hawi tabi typ iy sa nai bo baly, saitleang keung tapangchi hawi patawm rau nai ne.
11 Areng my Solomon teng y,
12 “Nang ly kai i reitachi hawi leu pei naichi tangai baly ngampo Davida teng y kai i adeu nai kamta, nang i vui kang sa pi ai.
13 Nang i sa nai Achura Yhm theung y hawi, kai i khumi Israela chengchi theung y py, kai awm ai ,” napi.
14 Hunai deaungkho y Solomon ly Achura Yhm cheang pa-rei sa bo.
Achura Yhm theung y ka-pu sa nai
(2 Neng 3:8-14)
15 Achura Yhm angtheung dengpangchi ai ly paichi dengdai ceiling y tym pa-rei, saitleang pjengchi hawi mawn typ iy paichi ai ly maicha pjengchi hawi pachi typ nai ne.
16 Khri pa-rei chai parai nai meingtym, napi nai Achura Yhm takun ly jeng kasau miu apomrei awm iy, huni ai saitleang pjengchi hawi paichi dengdairei ceilingra tym pa-rei tapang bo.Ref 6.16: Theu 26:33-34
17 Khri pa-rei chai keh nai mo i takun ly jeng miu vui palyhrei awm.
18 Saitleang pjengchira y an-um athai mynchi hawi kaseaung pau mynchi thiu iy, ka-pu sa nai ne. Lengseaung dengpangchi ai niu pajau y ai nai Achura Yhm theung mang ngierei ly saitleang pjengchi hawi tapang typ vui nai ne.
19 Areng i Leu Maikawm Pawn khai ai nai ly Achura Yhm angtheung nithun mang y takun sa.
20 Huni takun ly jeng kasau miu apomrei, kah kalen miu apomrei, tamdo ka-sang miu apomrei awm iy, muku tangcheng hawi paleaung hai typ bo. Maicham ai ly saitleang pjeng hawi sa nai ne.
21 Achura Yhm theung mang y muku hawi paleaung typ iy, muku paleaung typ nai theung mang i takun pa-khora y muku leangchi bang nai ne.
22 Achura Yhm theung mang ngierei hawi khri pa-rei chai keh nai meingtymra i maicham ai py muku hawi paleaung typ bo. Ref 6.22: Theu 30:1-3
23 Olive keung hawi sa iy ka-sang miu horei awm riri nai kheruben nyhrei ai, khri pa-rei chai keh nai meingtymra y khai bo. Ref 6.23-28: Theu 25:18-20
24-26 Huni kheruben nyhrei ly atawm riri nai ne. Huni ly kasau miu pangrei awm nai pakhi nyhrei awm riri iy, pakhi kadeaung harei dengdai nai pakhi kadeaung harei y tym pa-rei ly miu horei awm.
27 Kheruben nini i kadai nai pakhi nyhrei ly dengpangchi hawi abi naimy awm ai nai kheruben nyhrei ai khri pa-rei chai keh nai meingtymra y khai nai ne.
28 Pakhi nyhrei awm nai kheruben nini ai muku hawi paleaung typ bo.
29 Achura Yhm takun pui angpang hawi takun dengpangchi ai kheruben mynchi, olive keung hawi kaseaung pau mynchi thiu iy ka-pu sa bo.
30 Angsaveaung paichi ai py muku hawi paleaung typ nai ne.
31 Khri pa-rei chai keh nai meingtym i katheu pa-khora y ly olive keung hawi thengkheaung katheu dawn nyhrei sa; katheu lukau ly takuideung bo.
32 Katheu dawnchira y kheruben mynchi, olive keung hawi kaseaung pau mynchi thiu nai ne. Katheu dawnchi, kheruben mynchi, olive keung hawi kaseaung pau mynchi ai muku hawi paleaung typ bo.
33 Achura Yhm katheu pa-kho i vui tamdo ka-sang, kah kalen taki palyhrei ahyh khyp nai katheu laibeaung ai olive keung hawi takuideung bo.
34 Tlip typ ai nga nai katheu dawn nyhrei ai maicha pjeng hawi sa chum baly,
35 kheruben mynchi, olive keung hawi kaseaung pau mynchi thiu iy muku hawi paleaung typ bo.
36 Achura Yhm mo mang y theung mang i apai ly si yb nai lengseaung tlen thomrei tleangleang iy saitleang pjeng kaleaung harei tleangleang riri nai tapang aki prei bo.
37 Samrang Solomon i peang nai palyh saneng, Zipha napi nai pa-nyh lo tleaung y Achura Yhm langdeng pala.
38 Samrang Solomon i peang nai saneng holai harei, Bula napi nai taja lo tleaung y dawn pasym yb nai kamta, sai py takhawi y pa-rei sa i cheang bo. Achura Yhm sa nai ly saneng saryhrei ateng nai ne.