20
Abyhra marychi
(Kati 35:9-34)
1 Naibaly Areng ly Josua teng i dengdairei, Ref 20.1-9: Kati 35.9-34; Leu thui 4.41-43, 19.1-13
2 Israela chengchi teng y, “Kai ly Mosi molam y leu pei nai kamta, abyhra marychi vawi takhra u.
3 Khumi leaungrei ai padei takengkei ai nai ka-dawn hawi ny y naimy, padei vui lawh nai khumi ly vawitheung tha teang ai nai khumi kiu i tleaung ai nai, huni marychi ra y abyh hai ai nai tla.
4 Ni ly huni marychi theung i mary ha harei mang y preang iy, mary katheu pa-khora awm nai tara chih naira meingtym mang y chei iy, mary i miteaung kehchi teng y, sa nai saichi thui pi pachai ai nai tla. Naibaly miteaung kehchi my, huni khumi ai mary theung y kun ai nai pei iy, ni i vui awmra meingtym dawn pi ai nai tla.
5 Vawitheung tha ai nai hui nai khumi huni meingtym y tym lawh baly, mary i khumichi my preang nai y abyh nai khumi ai, huni khumi teng y au ai nai avo y. Ni ly my i amjo amnau hawi ka-jo ka-thui by y i py, padei takengkei ai nai ka-dawn hawi ny y naimy padei lawh nai deaungkho y, ni ai padei teang ai nai avo y, ama hai ai nai tla.
6 Ni ly khumi bawibawichi i mo y tara chih pajau nai pa-rei ly huni mary y awm ai nai tla ai. Padei tamang nai neng khala i, pathyp pi nai keung kalen keh lawm nai keung dei chum khala naini, ni ly my i awm nai mary y vawi teang pajau,” nanai leu pei bo.
7 Hunai deaungkho y nichi ly Jordan tavo nidym mang y Naphtali mawi aheung i, Hebron marychi ai abyhra marychi palawn iy, vawi u takhra bo.
8 Jordan tavo nisi mang, Jeriko mary nisi Ruben khu ka-peang mawi ka-sang daichi ka-vymra i Bezar mary, Kad khu ka-peang Kilead khura i Ramoth mary, Manase i khu ka-peang Bashan khura i Kolan marychi ai abyhra marychi palawn iy, vawi u takhra bo.
9 Israela cheng py ne sy, ni hawi vanrei awm nai cheng takhra khumi py ne sy, padei takengkei ai nai ka-dawn hawi ny y naimy, khumi leaungrei ai padei nai khumi ly vawitheung tha teang ai nai khumi kiu i tleaung ai nai hawi, ni ai tara chih y rai khala padei vui y ai nai, hini marychi ai abyhra marychi palawn iy, vawi takhra u nai ne.