14
Jordan tavo nidym mang khu ka-peang phy pi nai
1 Jordan tavo nidym mang y awm nai Kanan pri ai Israela chengchi teng y phy paji pi nai thui pi ai. Pathyp pi nai keung Elaza, Num i chapo Josua hawi Israela theaungchi i yhm dengtheung lu sa naichi my, Israela chengchi teng y huni pri ai phy paji pi bo.
2 Areng my Mosi teng y leu pei nai kamta, Jordan tavo nidym mang y awm nai khu ka-peang ai, Israela theaung takawrei hawi theaung ka-hyhreichi ai tambe va iy phy pi nai ne.Ref 14.2: Kati 26.52-56, 34.13
3-4 Mosi ly Jordan tavo nisi mang y awm nai khu ka-peang ai, Israela theaung nyhrei hawi theaung ka-hyhreichi teng y phy pi chum bo. (Josepha i kangpreangchi ai Manase theaung hawi Ephraim theaung, nanai nyhrei khawi takhra bo.) Mosi ly Levi theaung ai khu ka-peang phy pi y leang. Na i py nichi awm ai nai marychi hawi vanrei, tawnbawichi i vui sui tlaira naini phy pi nai ne.Ref 14.3-4: Kati 32.33, 34.14-15; Leu thui3.12-17
5 Areng ly Mosi teng y leu pei nai kamta, Israela chengchi ly khu ka-peang aphy u bo.
Kaleb ai Hebron mary phy paji pi nai
6 Kanirei nai khala Juda theaung phyreichi ly Kilakala mary y awm nai Josua teng y tym u bo. Nichi theung i Kenizi cheng jephonneh i chapo Kaleb my Josua teng y, “Kadesabana meingtym y Areng ly mymy i miseaung Mosi teng y, nang hawi kai i molam y leu pei nai nang pany ai.Ref 14.7: Kati13.1-30
7 Areng i miseaung Mosi ly kai ai hini pri khen paviu ai nai Kadesabana meingtym i dengdairei pato nai khala, kai ly saneng vui palyhrei awm. Kai ly satang kateng amti pi nai ne.Ref 14.7: Kati13.1-30
8 Kai hawi vanrei chei nai khumichi my ly khumichi jei hyn hai ai nai amti pi. Na i py kai ly kai i Areng Tameuh i leu pei nai ai ati sai py takhawi y naimy amti pi nai deaungkho y,
9 Mosi my, ‘Nang i amchyn nai khaileaung ly nang hawi nang i cho chanauchi teng y khu ka-peang phy nga hai takengkei ai,’ nanai adeu bo. Ref 14.9: Kati 14.24
10 Areng ly Mosi teng y huna nai leu pei nai ly saneng vuipalyh pa-ngo saneng pangrei awm na bo. Huni neng khala, Israela chengchi ly daichi ka-vym y amki u nai ne. Areng ly adeu nai kamta, kai ai vaini khrairei heng ai nai ang pei bo. Kai ly saneng vuitaja takaw saneng pangrei awm bo.
11 Na i py Mosi my kai ai hini pri khen paviu ai nai pato nai neng khala i kamta, vai i neng khala py, kai ly atho awm rai. Kai ly tavaimi kalop sa ai nai py atho awm rai.
12 Hunai deaungkho y kai i ahawichi my satang amti pi nai kani y, Areng my pei ai, nanai adeu nai hini mawi aheung meingtym ly kai ai pei ba. Huni meingtym y tlum tlang len nai Anakim cheng ly khaw parai nai mary apaichi theung y awm u, nanai kaichi my amti pi bo. Na i py Areng ly kai hawi vanrei awm baly mymy i adeu nai kamta, kai ly tiu iy patheu pawn pajau ai, nanai takeng bo.
13 Huna nai khala Josua ly jephonneh i chapo Kaleb ai amtheaung hai iy, Hebron mary ai phy paji pi bo.
14 Kenizi cheng jephonneh i chapo Kaleb ly Israela chengchi i Areng Tameuh my leu pei nai ai, ati sai py takhawi y naimy tangai nai deaungkho y, ni i kangpreangchi ly Hebron mary ai vaini khrairei amtym u bo.
15 Hebron mary i amyn ka-reu ly Ahba mary nanai palau bo. (Ahba ly Anakim chengchi i miteaungkeh ne.)
Huni bo y pri ly tlamsa naimy awm bo.