5
Jerusalem mary i kamngo
1 Jerusalem mary i khumichi awi, nangmychi i lamchira y chei u!
Tengpang sahawi y hau u! Adawn pasym u!
Seng mang y chei iy hau u!
Kahawi sa nai khumi,
Tameuh i tlang tleaung y ka-ym awm ai nai atho sa nai
khumi leaungrei niu pajau na a?
Huni khumi ai nang avum lawh teu baly, Areng ly Jerusalem mary i kamngo lawi hai ai.
2 Nangchi my, Areng ly heng nai ne, nanai vaineng abeu u teu i py,
nangchi ly teng y nai vaineng abeu u nai ne.
3 Areng ly ka-ym awm nai ai ngai nai ne.
Mymy ly nangchi ai pajeng teu i py, nangchi ly dawndan u y.
Taphra i py thui parip nai nangchi ly tangai u y.
Nangchi i paleung ly lengseaung tleaung py tang u i, uikheih y.
4 Hunaibaly kaimy, hinichi ly khumi kamawnchi ne.
Dawn pany thai y nai khumichi ly
Areng i kangai py, Tameuh i khai pi nai Reitachi py,
pany u y nai deaungkho y hawi y naira sa u nai ne.
5 Kai ly sa thai naira awm nai khumichi teng y chei iy,
nichi teng y thui pi ai.
Nichi ly Areng i kangai pany u ai.
Tameuh i khai pi yb nai reitachi pany u nai ne,” nanai adawn u bo.
Na i py nichi bawibawi ly Areng i sa thai naira
khai su iy leu atangai u y nai ne.
6 Huna nai deaungkho y daichi mang i khrangsichi ly nichi ai kei u ai.
Khutaha daichi ka-vym i kasuichi ly nichi ai keileu keileu ai.
Takai kheangchi py nichi i marychi sahawi y o iy,
mary angam mang y theu nai khumi ngiereichi ai keileu keileu pawn ai.
Ati mana nai mo nabaly huni khumichi ly kamngo nawi nai khyh chang y i,
Tameuh ai avaw avawrei nithun thun u nai deaungkho y ne.
7 Areng my, “Kai ly kaimy i khumichi i kamngochi ati mana nai y kapahen ai mo?
Nichi i cho chanauchi ly kai ai khai su iy,
tameuh ka-chawichi i amyn y tau iy vaineng abeu u bo.
Kai ly kaimy i khumichi ai
kajeu kawi pa-rei kapacho teu i py,
nichi ly ami i yhm hlau taphra iy, bimachi hawi tamang u bo.
8 Nichi ly kajeu kawi iy po chiu nai keaungngo kasichi kamta,
hang naimy yhm deaungpachi i ajuchi ai ngai tahau nai ne.
9 Hina naichi molam y kai ly nichi i tlang tleaung y, pajeng y naimy awm ai nai avo na a?
Hina nai mipuichi ai vawitheung tha y naimy awm ai nai avo na a?
10 Kai ly paleung ka-echi ai kapato iy, nichi i kreip akhochi taphra hai ai.
Na i py kreip keungchi myh pa-rei ly taphra hai ai ny y.
Kreip changpichi ly kaimy peang y nai deaungkho y,
hunichi ateng pawn ai nai paleung ka-echi teng y kaimy leu pei ai.
11 Israela hawi Juda mipuichi ly
kai i leu pipi tangai u y.
Hini ly kai, Areng my thui nai leu ne, napi.
Areng my Israela ai khai su nai
12 Areng i khumichi ly mymy i satang tengtang y naimy thui u nai ne. Nichi my, “Mymy ly ati sai py ang dawn hai ai ny y. Achi py ngari kamtang avum u ai ny y. Tavai ka-jeira hawi takang py avum ai ny y,” nanai thui u.
13 Nichi my, “Amochi i leu ly ali cheichei teu; nichi thui ai nai Areng i leu pei nai ati sai py by y leang. Nichi i thui nai kamta nichi teng y tym sy,” napi u.
14 Ati cheaungkhang sa thai nai keung Areng Tameuh my, “Jeremia awi, huni khumichi ly hina nai thui nai deaungkho y, kai i leu ly nang i labeaung y mai kamta lawm iy, nichi ly theng kamta lawm ai; mai ly nichi ai kang ai,” napi.
15 Areng my Israela mipuichi teng y, “Kai ly nangchi ai tiu hai ai nai pri kamlora i khumi kamkawm harei kang hawi ai. Nichi ly atho len iy jangni jangkhawn i khumi cheng, nangchi pany thai y nai leu katheu nai khumi cheng ne.
16 Nichi i thailiho pa nai khumichi ly atho len iy, am-eaung jo nai tapreaung angawm kamta, pany y naimy padei u reng nai ne.
17 Nichi ly nangchi i thengthaichi hawi teicha teineichi cha nei iy, nangchi i cho chanauchi ai tleh u ai. Nichi ly nangchi i beram kanghu hawi si kanghuchi cha u ai. Nangchi i kreip keungchi hawi thaidu keungchi taphra pawn ai. Nichi i tavaimi kamkawm ly nangchi i a-ym nai amtangra mary kakhawchi taphra pi pawn ai.”
18 Areng my, “Huni neng kanichi khala malawn py, kai i khumichi ai katamyh be ai ny y.
19 Jeremia awi, Huni khumichi ly nang teng y, ‘Ati mana nai y Areng ly hina naichi sa lawh mo,’ nanai ang deng u ai. Naibaly nichi teng y, ‘Nangchi ly Tameuh ai khai su iy, nangmychi i pri y my cheng takhra tameuhchi i kalop sa pi u lawh. Hunai deaungkho y pri takhra mang y, cheng takhrachi i kalop sa pi ai nai tla ai,’ nanai pathang pi,” napi.
Areng my mymy i khumichi ai pany hai pi nai
20 Areng my, Jakob i kangpreang hawi Juda mipuichi teng y thui pi:
21 Mei awm ta-jai iy niu thai y, kano awm ta-jai iy thai y nai khumi, nangchi khumi ka-khumchi awi, tangai u.Ref 5.21: Is 6:9-10; Ezek 12:2; Mk 8:18
22 Kai ly Areng ne. Nangchi ly ati mana nai y kai ai jei u y nai mo? Kai i mo y ati mana nai y kaso theu u y mo? Kai ly pangli i vui khujyh, pangli tui sadawn pajau y ai nai khujyh kakhaw ly speungchi hawi jyh pi nai ne. Pangli ly tui sampyh len teu i py, huni khujyh ai ly sadawn pajau y. Tui sampyhchi ly amsau na teu i py, huni khujyh katlen pajau y nai neRef 5.22: Job 38:8-11 .
23 Na i py nangchi khumi mipuichi awi, nangchi ly paleung tang iy tiu ai nai lam amphri vui i, kai teng i nai theu u veng bo.
24 Neng tleirei khuma kani hawi, kangkhym kani nai hai iy saneng tleirei, amti amjang pakym achu ai nai neng sa pi nai keung kai ai nangchi ly tahm khai u vai y.
25 Nangchi i sa tamang nai hawi kamngochi my ly amtheaung nairachi paka vui iy, nangchi teng i nai amphri hai veng bo.
26 “Kai i khumichi theung y khumi hawi y naichi awm. Nichi ly deaung hawi tavochi ai patym nai khumichi kamta, khumichi ai patiu ai nai amo u yb bo.
27 Mawi sara ly my i tavo theaungra y tavochi kawi hai nai kamta, huni khumichi ly mychi i yhmchira y, atiura i nga nai vawnsaichi hawi kawi hai bo. Hunai deaungkho y nichi ly sa thai naira awm iy nang chawn u nai ne.
28 Bym pa-rei cha ai nai nga iy veung py hawi u bo. Nichi ly hawi y naichi ai tem-ma by y pa-rei sa u nai ne. Nuro nukaichochi ai nichi i nga ai avo nai phychi py pei pi y. Pahyp y naimy ana naira avum naichi ai py, adyh adawi hai y.
29 “Na i py hini atitichi molam y nichi ai kai, Areng my pajeng ai. Hini khumichi ai kaimy vawitheung katha ai.
30 Huni pri y lyh ai awm iy amso ngai ai hawi naichi tym nai ly
31 amochi ly leu kateng thui u y; pathyp pi nai keungchi ly amo my leu pei nai kamta peang u bo. Kai i khumichi my py hina nai sa naichi ai ei u y. Na i py nichi ly kangkhym kani y ati sa u ai mo?”