48
Moba pri ai taphra nai
1 Moba pri molam y ati cheaungkhang sa thai nai keung Areng i leu pei nai ly hina nai ne:Ref 48:1-47: Is 15:1—16:14, 25:10-12; Ezek 25:8-11; Amo 2:1-3; Zep 2:8-11
Nebo mary i khumichi ai palau u;
nichi i mary ly phra veng bo!
Kiriathaim mary ai ly tiu iy la vui bo i,
huni mary i amtangrachi ly taphra vui nai y,
mary i khumichi ly kangji nga u nai ne.
2 Moba pri i phum-ang ly tama veng bo.
Paleung ka-echi ly Hesabon mary peang vui iy,
Moba pri ai tamyh vui ai nai tau u nai ne.
Madmanah mary ly tyn kryh y naimy awm ai.
Tavaimi risachi ly huni mary y tavai tiu u ai.
3 Horonam mary i khumichi my,
‘Khrukhra naira! Tamyh naira!,’ nanai aeu u bo.
4 “Moba pri ly phra veng bo;
cho deaungdichi i vo hang nai raawi tangai u.
5 Luhith mawi akham lam jeungrei y
nichi i vo sang-eng nai katyn hawi,
Horonam mary mang y satla nai angthiu lam jeungrei y,
paleung bi naimy aeu nai raawichi py tangai u.
6 Nichi my, ‘Nangchi tleaung u ai nai angpreng u kaliki!
‘Khutaha daichi ka-vymra i keaungngo kano kasau karam kamta angpreng u!,’ nanai thui u bo.
7 “Moba pri awi, nang ly nangmy i atho hawi nang chawn nai ai a-ym nai ne.
Na i py vai nang ly sum naira avum ai.
Nang i tameuh Khemosa py, ni i samrang chapochi hawi
pathyp pi nai keungchi raurei, pri pala naira avum u ai.
8 Mani mary py taphra naira i nai tleaung ai ny y;
leaunghawi py, adym py phra mei ai.
Hini ly kai, Areng i thui nai leu ne.
9 Moba pri i vui tapreaung leungcheng leng u;
Huni pri ly kra y nai sala y phra ai.
Huni pri i marychi ly phra iy,
khumi angso savai tlang naira lawm ai,”
10 (Areng i kalop ai paleung hawi verei so y nai khumi ly amsawi lawi kalei sy! Mymy i haisau hawi tleh iy padei y nai khumi ly amsawi lawi kalei sy!)
Moba marychi phra nai
11 Areng my, “Moba pri i khumichi ly chymme naimy awm jo reng nai deaungkho y, pri pala naira avum u vai y nai ne. Moba pri ly laawm harei i nai laawm harei mang y patlai y; tahawi py tahawi y iy angdeang jo nai kreip hang hawi atawm; mui hawi kalum kathau phra y naimy, hawi veangveang nai ne.
12 “Hunai deaungkho y Moba pri ai kreip hang kamta lai vui nai khumichi ai, kaimy pato nai neng ang tym ai. Nichi ly huni pri i kreip hang chy-ychi lai vui iy, dei lawm na pa-rei pakhau piu ai.
13 Huna nai khala, mychi ym u nai Bethela tameuh ai Israela chengchi my paleung phra u nai kamta, Moba pri khumichi ly mychi i Khemosa tameuh ai paleaung phra u ai.
14 Moba neampachochi awi, nangchi ly ati mana nai y nangmychi kypkyp ai
khumi soraichi, tavai keung i soraichi, nanai thui u lawh mo?
15 Moba pri hawi marychi ly phra iy
nichi i vui vawi patyp nai thawndeang deaungdichi ly tleh naira avum u ai.
Kai ly ati cheaungkhang sa thai nai keung, napi nai samrang ne.
Huni ly kai i thui nai leu ne.
16 Moba pri i taham kasi ly kasa dudu bo i,
huni pri phra seaungkhrang ai nai neng ly kra y naimy tym ai.
17 “Tengpang sahawi y awm nai khumichi awi, huni pri i vui vo tangam u;
Huni pri i amyn amthang nai pany nai khumi bawibawichi awi,
khri pa-rei sa thai naira awm nai hini pri ly anawi seaungkhrang iy,
huni i phum-ang hawi sa thai naira ly jum veng bo,’ nanai thui u.
18 Dibon mary y awm nai khumichi awi,
nangchi ly tahm awm nai meingtym i nai satla iy,
spryh tleaung y ateh u.
Moba pri ai phra hai nai keung ly hini meingtym y tym iy,
nang i amtangrachi taphra veng bo.
19 Aroh mary y awm nai khumichi awi,
lam teng mang y angdo iy ajeng jo ly
preang nai khumichi teng y
atiti tym naichi deng cham.
20 Huni khumichi my, ‘Moba pri ly phra veng bo,’
‘Huni pri i vui vo u; huni pri ly kangji nga nai ne.
Moba pri ly phra veng bo!, nanai satang ly
Arnon tavo jeungrei aeu u,’ nanai pathang u ali teang ai.
21 “Holon mary, Jahaz mary, Miphet mary,
22 Dibon mary, Nebo mary, Beth Diblathaim mary,
23 Kiriathaim mary, Betkamula mary, Betmeon mary,
24 Kerijo mary hawi Bozarah mary napi nai mawi aheung adym y awm nai mary bawibawichi ly pajeng naira avum u bo. Kamlo kang sa i Moba mary ngiereichi py, pajeng naira avum u nai ne.
25 Moba pri i sa thai naira ly jum veng bo. Hini ly kai Areng i thui nai leu ne,” napi.
Moba pri i amlyh am-e nai ai panem vui nai
26 Areng my, “Moba pri ly kai Areng ai tiu nai deaungkho y, huni pri ai pavui hai u. Ni ly my i amleura y jawn tlawntlan ai. Khumichi my py ni ai panui hai ai.
27 Aw Moba pri, Israela pri khumichi ai nangmy mana tanrei panui hai mo, nanai pany jo ba. Nang ly nichi ai kangviu sara, damra kamkawm hawi vanrei patiu nai palawn iy ana nai ne.
28 “Moba khumichi awi, nangchi ly nangmychi mary i nai theu u! Tahi tangam mang y chei ly awm u! Amkeu sala y tabu sa reng nai apryn buhuchi kamta so u.
29 Moba pri ly khri pa-rei amlyh am-e parai. Khumichi ly mana tanrei paleung len iy, khumi aniu y naimy amlyh am-e u nai py, mana tanrei amy i vui hau khyh na mo, nanai py kai pany nai ne.
30 Nichi i amlyh naichi ly atira y py tym y; nichi i sa naichi py akan y. Nichi i amlyh am-e nai py kai, Areng pany.
31 Hunai deaungkho y kai ly Moba pri khumi bawibawichi hawi, Kir Here mary i khumichi i vui meikatui tla ai.
32 Jaza mary i khumichi i vui vo hai nai tleaung y, Sibmah mary i khumichi i vui y kai ly kavo ai. Aw Sibmah mary, nang ly pangli kadei ai katlen prei iy, Jaza mary y tym pa-rei amjang nanai kreip keung hawi atawm. Na i py vai, nang i nisa thengthai athaichi hawi, kreip keungchi ly phra be veng bo.
33 Amti amjang thawn nai Moba pri i amo theu naira ly vym pi veng bo. Kreip athai ati nai angawmra i kreip hangchi leaung y leang bo. Kreip athai ati iy amo theu aeu nai khumi py, leaungrei py by y leang bo.
34 “Hesabon mary hawi Elealeh maryra i khumichi vo nai raawi ly Jaha mary y tym pa-rei thai u nai ne. Huni raawi ly Zorath mary, Horonam mary hawi Ekala mary i dengdairei py thai pajau. Nimarim micheaung tui py kang veng bo.
35 Kai ly Moba pri khumichi ai mawi saleungchira y leng patlum nai kapathyprachi talam nai hawi, mychi i tameuhchi teng y apathyp naichi anawn hai ai. Hini ly ka,i Areng i thui nai leu ne.
36 “Hunai deaungkho y Moba khumichi hawi Kir Here mary i khumichi ly mychi i nang nai yhmtheaung katuichi chau pawn nai y, kai i paleung ly si tlaiveu keung y khulym ai byhlyh eng nai khumi kamta, huni khumichi i vui y vo tangam ai.
37 Khumi luteng ly sam hawi labeaung mui avau u bo. Nichi ly mychi i kiubanchira tamo ajyn iy, paisiu kanih apam u bo.
38 Moba pri i yhm amphu ngierei salo y py, khumichi amkheng achu nai khaileaung ka-ho tleireira py, vo tangam u nai ny y baly takhra ati sai py niu y. Ati mana nai mo nabaly kai ly teaung ai ngo y nai chy-y ai pakawi piu nai kamta, Moba pri ai taphra vui nai deaungkho y ne.
39 Moba pri ly anawi jawn veng bo! Vo tangam jau! Moba pri ly tahm by y leang bo. Huni pri ly phra seaungkhrang nai deaungkho y, tengpang sahawi i khumi bawibawichi ly huni ai panui hai u bo. Hini ly kai, Areng i thui nai leu ne,” napi.
Moba pri i vui tleaung ai nai lam by y
40 Pakhichi kadai nai ahmtlau kamta, paleung ka-echi ly Moba pri tlang tleaung y ni kathiu ai, nanai Areng my leu pei yb bo.
41 Marychi hawi amtangrachi ai ly peang vui ai. Huni kani y Moba tavaimichi ly deaungdi tapen ai nai achai nai neampachy kamta, jei hyn u ai.
42 Moba pri ly kai ai tiu lawh nai deaungkho y tamyh naira avum i, pri harei malawn py, amlum ai ny y leang bo.
43 Moba pri i khumichi ai jei hyn hai naichi, hum angawmchi hawi, deaungchi my ly ajeng rym nai ne. Hini ly Areng i thui nai leu ne.
44 Jei hyn ai hawi naira i law tleaung ai nai atho sa naichi ly huni angawm theung y tla u ai. Hum angawmra i lyn kalau nai khumichi ly deaungchira y man u ai. Ati mana nai mo nabaly Moba pri ai tamyh ai nai neng ly kaimy khai takhra yb nai deaungkho y ne.
45 Jeaungmang iy patang naira avum nai khumichi ly Hesabon mary y abyh ai nai hau u nai ne. Na i py, vaichi khala Sihon samrang my peang nai Hesabon mary ly mai angveaung pun veng bo. note 48:45 Hesabon mary ly mai angveaung pun veng bo; ti y baly Hesabon mary ly mai angveaung pun i, kishon samrang i yhm py kang bo.Mai ly tavai atiu ham parai nai Moba khumichi i khuteng meingtymchi hawi mawi ka-sangchi ai kang nai ne.
46 Moba khumichi ai pahen u! Khemosa tameuh ai chiu nai khumichi ly tamyh naira avum u nai ne. Nichi i cho chanauchi py langheng hawi naira avum u bo.
47 Na i py mo mang i neng khala Areng ly Moba pri y nang chawn hai ali teang ai. Hini bawibawichi ly Moba pri tlang tleaung y tym ai nai atitichi molam y Areng i pei nai leuchi ne.