47
Areng my Philistin chengchi molam y leu pei nai
1 Kaza mary ai Aikupta samrang my tiu y kyh rai khala y, Philistin chengchi molam y Areng ly kai teng y leu ang pei nai ne.Ref 47:1-7: Is 14:29-31; Ezek 25:15-17; Joe 3:4-8; Amo 1:6-8; Zep 2:4-7; Zek 9:5-7
2 Mymy ly
“Khen cham! Tosyh ngan mang y tavo tui leaung nai kamta, ang leaung ai.
Huni tuichi ly khaileaung hawi khaileaung tleaung y awm nai ngiereichi,
marychi hawi mary i khumichi ai um biu ai.
Khumichi ly atleu pi ai nai kaau u ai.
Khaileaung tleaung y awm nai khumi bawibawichi ly
khrikhri pa-rei vo u ai.
3 Nichi ly keaungngo muiken katynchi hawi
keaungngo ka-ri
amli nai katynchi thai u ai.
Ampochi ly mychi i cho chanauchi ai khen ali y.
Nichi i kiuchi py atho kheih i, tla thlawi pawn ai.
4 Turu mary hawi Sidon mary mang y pei pajau nai
tavai kasabawmra awm rai nai ngiereichi ai khanglang vui nai kani hawi,
Philistin pri ai tamyh vui ai nai neng kani ly tym dudu bo.
Kai, Areng ly Kariti tavo peang mang ang jeu nai
Philistin cheng bawibawichi ai katamyh ai.
5 Kaza mary i khumichi ly khri pa-rei paleung si vo tangam u bo.
Asakelon mary i khumichi py tyn kryh y nai ne.
Awm rai nai Philistin khumichi ly mana tanrei kakra vo tangam awm u ai mo?
6 ‘Areng i Haisau awi!, nang ly mana tanrei kakra
tleh veangveang ai mo?
Nangmy i haisau keu theung y ahawn teang iy
awm me jau bei!,’ nanai nangchi thui u nai ne.
7 Na i py huni haisau ly kaimy pei nai
kalop awm nai deaungkho y, ati mana nai awm pypy thai ai mo?
Asakelon mary hawi pangli peang y awm nai khumichi ai
tiu ai nai huni haisau ai kaimy leu pei nai ne,” napi.