21
Benjamin cheng theaungchi i vui ajuchi
1 Israela chengchi ly Mizapa mary y angym u nai thym khala Areng teng y, “Benjamin neampacho leaung leaungrei ai py, achi i chaniu hawi apom ai nai pei y ai,” nanai vaineng adeu u bo.
2 Hunaibaly vai, Israela chengchi ly Bethela mary y chei u iy, Tameuh i mo y kani dym nai pa-rei ateh u naimy,
3 “Aw Israela chengchi i Areng Tameuh, ati mana nai y hina nai tym hai lawh mo? Benjamin cheng theaungchi ly Israela cheng i nai, ati mana nai y tama vui ai lawh mo?,” nanai khri pa-rei vo naimy takeng u bo.
4 Khumichi ly khawn khutawi kangthodyh khalaang thau u iy, huni meingtym y maicham sa u i, amkawm nai kapathypra hawi leng patlum nai kapathypra talam u.
5 Nichi my, “Israela cheng theaung bawibawichi theung i, Mizapa mary Areng i mo y tym y nai khumichi awm rai a?,” nanai deng u. (Ati mana nai mo nabaly Mizapa mary theung i Areng teng y tym y nai khumi ly dei ai nai tla, nanai vaineng tau u nai deaungkho y ne.)
6 Israela chengchi ly mymychi i amnauchi, napi nai Benjamin cheng theaungchi i vui paleung si naimy nichi teng y, “Vaini my Israela cheng theaung theung i, cheng theaung harei tama vui bo.
7 Vai awm rai nai Benjamin neampachochi i vui ajuchi nga ai nai achi mana sa ai mo? Achi i chaniuchi ai nichi teng y deaung paseng y ai nai, Areng teng y achi vaineng abeu kheih veng bo,” nanai thui u.
8 Mizapa mary y angym u nai khala y, Israela cheng theaung theung i, tym y nai khumichi awm rai a?, nanai adeng cham i, Kilead pri Jabe mary i, amimi py tym y nanai pany u bo.
9 Tavaimichi my amyn vuikanai la nai khala ly Kilead pri Jabe mary i khumi leaungrei py abawi y nai ne.
10 Mizapa mary y angym u nai khumi bawibawichi my, mychi theung i sorai paleung awm keh nai khumi leaung 12,000 reichi teng y, “Nangchi chei u iy neampachychi hawi deaungdichi raurei, Jabe mary i khumi bawibawichi ai padei u pawn;
11 neampacho hawi anglo lengmyn ny y nai neampachy ngiereichi ai, padei u pawn ai nai tla,” nanai leu pei iy pato bo.
12 Huni khumichi ly Jabe mary i khumichi theung y, anglo lengmyn leaung chungvai palyhreichi ai avum i, nichi ai Siloh mary tavai taira y hawi u bo. Siloh mary ly Kanan pri theung y awm.
13 Naibaly angym u nai khumi bawibawichi my, Rimon lengseaungra y awm nai Benjamin cheng theaungchi teng y, adyh adawi ai ngai nai satang pei u bo.
14 Benjamin cheng theaungchi ly vawi u teang nai khala y, takhra Israela chengchi my, mychi padei y naimy khai nai Jabe mary i neampachychi hawi apom hai bo. Na i py huni neampachychi ly nichi i vui anga y.
15 Areng ly Israela cheng theaungchi i amkawm nai phra hai vui bo i, khumichi ly Benjamin cheng theaungchi i vui paleung hawi u y bo.
16 Hunai deaungkho y miteaung kehchi my, “Benjamin cheng theaung neampachychi by y na bo; awm rai nai neampachochi i vui, achi mana aju hau pi ai mo?
17 Israela cheng holai nyhrei awm naira y, cheng theaung harei tama ai nai avo y; tamo y naimy awm rai nai Benjamin cheng theaungchi i vui, saisairei achi sa pi ai nai tla.
18 Na i py achi ly amychi i chaniuchi ai, nichi hawi apom hai ai nai pei pajau y; ati mana nai mo nabaly huna nai apom hai ai nai pei nai khumi ly achi i vaineng lawi ai nai deaungkho y ne,” nanai arum u bo.
19 Naibaly nichi ly Siloh mary y saneng tleirei sa nai, Areng i vui pawi neng tym ai bo, nanai pany u. (Siloh mary ly Bethela mary i tosyh ngan, Lebona mary i tokalawi ngan, Bethela mary i dengdairei, Sekhem mary mang y chei nai lam nisi mang y awm.)
20 Nichi my Benjamin cheng theaungchi teng y, “Nangchi ly kreip akhochi mang y chei iy aheu u ly
21 ajeng u jo. Siloh mary i neampachychi ly pawi y chei ai nai, lam naimy ang jeu u ai. Huna nai khala y kreip akhochira i nai theu u iy, nangchi hawi apom ai nai khrei nai neampachy ai patiu ly Benjamin pri mang y hawi u.
22 Nichi i ampochi, ti y baly amprochi my jeu iy paka lawh baly, nangchi ly nichi teng y, ‘Hini neampachychi ai, kaichi my la ai nai pei ba; ati mana nai mo nabaly kaichi ly nangchi ai tiu iy, nichi ai la vui nai ny y leang; ti y baly nichi ai kaichi teng y pei nai khumi ly nangchi ny y nai deaungkho y nangchi ly nangmychi i vaineng taphra nai tlo y leang mang,’ nanai thui pi u,” nanai taviu bo.
23 Benjamin cheng theaungchi py, huna nai taviu nai kamta sa iy, lam naimy jeu u nai neampachychi ai, amymy i vui patiu u bo. Naibaly mymychi i khu ka-peang mang y vawi u i, mymychi i marychi palum u iy hu y awm u nai ne.
24 Huni neng khala y Israela chengchi ly mymychi i cheng theaung, yhm dengtheungchi hawi, yhm hlau awm nai meingtym tleirei y, vawi u ali teang bo.
25 Huni deung khala, Israela chengchi theung y samrang by y leang rai; khumi luteng ly amy i ngai nai kamta sa u nai ne.Ref 21.25: Tara chih 17.6