20
Israela chengchi tavai atiu ai nai angvei u rym nai
1 Tosyh ngan Dan mary dengdairei, tokalawi ngan Beraseba mary khrairei py, nisi ngan Kilead pri i nai py, Israela cheng bawibawichi ly tavai tiu ai nai palau nai molam y angym u kaleuteu i, Mizapa mary Areng i mo y jeu u achu bo.
2 Jeu u achu nai Tameuh i khumichi theung y Israela cheng theaung bawibawichi ai lu sa nai keungchi abawi u. Mizapa mary y tavaimi risa leaung 400,000 rei akachu u nai ne.
3 Huni thym y Benjamin cheng theaungchi ly Mizapa mary y takhra Israela cheng bawibawichi tym angym nai satang thai u bo.
Israela chengchi my, “Hini reita taphra nai sai ly mana mo? kaichi teng y thui pi cham,” nanai deng u baly,
4 dei nai neampachy i juvo Levi theaung khumi my ly “Kai ly aju katheang hawi vanrei, Benjamin khu ka-peangra i Kibeah mary y anga ai nai vum aneng y tym nai ne.
5 Kibeah mary i neampachochi ly kai ai ka-jo hau nai yhm katanmeuh na bo. Nichi ly kai ai padei ai nai atho sa u teu i py, kai i aju katheang ai pajang u i, ni ly dei nai ne.
6 Kai ly ni i veu syn iy tawpleu tawpleu chum baly, cheng theaung holai nyhreichi teng y, beang beangrei tha pi nai ne. Hini khumichi ly Israela chengchi theung y hawi y nai kalop, ta-li ta-pang sa u bo.
7 Hini meingtym y tym u nai nangchi bawibawi ly Israela chengchi ne. Hini molam y ati mana sa u ai mo?,” nanai deng.
8 Khumi bawibawichi ly vanrei my ang thau u iy, “Achi ly leaungrei py takhawi y naimy amy i kani yhm mang y, ti y baly yhm mang y vawi u moh jau.
9 Achi sa ai nai kalop ly tambe va iy, khumi takhrachi ai vawi u chum baly, Kibeah mary ai tiu u ai nai khyh bo.
10 Israela cheng phyho phyrei ly tavaimichi i vui cha-nei ateaungchi tha pi ai nai tla; huni bo i khumichi ly Israela chengchi ai ta-li ta-phang sa nai molam y, Kibeah mary i khumichi tlang tleaung y pajeng ai,” nanai thui u.
11 Hunaibaly Israela pri i khumi bawibawichi ly Kibeah mary tiu ai nai ka-dawn harei hawi akachu u bo.
12 Israela chengchi ly Benjamin cheng theaungchi i khu ka-peang verei y khumichi pato i, “Nangchi sa ta-li ta-pang sa tamang nai ly mana nai mo?
13 Kibeah mary y awm nai ta-li ta-pang sa nai khumichi ai kaichi my padei iy, Israela chengchi theung y, hini hawi y sa nai kalop tama hai vui ai nai vai, kaichi teng y au,” nanai thui hai bo. Na i py Benjamin cheng theaungchi ly takhra Israela chengchi i leu ai dawndan pi y;
14 nichi ai tiu ai nai Benjamin mary bawibawira i nai theu iy, Kibeah mary y angym u bo.
15-16 Nichi ly huni kani y mychi marychira i nai tavaimi leaung 26,000 reichi ai palau. Huni bo y Kibeah mary i khumichi ly neampacho langvawimi leaung 700 reichi ai py pangym u bo. Vawi patyp nai khumichi ly sam amai harei ai malawn py, lijai hawi ko baly chawm y nai awm vai y naichi ne.
17 Benjamin cheng theaungchi abawi y naimy, tavai leaungsai kawp yb nai Israela tavaimichi ly leaung 400,000 rei awm nai ne.
Benjamin cheng theaungchi hawi tavai atiu nai
18 Israela chengchi ly Bethela mary y awm nai, chiu nai meingtym y chei iy, “Benjamin cheng theaungchi ai ami cheng theaungchi my tiu man ai mo?,” nanai Tameuh teng y deng u bo.
Areng my, “Juda cheng theaungchi my tiu u man sy,” nanai pathang.
19 Na i py Israela chengchi ly khawn khutawi nai khala y theu u i, Kibeah mary y tai u bo.
20 Nichi ly Benjamin tavaimichi ai tiu ai nai amsa u i, mychi i tavaimichi ai mary mang y motha hai iy, meingtym la hai bo.
21 Benjamin tavaimichi ly mary theung i nai theu u iy kani dym y naimy, Israela tavaimi leaung 22,000 reichi ai padei u bo.
22-23 Huna nai khala y Israela chengchi ly chiu sa nai meingtymra y chei u iy, Areng i mo y kani dym nai pa-rei, vo naimy chiu sa u bo. Nichi ly mymy teng y, “Kaichi i amjo amnau Benjamin cheng theaungchi ai kaichi tavai tiu bi ai a?,” nanai deng u.
Areng my, “Ne, tiu u bi,” napi.
Hunaibaly Israela chengchi ly atho nga u i, risachi ai jangdyh i kamta meingtym la hai teang bo.
24 Nichi ly tlen pa-nyh Benjamin tavaimichi awm naira mang y tiu bi ai nai amsa u bo.
25 Benjamin tavaimichi ly Kibeah mary i nai tlen pa-nyh theu u bi. Vai i nai khala y nichi ly tavai leaungsai kawp yb nai Israela tavaimi leaung 18,000 reichi ai padei bi bo.
26 Huna nai khala Israela cheng bawibawichi ly Bethela mary y chei iy vo u. Nichi ly Areng i mo y ateh iy, kani dym nai pa-rei biu hai u bo. Nichi ly Areng i mo y amkawm nai kapathypra hawi leng patlum nai kapathyprachi talam u.
27-28 Huni neng khala y Areng i Leu Maikawm Pawm ly Bethela mary y awm nai ne. Huni Pawm ai ly Aron i katu, Eleaza i chapo Phineha my kry. Khumi mipuichi my Areng teng y, “Kaichi ly kaimychi i amnau Benjamin cheng theaungchi ai vai, chei bi iy tiu ai a? tiu y ai bo a?” nanai deng u.
Areng my, “Tiu u, khawndam ly kaimy nangchi ai, nichi i tlang tleaung y kang eaung hai ai,” nanai pathang.
29 Naibaly Israela chengchi ly tavaimi phyreichi ai Kibeah mary kamki abyh hai bo.
30 Hunaibaly nichi ly Benjamin tavaimichi awm naira mang y tlen pa-thom tavai thau u bi i, mychi i risachi ai angchei i kamta Kibeah mary mang y motha iy, tiu ai nai meingtym la hai bo.
31 Benjamin cheng theaungchi atiu ai nai theu u nai khala y, mary hawi palo naira mang y lihyp iy, hawi vui nai avum u bo. Nichi ly angdym angdengra py, Bethela mary mang y chei nai lam hawi, Kibeah mary mang y chei nai lamra py, angchei khala i kamta Israela chengchi ai padei i, leaung phairei vi dei nai ne.
32 Benjamin cheng theaungchi my, “Achi ly angchei khala i kamta nichi ai pajau bi bo,” nanai thui u.
Na i py Israela chengchi ly mychi i tavai anaw iy, mary hawi palo nai lam mang y tym pa-rei, paleung ka-echi ai lihyp vui ai nai dawn yb nai ne.
33 Hunaibaly Israela chengchi i tavaimi kamkawm pui ly anaw vui iy, Balatama mary y akachu u nai khala, Kibeah mary kamki abyh u nai risachi ly mychi abyh u nai lengseaung awm mang nai mary tengpang mang, vaimy tiu u miu bo.
34 Israela cheng verei theung i vawi patyp nai tavaimi leaung meaungkateaungreichi ly Kibeah mary ai tiu u bo. Atiu nai ly khri pa-rei ho na; Benjamin cheng theaungchi ly mychi tavai sum ai nai, py u y nai ne.
35 Areng ly Israela chengchi ai, Benjamin chengchi i tlang tleaung y tavai eaung hai bo. Huni kani y Israela chengchi ly paleung ka-e leaung 52,100 rei padei u nai ne.
36 Naibaly Benjamin cheng theaungchi ly mychi tavai sum nai apany u bo.
Israela chengchi i tavai eaung nai sai
Israela chengchi i tavaimi kamkawm pui ly Kibeah mary kamki abyh yb nai tavaimichi ai paleung pado i, Benjamin cheng theaungchi mo mang anaw u bo.
37 Huna nai khala y abyh nai tavaimichi ly Kibeah mary theung y kun u kaliki i, khumi amji phro iy mary theung y awm nai ngiereichi ai padei u nai ne.
38 Israela tavaimi kamkawm pui ly abyh nai risachi hawi, mychi tengtawi apy thai nai ka-ma-ra harei khai u. Mary theung i dengdairei maikhyh khyhthleung nai niu u nai khala y,
39 tavai keung y awm nai Israela risachi ly angprengra i nai, ali u teang ai nai ne. Huna nai angpreng u nai thym khala y Benjamin cheng theaungchi ly Israela risa leaung phaireichi ai padei chum veng bo. Nichi my, “Vai, hini tlenrei py vaichi khala i kamta, nichi ai achi my pajau nai bo,” nanai mychi tengtawi katheu u nai ne.
40 Huni neng khala maikhyh pui ly mary theung i nai achaw amteaung i, apy thai nai ka-ma-ra amteng bo. Benjamin cheng theaungchi ly nithun mang y khen nai khala, mary verei mai kadeu angvang nai niu i, khri pa-rei lyh nanai ne.
41 Huna nai khala y Israela chengchi ly ali u teang bo. Benjamin cheng theaungchi ly mychi tavai sum ai bo, nanai apany nai deaungkho y jei hyn u naimy,
42 Israela chengchi teng i nai anaw u iy, daichi ka-vym theung mang y preang u; na i py law tleaung u thai y. Israela tavaimi kamkawm pui hawi, mary theung i theu nai abyh nai tavaimichi sala y, amtleng khyp nai deaungkho y nichi bawibawi ai ly padei pawn nai ne.
43 Israela chengchi ly paleung ka-echi ai katanmeuh iy, Kibeah mary nisi mang y khrairei, anawn y naimy hui iy tleh u nai deaungkho y,
44 Benjamin cheng theaungchi i vawi patyp nai tavaimi leaung meaungkateaung atlo sang tajarei dei u nai ne.
45 Takhra khumichi ly ali iy, daichi ka-vym mang y angpreng u i, Rimon lengseaungra y tym u. Lam y khumi leaung sangpangrei dei u bi nai ne. Israela chengchi ly awm rai nai khumichi ai Kidom mary mang y khrairei hui u i, khumi leaung sang nyhreichi ai padei u bo.
46 Huni kani y Benjamin cheng theaung bawibawi leaung 25,000 rei dei u bo. Hunichi bawibawi ly sorai risachi ne.
47 Na i py khumi leaung chungvai tariureichi ly daichi ka-vymra i Rimon lengseaung mang y preang u i, law tleaung u nai ne. Nichi ly huni meingtym y lo palyhrei awm u.
48 Israela chengchi ly ali teang iy, neampacho, neampachy, deaungdi, tawnbawichi raurei, awm asai nai Benjamin cheng theaungchi ai padei u bo; avum nai marychi ai py, mai leng pawn nai ne.