33
1 Joba awi, kai i thui ai awm nai ngiereichi ai
vai, hawihai palai tangai ba.
2 Kai ly kaimy i paleung theung y awm nai kamta, kang thui pi keng ai.
3 Kai i leuchi ly paleung pathym kahawi hawi, kang thui pi nai leu ne.
kai ly leu meitang katheu ai.
4 Tameuh i phailo ly achi ai sa iy, hengra py pei nai ne.
5 Nang pathang pajau lawh baly, kai teng y pathang ba; leu tlau teang ai nai leaungsaichi py adawn yp ba.
6 Nang hawi kai ly Tameuh i mo y takhra y leang;
ani ai ly spryh hawi sa nai ne.
7 Hunai deaungkho y nang ly kai ai jei ai nai lam by y.
Kai ly nang i tlang tleaung y kamjau kamteang sa ai nai khumi ny y leang.
8 Nang i thui nai leu ly kai thai chum bo; nangmy,
9 “Kai ly hawi y naira ati sai py kaso y,
kai ly kamngo awm nai khumi ny y leang.
10 Na i py Tameuh ly kai i tlang tleaung y kamsi hau iy,
paleung ka-e kamta ang thui nai ne.
11 Mymy ly kai i kheu ai sengkry hawi pakheng bo;Ref 33.11: Joba 13.27
kai i kheukan ngiereichi ai ang khen patawm jo nai ne,” nanai thui.
12 Na i py Joba awi, nang i thui nai ly tamang bo;
Tameuh ly khumi tleaung y len keh nai ne.
13 Tameuh ly khumi i hnei takeng naichi ai, mana khala py tangai pi y, nanai
nang ly ati mana nai y, mymy ai thui tamawn lawh mo?
14 Tameuh ly leu pei aninau teu i py,
ami py mymy i leu ai tahm khai u y nai ne.
15 Tameuh ly vum y khumichi i nai thym khala Ref 33.15: Joba 4.13
amteng hai naichi hawimy leu pei.
16 Mymy ly my i leu pei naichi ai thai hai pi bo;
nichi ly mymy i pany hai nai leu thai i, jei hyn u bo.
17 Nichi ly kamngo satamang nai anawn hai ai nai hawi,
amlyh am-e nai by y ai nai Tameuh ly nichi teng y leu pei nai ne.
18 Mymy ly nichi ai myh kang hai ai ny y;
deira i malawn py atleu nai ne.
19 Tameuh ly khumi ai nosora i nai py,
tlang patang naira avum hai naira i nai py, thui parip nai ne.
20 Noso nai khumi ly labeaung phra i, cha amlyn parai nai,
cha kahawi nei kahawichi ai malawn py, paleung myn nai ne.
21 Ni i ngan tlang ly jei i,
hiuchi py amteng na bo;
22 Ni ly tavau pri y chei ai nai kasa bo.
23 Na i py khumichi ai amy i sa ai nai kalopchi pany ai nai
Tameuh my pato nai, kani pri amtaw thau nai sang neangneang awm;
nichi theung y leaungrei ly ni ai sabawm ai nai amtengtan amteng pi lym ai.
24 Huni kani pri amtawi thau naimy ly pahen i,
“Ni ai patleaung pi!
Ni ly tavau pri y satla ai nai ny y.
Ni ai atleu ai nai vang ly hi y awm,” nanai thui ai.
25 Huna nai khala ni i ngan tlang ly ka-veang thym i ngan tlang lawm ali teang ai.
26 Tameuh ly huni khumi i chiu sa nai pathang pi ai;
ni ly Tameuh ai amo theu parai naimy chiu ai;
Tameuh ly ni ai angchei i kuchira y tym hai ali teang ai.
27 Ni ly mipuichi mo y, “Kai ly kamngo sa tamang lawh bo;
hawi naira kaso y teu i py, Tameuh ly kai ai atleu.
28 Mymy ly kai ai tavau pri y chei hai y bo;
naibaly kai ly vai, kaheng jo rai,” nanai thui ai.
29 Tameuh ly hina nai kamta sa aninau nai ne.
30 Mymy ly khumi i hengra ai atleu iy,
ni ai amo theu naimy heng ai nai pei bo.
31 Joba awi, vai, kai i thui nai leu tangai ba;
awm pypy iy, kai ai leu katheu ai nai pei ba.
32 Na i py nang i thui ai naichi awm lawh teu baly, kai tangai kyh si;
kai ly nang i leu kateng ne, nanai amo theu naimy leu pajeaung ai nai ngai.
33 Na i py nang i thui ai nai leu by y lawh baly, awm pypy iy kai i thui nai leu tangai ba;
tau cheng naira nga ai nai lam, nang ai kaimy patiu pi ai.