27
Joba
1-2 Ati cheaungkhang sa thai nai heng nai keung Tameuh i amyn y, kai,vaineng abeu bo.
Tameuh ly kai i sa nai sai ai kahawi chih pi y naimy,
kai i heng nai ai hawi hai y nai keung ne.
3 Na i py kai ai Tameuh my, taho ai pei nai ryrei ly
4 kai i labeaung ly mana khala py chainem y nai leu katheu ai ny y;
kai i palai ly mana khala py, ka-chawi leu katheu ai ny y.
5 Kai ly nangchi i leu teng, nanai mana khala py pajeaung nai leu katheu y leang;
kai ly heng nai sala ryrei, kaimy teng y kamngo by y, nanai kathui jojo ai.
6 Hawi naira ly mana khala py kapatlaw ai ny y;
kai i angji ngailai nai paleung ly chai nai ne.
7 Kai ai ka-keng ka-awi sa iy, thui tamawn nai khumichi ly
khumi hawi y naichi kamta, kamngo pajeng naira avum u ai.
8 Tameuh by y nai khumichi i hengra ai, Tameuh my la pi veng nai neng khala,
nichi i vui ati athang khai naira awm ai mo?
9 Nichi patang nai neng khala, vo hang nai raawi ly Tameuh my thai pi na a?
10 Nichi ly mychi ai mymy i pei nai amo theu naira ngai u ai nai avo parai;
Mymy teng y neng tleirei, chiu sa u ai nai avo nai ne.
11 Tameuh i sa thai naira ly mana tanrei len na mo, nanai py
ati cheaungkhang sa thai nai Tameuh i dawn tau nai sai ai py,
nangchi ai kaimy patiu pi ai.
12 Na i py nangmychi kypkyp my, hini leaungsaichi niu u chum nai ne;
Hunai deaungkho y nangchi ly ati mana nai y,
ati py ny y nai leuchi katheu u lawh mo?
Zawpha
13 Khumi hawi y naichi ai ati cheaungkhang sa thai nai Tameuh i
pajeng nai ly hina nai ne.
14 Khumi hawi y naichi teng y cho chanau neampacho neangneang awm;
na i py nichi ly tavai keung y dei u be ai.
Khumi hawi y naichi i cho chanauchi ly mana khala py,
kajeu kawi pa-rei cha ai nai nga u ai ny y.
15 Nichi theung i dei kamthumchi ly no roka nga iy dei u ai;
nichi i neampachy lumaichi ly vo tangam u ai ny y.
16 Khumi hawi y naichi ly kati pajau y na pa-rei tangka nga u iy,
ateaung leila pajau y na pa-rei, ateaungchi pateung achu i py,
17 huni ateaungchi ai khumi kahawichi my ateaung iy,
tangka ai khumi kahawi my amtym vui ai.
18 Khumi hawi y naichi i sa nai yhmchi ly khanglo sanghang yhm hawi
li hlau typ nai miseaung i tai hawi py atawm.
19 Nichi ly nang chawn nai khumi lawn i py, i anglaw nai khala
nichi i yhmtheaung katuichi niu u ai ny y.
20 Khrikhri pa-rei patang naira ly vaimy len tamangtang nai tui kamta, nichi i tlang tleaung y tym ai.
Nichi ly vum y aho nai ali y akheang pawn ai.
21 Nisi ali ly nichi ai, mychi i yhmchira i nai hm pi pawn ai.
22 Nichi preang veng ai nai atho sa nai thym y
huni ali ly nichi i tlang tleaung y pahyp y naimy aho ai.
23 Nichi angpreng u nai khala, huni ali ly khri pa-rei tyn kado thlyh thlyh naimy,
khri pa-rei aho na i, nichi ai kaso tahyn theu hai ai.