63
Areng my khumi cheng cheaungkhangchi ai eaung nai
1 “Edom pri Bozrah mary i dengdairei jeu nai khumi ly ami mo? Apu parai nai ateaung kamsen amthyp iy, atho haiho kawi angym naimy ang jeu nai khumi py ami mo?
“Huni ly mymy i eaung naira amthang hai ai nai jeu nai keung, atleu ai nai sa thai naira awm nai keung Areng ne.
2 Ni i ateaungchi ly kreip athai nip nai khumi i ateaungchi kamta, ati mana nai y pasen na lawh mo?
3 Areng my, “Kai ly khumi cheng cheaungkhangchi ai kreip athaichi kamta, ati piu veng bo. Ami py kai ai sabawm ai nai jeu y. Kai ly kado theu nai deaungkho y, nichi ai ati piu naira y kai i ateaungchi ly nichi i thi abawi nai ne. Ref 63:3: Amt 14:20, 19:13, 15
4 Kai ly kaimy i khumichi ai atleu ai nai neng tym bo. Nichi i paleung ka-echi ai pajeng ai nai adawn yb veng bo.
5 Kai ai sabawm ai nai khumi leaungrei py by y nai niu nai khala y, kai ly lyh na lawh bo. Na i py kai i kado theu naira my kai ai atho pei nai deaungkho y, kaimy kypkyp my eaung naira nga tanga nai ne. Ref 63:5: Is 59:16
6 Kai ly kaimy i kado theu nai ryrei my, khumi cheng cheaungkhangchi ai ati iy katamyh bo. Nichi i thi ai ly khaileaung y kaleih jawn bo,” napi.
Israela chengchi i vui Areng i hawi naira
7 Kai ly Areng i phra vai y nai tamen nai satang thui pi ai.
Kaichi i vui sa pi nai atitichi molam y kapalo ai.
Mymy ly mymy i tamen nai hawi pahen nai saho y,
Israela chengchi teng y amtheaung naira kawi angym hai nai ne.
8 Areng my, “Nichi ly kai i khumichi ne nai deaungkho y, kai ai li-tapawp u ai ny y,” napi. Naibaly mymy ly nichi i avum nai ngari kamtang cheaungkhangra i nai atleu pi ai.
9 Nichi ai atleu nai keung ly kani pri amtaw thau ny y. Na i py Areng mymy kypkyp ne. Mymy ly tamen naira hawi pahen naira awm nai deaungkho y, nichi ai atleu nai ne. Jangni y mymy ly nichi ai kry jojo teu i py,
10 nichi ly tiu iy mymy i phailo kachai ai paleung phra hai bo. Hunai deaungkho y Areng ly nichi ai paleung ka-e palawn i, tiu nai ne.
11 Hunaibaly nichi ly jangni y Areng i miseaung Mosi i deung y adawn u vau i, “Mymy i khumichi i lu sa naichi ai pangli i nai atleu pi nai Areng ly ma y mo? Mosi ai sa thai naira pei patyp keh nai Areng ly ma y mo?
12 Mosi i saho y sa thai naira teaung iy, mymy i khumichi mo y pangli tui phy nyhrei akhawi hai chum baly, amthang jojo nai Areng ly ma y mo? nanai deng u bo.Ref 63:12 Theu 14:21
13 Areng ly nichi ai tui kathiu angpeang hai iy pahawi nai khala, nichi ly keaungngo karamchi kamta kheu amchyn nai khaw parai i, mana khala py atlym u vai y.
14 Si, painochi ai sui tlaira hawi parai nai leaunghawi mang y pahawi nai kamta, Areng ly mymy i khumichi ai awmnem nai meingtym mang y pahawi bo. Hina nai kamta mymy ly mymy i sa thai naira haiho amthang hai nai ne.
Pahen naimy sabawm ai nai chiu sa nai
15 Aw Areng, chai parai iy phum-ang angvang nai kani pri, napi nai, nangmy awm nai meingtym i dengdairei kaichi ai khen kathiu kyh ba. Kaichi i vui nang i paleung mawn hai nai ly ma y mo? Nang i sa thai naira ly ma y mo? Nang i tamen naira hawi pahen naira ly ma mang y mo? Kaichi ai khai su moh kyh ba.
16 Nang ly kaichi i ampo ne. Kaichi i amsi pajo Abraham hawi Jakob nini malawn py, kaichi ai bawi lo pi pajau y. Na i py Areng nang ly kaichi i ampo ne. Kaichi ai jangni khala i ka-so atleu pi jojo nai keung ly nang ne.
17 Kaichi ai ati mana nai y nangmy i reita lam i nai amphri hai vui lawh mo? Ati mana nai y kaichi ai paleung tang hai iy, nang teng i nai hihai vui lawh mo? Nang ai chiu naichi ai dawn pi nai deaungkho y py, nangmy peang jojo nai nangmy i khumichi ai dawn pi nai deaungkho y py, jeu ali teang ba.
18 Nangmy i khumi kachai, napi nai kaichi ai paleung ka-echi my patheu daw iy, nichi ly Achura yhm taphra u bo.
19 Nang ly kaichi i samrang ny y vui lawh nai kamta py, kaichi ly nang i khumichi ny y vui lawh nai kamta py, nang ly kaichi ai sa lawh bo.