61
Atleu pi ai nai satang kahawi
1 Areng i phailo ly kai ai sa thai naira angym hai bo. Ref 61:1: Mt 11:5; Lk 7:22Ref 61:1-2: Lk 4:18-19
Khumi kamawnchi i vui satang kahawi syn pi iy,
paleung phra naichi i no-na hawi hai bo;
pri pala nai avum nai khumichi hawi theaung tla nai khumichi ai
law tleaung naira nga nai satang thai hai ai nai,
mymy ly kai ai vawi takhra iy pato bo.
2 Areng ly mymy i khumichi ai atleu iy,Ref 61:2: Mt 5:4
paleung ka-echi ai taphra nai neng tym bo, nanai
thai hai ai nai kai ai pato bo.
Paleungsi tangam nai khumi bawibawichi ai
awmnem naira pei ai nai,
3 Zion mary i paleung si vo tangam nai khumichi teng y,
vo tangam nai i jeng y amo theu naira py,
paleung mawn nai i jeng y palo nai khulym py,
pei ai nai mymy ly kai ai pato bo.
Nichi ly Areng i nang parai nai amteng hai ai nai,
Tameuh my ui nai, hawi naira napi nai
Ngopraibiu keungchi kamta cheang u sau ai.
4 Nichi ly phra seaungkhrang nai sai kra parai nai marychi ai sa palai iy, kangtha palum u ai.
5 Aw, kai i khumichi awi, cheng takhra khumichi ly nangchi i kalop sa pi ai.
Nangchi i beram kanghuchi py ang kry pi ai.
Nangchi i li hlauchi thawn pi iy, nangchi i kreip akhochi palum pi ai.
6 Nangchi ai ly Areng i pathyp pi nai keungchi,
Tameuh i miseaungchi napi ai.
Khumi cheng cheaungkhangchi i yhmtheaung katuichi amtym iy,
huna nai amtym nai molam y, nangchi ly amlyh u ai.
7 Nangchi i kangji kangai nga nai hawi sum nairachi ly tem ai bo.
Nangchi ly naimychi i pri y awm naimy,
nangchi i yhmtheaungchi py, phy nyhrei nang panawi bi ai.
Nangchi ly deungtasarei amo theu ai nai nga u ai.
8 Areng my,
“Kai ly leu meitang adyh adawi nai ai kawn, lawm nai hawi pahyp y naimy ana nai ai ly niu ngai y.
Kai i khumichi teng y ka-ym awm nai kawn vang pei ai
Nichi hawi py deungtasarei leu maikawm asa ai.
9 Nichi ly khumi cheng cheaungkhangchi theung y amyn amthang u ai.
Nichi ly kai i amtheaung naira nga nai khumichi ne, nanai
nichi ai niu nai khumi lutengchi my pany u ai,” napi.
10 Jerusalem mary ly Areng i sa nai kalop molam y amo theu ai.Ref 61:10: Amt 21:2
Ni ly apom ai nai ateaung amthyp nai, deaung vawi nai anglo hawi atawm.
Tameuh ly ni ai atleu naira, eaung nairachi hawi amthyp hai bo.
11 Tichi ly pato iy keung prau nai kamta,
Areng ly mymy i khumichi ai meitang khyp atleu ai.
Khumi cheng cheaungkhangchi my py, mymy ai palo u ai.