55
Areng my pahen naira pei nai
1 Areng my,Ref 55:1: Amt 21:6; 22:17
“Tui ahai nai khumi bawibawichi awi, jeu u;
hi y tui awm!
Paisa tangka by y nai khumichi awi jeu u ly,
choh van iy cho u!
Kanu tui hawi kreip hang vang u!
nangchi ati sai py vang tlo y leang!
2 Cha nei kahawi ny y pui naimy, ati mana nai tangka pasum ai mo?
Nang i kalop sa nai vang pasum iy, ati mana nai kajeu kanglam awm ai mo?
Kai i leu tangai iy, kai i thui nai kamta sa u lawh baly,
nangchi ly hawi keh nai teicha teineichi, cha ai nai nga u ai.
3 “Kai i khumichi awi, kai i leu tangai iy, kai teng y jeu u.Ref 55:3: Amtaw 13:34
Hina nai kamta sa baly nangchi ly hengra nga u ai!
Kai ly nangchi hawi deungtasarei leu maikawm asa iy,
Davida teng y adeu nai amtheaung nairachi ly nangchi teng y kang pei ai.
4 Kai ly ni ai khumi cheng cheaungkhangchi i tavailu areng kehra y khai iy,
kai i sa thai naira ly khumichi i mo y, pany hai pi ai.
5 Vai, nangchi ly pri takhra khumichi ai palau u ai.
Vaichi khala nichi ly nangchi ai pany y;
na i py vai ly nangchi teng y amkawm ai nai angpreng naimy, ang jeu u ai!
Israela chengchi i chai parai nai Areng Tameuh, nangchi i Tameuh ly
hini atiti bawibawichi tym hai ai.
Kai ly nangchi ai tahm asang naira hawi, nang parai naira pei ai”.
6 Areng ly vai, nangchi sahawi y awm;
mymy mang y hi iy hnei takeng u.
7 Khumi hawi y naichi ly mymychi i hawi y sa naichi khai su iy,
mychi i paleung ka-dawnchi py takhra vui ai nai tla.
Nichi ly achi i Areng Tameuh mang y ali u teang ai nai tla.
Mymy ly pahen iy law tleaung hai kaliki ai.
8 Areng my, “Kai i ka-dawnchi ly nangchi i ka-dawnchi hawi atawm y.
Kai i reitachi py, nangchi i reitachi hawi takhra nai ne.
9 Kani khusang ly khaileaung tleaung y asang nai kamta,
kai i ka-dawnchi ly nangchi i ka-dawnchi tleaung y asang nai ne.
10 “Kai i leu ly khaileaung y tui pei ai nai tla hai naiRef 55:10: 2 Kor 9:10
kanitui hawi ji amaichi kamta ne.
Hunichi ly amti amjangchi prau hai reng.
Pati ai nai tichi hawi cha ai nai teicha teineichi lawm hai reng nai ne.
11 Kai i thui nai leuchi py, hina nai kamta tym hai ai.
Huni leuchi ly kai i dawn pasym naichi angym hai ai.
Kai i pataw nai kalop ngiereichi sa ai.
12 Nangchi ly Babulon pri i dengdairei, amo theu parai naimy theu u ai.
Mary theung i nai tlamsa naimy pahawi nai avum u ai.
Mawi katheang kalenchi ly aeu naimy khulym thui u ai.
Dengkeaung keungchi py, amo theu parai naimy aeu u sau ai.
13 Vai, aleng keungchi prau nai meingtymra y saitleang keungchi prau ai.
Aleng phreungchi awm nai meingtymra y preaungmui keungchi prau ai.
Hini atitichi ly kai, Areng i kuchi pany jo ai nai,
deungtasarei khaw jo nai ka-ma-ra harei lawm ai,” napi.