54
Israela chengchi i vui Areng i tamen naira
1 Aw Jerusalem mary, nang ly cho chanau so y nai neampachy hawi atawm. Ref 54:1: Kal 4:27
Na i py vai ly amo theu naimy khulym thui iy, aeu pajau bo.
Vai, nang ly juvo my khai su vai y nai neampachy tleaung y py,
cho chanauchi neangneang nga ai!
2 Nang i awm nai tai ly palen ly taira i kanihchi kadai, aneaung hai moh.
Tai vuinawnchi kasau so ly khangmuichi ai khaw pa-rei tahen.
3 Nang ly amy i khujyhchi palen ai nai tla.
Vai, cheng takhra khumichi awm nai pri ly
nang i khumichi my nga u ali teang ai.
Vai, khumi angso savai tlang nai marychi ly phuitaw na ai.
4 Jei moh, nang ly kangji ngo bi y leang bo.
Cheh nai py avum ai ny y.
Nang ly anglo deaungdi nai khala y, ka-ym by y nai aju lawm vai nai py,
neampachy lumai kamta, jeaungmang nanai pa-rei avum nai py, tami veng ai.
5 Nang ai sa nai keung ly nang i juvo kamta, nang ai ang kry ai.
Ni i amyn ly ati cheaungkhang sa thai nai keung Areng ne.
Israela chengchi i chai parai nai Tameuh ly nang ai atleu ai.
Mymy ly khaileaung pri y peang nai keung ne.
6 Israela chengchi awi, nangchi ly juvo my khai su nai deaungkho y,
khri pa-rei paleung bi nai, saneng nau nai aju hawi atawm.
Na i py Areng ly nangchi ai palau ali teang ai.
7 “Kai ly nangchi ai tanareichy kang khai su teu i py,
tamen naira len parai nai hawimy, kang la ali teang ai.
8 Kai ly kado theu nai deaungkho y, tanareichy kang hi pi veng nai ne.
Na i py tamen naira ly nangchi teng y kang patei pi jojo ai,
nanai nangchi ai atleu nai keung Areng my leu pei bo.
9 “Kai ly khaileaung pri y tuibai theu hai bi ai ny y,Ref 54:9: AA 9:8-17
nanai Nova deung y leu adeu pi yb bo.
Nangchi ai kado theu hai ali bi ai ny y, nanai vai, kai adeu bo.
Kai ly nangchi ai thui parip nai hawi, pajeng nai py kang tym hai ai ny y.
10 Mawi katheang kalenchi ly anawi iy phra pawn ai.
Na i py nangchi i tlang tleaung y kai i tamen nai ly mana khala py tem ai ny y.
Aly nai leu ka-deu ai, kai ly khaw hai jojo ai, nanai
nangchi ai tamen nai Areng my leu pei bo.
Jerusalem mary kangtha
11 Areng my, Ref 54:11-12: Amt 21:18-21
“Aw Jerusalem mary, patangra tym iy jeaungmang nai mary ne nai,
awm hai nem nai keung leaungrei py by y nai mary awi,
kai ly langdengchi ai, vang kateng lengseaungchi hawi sa palai teang ai.
12 Nang i angdeangrachi ai amia hawi,
nang i apai katheu pa-khochi ai lengseaung vang katengchi hawi,
nang i apai dengpangchi ai vang katengchi hawi, sa palai teang ai.
13 “Nang i khumichi ai kaimy thui parip ai.Ref 54:13: Jh 6:45
Nang i cho chanauchi ai nang chawn nai hawi tlamsa naira pei ai.
14 Nang ly hawi nai reita ai sangum khai nai deaungkho y, khaw jo ai.
Ana nai hawi jei hyn nairachi tama ai.
15 Nang ai ang tiu nai khumi leaung leaungrei awm lawh teu baly,
huni khumi ly kai i kangai ny y.
Nang ai tiu nai ngiereichi ly sum ai.
16 “Mai paeng iy tavai ateaung sa nai
tamo thip kawp nai sara ai kaimy sa nai ne.
Khumi ai padei ai nai tavai ateaungchi teaung nai
tavaimi risachi ai py kaimy sa nai ne.
17 Na i py mani tavai ateaung py, nang ai no pei pajau y leang.
Nang ly nangmy ai ang seu nai ngiereichi ai, tlau teang pajau ai.
Kai ly kaimy i miseaungchi ai kry iy,
eaung naira kapei ai,” napi.
Hini ly Areng i leu pei nai ne.