44
Areng ly Tameuh harei khyh
1 Areng my,
“Kai i miseaung Israela chengchi awi, kai i vawi takhra nai khumichi awi,
Jakob i katu chanauchi awi, vai tangai u.
2 Kai ly nangchi ai sa nai keung Areng ne.
Nangchi tapen khyp khala i dengdairei, nangchi ai kang sabawm bo.
Jei u moh, nangchi ly kai i miseaung,
kai my kang tamen iy, vawi takhra nai khumichi ne.
3 “Kai ly tui ahai nai pri y kani nai hai ai.
Tui by y nai daichi ka-vymra y micheaung tuinochi leaung hai ai.
Nangchi i cho chanauchi tlang tleaung y kai i phailo py,
nangchi i katu chanauchi tlang tleaung y amtheaung naira py, satleu pi ai.
4 Nangchi ly hawihai palai tui nga nai achachi kamta,
tui leaung nai tavo micheaung sahawi i paijeaung keungchi kamta, apu parai ai.
5 “Khumichi ly leaungrei bo y leaungrei, ‘Kai ly Areng i khumi ne,’ nanai thui u ai.
Nichi ly Israela chengchi hawi vanrei jeu iy awm u ai.
Nichi ly khumi luteng kiubanra y Areng i amyn tajiu u iy,
mymychi naimy Tameuh i khumi, nanai apalau u ai,” napi.
6 Israela chengchi ai peang iy ama hai nai Areng,Ref 44:6: Is 48:12; Amt 1:17, 22:13
ati cheaungkhang sa thai nai keung Areng my,
“Kai ly angchei khala i dengdai tem khala khrairei awm jojo nai keung
harei khyh nai Tameuh ne. Kai ny y baly tameuh takhra by y.
7 Kai i sa nai kamta sa iy angchei khala i dengdai tem khala khrairei,
tym ai nai ngiereichi ai hawihai palai
thui pi yb thai nai khumi ami awm mo?,” napi.
8 Aw kai i khumichi awi, jei u moh!
Kai ly jangni jangkhawn i dengdai vai khrairei,
tym ai nai atitichi ai thai hai yb nai ly nangchi pany u nai ne.
Nangchi ly kai i pany hai nai keungchi lawm u bo.
Kai ny y baly tameuh takhra awm rai a?
Mana khala py kai thai vai y nai sa thai nai keung tameuh awm rai a?
Myn chiu nai ai panui hai nai
9 Myn sa nai keung bawibawichi ly vang teng y nai khumichi ne iy, nichi i tahm khai nai tameuhchi py ati sai py ny y. Huni tameuhchi ai chiu nai khumichi ly mei paju naichi, tau cheng naira by y nai khumichi ne. Nichi ly kangji nga u ai.
10 Tameuh palawn iy chiu ai nai molam y myn sa nai ly kamran by y!
11 Huni myn ai chiu nai ngiereichi ly cheh naira avum ai. Mynchi sa nai keungchi ly khumichi teu. Nichi ly kai i mo y jeu iy cham naira avum u sy. Nichi ly jei hyn naimy kangji nga u ai.
12 Tamo thip nai keung ly tamo la iy, mai y paawp; naibaly my i ham parai nai kiu pheu iy, chaki hawi tamo ai my i kangai thip nai ne. Ni ly kalop sa akawm iy kajeu alam, tui ahai nai khumi ne.
13 Myn oh nai keung ly pjeng pata chum baly, chakaleaung hawi myn jyn iy mymy i ateaung alangchi hawi palum bo. Ni ly chiu nai meingtymra y khai ai nai khumi myn harei sa nai ne.
14 Ni ly mymy teaung ai nai saitleang keung paliu bo. Daichi theung i taru keung, ti y baly maicha keung vawi nai ne. Huna ny y lawh baly ngopraibiu keung ui iy keung cheang pa-rei kanitui ajeng bo.
15 Khumi ly dengkeaung keung phyreichi ai theng palawn iy, phyrei ai ly myn sa ai nai teaung bo. Dengkeaung phyreichi ai mai a-awm ai nai hawi, tako paawp ai nai mai paeng iy, takhra phyreichi ai ly tameuh myn sa iy chiu nai ne.
16 Ni ly dengkeaung phyrei hawi mai paeng chum baly, mawi dang iy cha nai ne. Ni ly mai a-awm nai tarawi y, “Vai, kai ly bi-um na bo. Hini mai ly khri pa-rei paleung ka-no hawi parai na ly!” nanai thui bo.
17 Huni bo y ni ly takhra dengkeaung kamlai hawi myn harei sa i, lu meung naimy huni myn teng y, “Nang ly kai i tameuh ne; kai ai atleu kyh ba!” nanai chiu sa nai ne.
18 Hina nai khumichi ly khri pa-rei akhum nai deaungkho y, mychi ly ati sa nai mo, nanai py apany u y. Kateng niu y, pany y ai nai, mychi i mei hawi paleung katheuchi kho u typ veng bo.
19 “Kai ly dengkeaung phyrei ai mai y tei veng bo. Mai-aichi salo y tako paawp iy mawi dang i cha bo. Dengkeaung kamlai hawi myn harei sa. Vai, kai ly huni dengkeaung beang mo y lu meung lawh bo ly!” nanai thui pajau ai nai, myn oh pangie nai keung ly pany thai naira, cheng naira by y.
20 Ni i sa nai ly maidym cha nai kamta, ati sai py ny y. My i akhum nai ka-dawn ly mymy ai lam tamang hai. Hunai deaungkho y ni ai sabawm ai nai avo pajau y bo. Ni ly my i kiu y syn nai myn ly tameuh pipi ny y, nanai pany y.
Sa nai keung hawi atleu nai keung Areng
21 Areng my,
“Israela chengchi awi, hini satangchi pany u jo ba;
nangchi ly kai i miseaung ne, nanai pany u.
Nangchi ai kai i miseaungchi lawm ai nai kaimy sa nai ne.
Hunaibaly kai ly nangchi ai mana khala py tami vui ai ny y.
22 Kai ly nangchi i kamngochi ai khupanym kamta, akheang hai pawn bo.
Kai teng y jeu u ali teang; nangchi ai atleu nai keung ly kai ne.
23 Nangchi kani khusang awi, amo theu naimy aeu u!
Khaileaung thiu parai nairachi awi, aeu u!
Mawichi hawi thengreung theung i dengkeaung keungchi awi, amo theu naimy aeu u!
Areng ly mymy i khumi Israela chengchi ai atleu iy,
mymy i nang parai nai patei pi bo.
24 “Kai ly nangchi ai sa nai keung hawi
atleu pi nai keung Areng ne.
Kai ly ati cheaungkhangchi ai sa nai keung Areng ne.
Kani khusang ai kaimy leaungrei khiu khyh nai ne.
Khaileaung ai kaimy sa nai khala y, ami py kai ai sabawm u y leang.
25 Kai ly leung sarachi ai kamthu lawm hai iy,Ref 44.25: 1 Kor 1.20
ka-si kamhi pany nai keung i thui naichi phra hai bo.
Khumi kachengchi i leu ei vui iy
nichi i cheng naira ly ka-khum teu, nanai pany hai bo.
26 Na i py thui pi yb nai sai sairei ai kai i miseaung my sa nai khala py,
kai i dawn tau naichi pany hai ai nai, amtaw thau leaung leaungrei ai kapato nai khala py,
kai ly dawn pasym naichi hawi thui yb naichi, katym hai khyp nai ne.
Jerusalem mary y khumichi awm u ali teang ai.
Juda marychi sa palum u teang ai, nanai huni mary tleirei y, kaimy thui pi bo.
Huni marychi phra naira i nai, lo-pa ali teang ai.
27 Kai ly leu pei iy suida pangli ai py tui kang hai bo.
28 Kai ly Kuru samrang ai py,
‘Nang ly kai i jeng y peang ai nai keung ne.Ref 44:28: 2 Neng 36:23; Ezra 1:2
Nang ly kai i sa ai tau naichi sa ai nai tla,
Jerusalem mary palum teang ai nai hawi
Achura yhm langdengchi leng ai nai tla, nanai leu kang pei,” napi.