36
Jerusalem mary ai Asuria chengchi my pajei nai
(2 Areng 18:13-27; 2 Neng 32:1-19)
1 Juda samrang Hezekia my peang nai saneng holai palyhrei saneng y, Asuria empara samrang Senakheri ly Juda pri y awm nai amtangra marychi ai tiu vui nai ne.
2 Naibaly samrang Senakheri ly my i tavailu areng ai Lakhisa mary i tavaimi kanghuchi hawi Jerusalem mary y chei iy, samrang Hezekia teng y apasum ai nai thui hai bo. Tavailu areng py tleng tuikan dengdairei leaung kathiu nai tuilam sahawi, kanih aneng nai khumichi i kalop sa nai meingtym lam py peang vui bo.
3 Huna nai khala y Juda pri i khumi leaung thomreichi ly ni hawi ka-vum sa. Nichi ly Hilikia i chapo samrang yhm miteaung keh Elijakim, samrang yhm secretary Shebana hawi Asaph i chapo recordchi kry nai Joahchi ne.
4 Asuria tavailu areng my nichi teng y, “Samrang Hezekia ly ati mana nai amymy ai hina tanrei a-ym na mo, nanai empara samrang my pany ai nai ngai.
5 Tavai atho ai leu haiho hawi pajau ai, nanai nangchi athang khai u a? Kai ai tiu ai nai nangchi ai ami my sabawm ai nai thang khai u mo?
6 Nangchi ly Aikupta pri i kasabawmra ajeng u bo. Na i py huni pri ai paleung pado nai ly tleu iy kiu y viu reng nai japang uipo ai cheaungvawi palawn nai atawm. Aikupta samrang ly mychi ai paleung pado nai neng khala, japang uipo hawi naini atawm nai ne,” napi. Ref 36:6: Ezek 29:6-7
7 Naibaly Asuria tavailu areng my thui bi nai ly “Nangchi my, ‘Kaichi ly kaimychi i Areng Tameuh ai paleung pado,’ nanai kai teng y thui u ai a? Hezekia ly Areng ai chiu ai nai meingtymchi hawi maichamchi taphra iy, Juda khumichi hawi Jerusalem mary i khumichi ai, Jerusalem mary y awm nai maichamra y naini chiu u ai nai leu pei nai ne.
8 Kai ly empara samrang i amyn y tau iy, nangchi hawi kamjau kamteang a-awi ai. Nangchi ly keaungngo atang nai risa leaung sang nyhrei kalym kalawi pajau ai nabaly, nangchi teng y keaungngo sang nyhrei kang pei ai.
9 Nangchi ly sa thai naira theang keh nai Asuria tavailu arengchy ai malawn py, tiu u pajau y leang. Na i py Aikupta chengchi teng i nai tavai ka-ri hawi keaungngo atang nai risa kasabawmrachi kadeaung u lawh.
10 Kai ly Areng teng i kasabawmra abawi y naimy, nangchi i pri ai taphra nai ne, nanai nangchi athang khai u a? Nangchi i pri y tiu ai nai Areng mymy kypkyp my, kai ai pato nai ne.
11 Huna nai khala y Elijakim, Shebana hawi Joahchi ly huni tavailu areng teng y, “Arami cheng leu hawi kaichi ai leu pei ba. Huni leu kaichi ly thai kawp; Hebrai cheng leu hawi thui pi moh. Mary apai salo y awm nai khumichi tangai u bo,” napi.
12 Huni khumi my, empara samrang ly nang hawi nangchi i samrang teng y naini, hini leuchi thui pi ai nai kai ai pato nai ne, nanai athang khai u a? Kai ly mary apai salo y ateh u nai khumichi teng y py thui pi nai ne. Nichi py nangchi kamta amychi i ei cha iy, amychi i sakhawn hang nei u teang ai nai tla ai,” nanai thui pi bi bo.
13 Naibaly ni ly ang thau iy Hebrai cheng leu hawi thui pi nai ly “Nangchi teng y Asuria empara samrang my thui pi nai leu tangai u.
14 Huni samrang my, nangchi ly Hezekia i tapawp naira y tangai u y ai nai, pany hai pi nai ne. Hezekia ly nangchi ai atleu pajau y leang.
15 Areng ai paleung pado ai nai, ni my parawi teu i py, nangchi tangai u moh. Areng ly nangchi ai atleu pi ai nanai py, kaichi Asuria tavaimichi teng y nangchi i mary tiu vui ai nai pei ai ny y nanai py, athang khai u moh.
16-17 Hezekia i leu tangai u moh! Mary theung i nai theu iy apasum ai nai, nangchi ai Asuria empara samrang my leu pei nai awm. Nangchi ai empara samrang ly nangchi i pri hawi atawm nai pri, chohpui chomaw chohnei hawi kreip hang kangtha, meaungkaten hawi kreip akho nawi nai pri mang y tha y rai nai thym khala y, nangmychi i kreip keungchi hawi thaidu keungchira i athaichi cha hai iy, nangmychi i tuikanchira i tui py nei ai nai pei ai.
18 Areng ly kaichi ai atleu pajau, nanai nangchi athang khai u ai nai Hezekia my tapawp nai tangai u moh! Cheng takhrachi i tameuhchi ly nichi i pri ai, Asuria empara samrang kiu i nai atleu pi sai a?
19 Hamath pri hawi Arpa prichi i tameuhchi ly vai, ma y awm mo? Sepharvaim pri i tameuhchi ly vai, ma y awm mo? Mani tameuh my Samari pri ai atleu pi mo?
20 Huni pri bawibawichi i tameuhchi theung y mani tameuh ly my i pri ai kaichi empara samrang kiu i nai, mana khala atleu pi vai mo? Tumbaly Areng py Jerusalem mary ai atleu pajau, nanai nangchi ati mana nai athang khai u mo?,” napi.
21 Huna nai khala y khumichi ly Hezekia my taviu nai kamta, awm u pypy nai ne. Leu sairei py patheung u teang y.
22 Naibaly Elijakim, Shebana hawi Joahchi ly paleung si paleung mawn naimy, mychi i ateaungchi sei iy Asuria tavailu areng i leu ai, samrang teng y chei iy amti pi bo.