26
Tameuh ly mymy i khumichi ai eaung naira pei nai
1 Anui mang i khulym ai Juda pri i khumichi my thui u nai neng kani tym ai.
Nichi my, “Kaichi i mary ly khaw parai!
Atleu pi nai molam y mary apaichi ai ly Tameuh mymy kypkyp my ama hai bo!
2 Mary apai katheuchi paeaung chum baly
kahawi sa nai khumi cheng,
ka-ym awm nai khumi cheng kun ai nai pei u.
3 Aw Areng, nang ly paleung meitang ne i
nang ai ym nai khumichi teng y
tlamsa naira tatang pei pi bo.
4 Areng ai ly ym u jojo;
mymy ly achi ai ama hai jojo ai.
5 Mymy ly paleung len amlyh nai khumichi ai tahm panem vui chum baly,
nichi i awm nai khaw parai nai mary taphra vui iy,
mary apaichi ai speungra y anawi hai ai.
6 Ana naira avum u nai khumichi py, vai ly
huni mary ai kheu hawi chiu iy tako u ai.
7 Aw Areng, nang ly khumi kahawichi i lam taw hai bo;
nichi i tako nai khuleaung lam py, adyh parai nai ne.
8 Kaichi ly nang i ngai nai kamta sa iy, nang ai athang khai naimy awm;
nang ai naini kakadeaung u bo.
9 Vum y kai ly nang ai paleung hawi verei kadeaung bo;
khaileaung hawi khaileaung pri i khumichi ai nang ly tara chih nai khala y,
adyh adawi naira, nanai ly ati mo, nanai nichi pany u ai.
10 Nang ly khumi hawi y naichi ai pahen teu i py,
nichi ly kateng sa ai nai pany u y.
Khumi kahawichi i awm nai hini pri y malawn py, nichi ly hawi y naichi sa u.
Nang i nang parai nai ai py, dawn dang u y nai ne.
11 Paleung ka-echi ly mychi ai nangmy pajeng ai, nanai pany u y.Ref 26:11: Heb 10:27
Aw Areng, nichi ai kangji ngo hai ba. Patang naira tym hai ba.
Nangmy sa pi yb nai pajeng naira avum hai ba.
Nang ly nangmy i khumichi ai mana tanrei tamen mo, nanai nichi ai pany hai ba.
12 Aw Areng, nang ly kaichi ai nang chawn ai nai pei ai.
Kaichi i eaung nai ngiereichi ly
nang i sa pi naichira i hawi naira ne.
13 Kaichi i Areng Tameuh, kaichi ly amichi my ang peang nai avum u ai.
Na i py nang leaungrei naini kaichi i Areng ne.
14 Huni khumichi ly vai i neng y, dei u pawn veng bo; heng u ali bi ai ny y.
Nang ly nichi ai pajeng iy tamyh pawn veng nai deaungkho y,
nichi i phailochi py, tapreaung i nai ang thau u ai ny y.
Nichi ai ami my py pany u y leang bo.
15 Aw Areng, nang ly kaichi i pri lo-pa hai bo; lo-pa hai bo.
Huni i khu ka-peangchi py nidym nisi, tosyh tokalawi kau haira bo.
Hina nai kamta sa nai deaungkho y, nang ly tahm awm nai ne.
16 Aw Areng, nang ly nangmy i khumichi ai pajeng nai deaungkho y,
nichi ly khri pa-rei paleung bi naimy, nang teng y chiu sa u nai ne.
17 Aw Areng, nang ly kaichi ai deaungdi tapen nai
neampachy kamta, no patang naimy aeu hai bo.
18 Kaichi ly no patang naira ka-vum u bo;
na i py ati sai py tym hai y.
Kaichi ly kaimychi pri i vui ati sai py eaung naira ngo u y.
Ati kalop py chawn-pa thai ai nai pa-rei, sa pajau nai by y.
19 Kaichi khumichi theung i dei chum naichi ly heng u ali teang ai!Ref 26:19: Dan 12:2
Nichi i ngan tlangchi ly heng teang ai.
Tapreaung angawm y aseaung nai khumi kadeichi ly
amo theu naimy khulym thui u ai.
Reaung amchang nai kadamchi ly khaileaung y apu hai ali teang nai kamta,
neng kra parai nai khala i dei chum nai khumichi ai, Areng ly heng hai ali teang ai.
Tara chih nai hawi sa palum teang nai
20 Kai i khumichi awi, nangchi ly nangmychi i yhm theung y kun iy, katheuchi akho u. Tameuh i kado theu nai rym nai ryrei, neng tanareichy aheu u daw.
21 Areng ly khaileaung pri i khumichi ai, kamngo pajeng ai nai mymy i awm naira dengdairei ang jeu ai. Khaileaung salo y kangviu y khumi padei nai tamang nairachi ly pheaungrang ai. Tleh naira avum nai khumichi ai khaileaung my ly apha pi vui ai ny y.