22
Jerusalem mary i molam y leu pei nai
1 Hini leu pei nai ly paleung mei y niu nai leaunghawi molam y pei nai leu ne.
Mary i khumi bawibawichi ly ati mana nai y mychi i yhm amphu salo y pawi sa u lawh mo? Ati leaungsai awm lawh mo?
2 Mary verei py khyh tukulu iy khumichi paleung ahyn naimy, aeu nai katyn phui na bo.
Nang i khumichi ly tavai atiu nai tarawi y dei u nai ny y.
3 Thailiho chyn harei py ko y naimy, nang i miteaung keh bawibawichi ly angpreng pawn nai deaungkho y, langheng patiu nai avum u bo.
4 Vai ly kai ai, kaimy tlairei khrikhri pa-rei kavo ai nai pei kyh. Kai i khumi neangneangchi ly dei u pawn lawh bo i, kai ai paleung pahawi ai nai atho so moh jau ba.
5 Hini neng ly paleung mei y niu nai ka-jeira, sum naira hawi ahei phrophra nairachi tym nai neng ne. Ati cheaungkhang sa thai nai keung Areng my py, kaichi ai huni neng avum hai nai ne. Kaichi i mary apaichi ly taphra naira avum veng bo. Kasabawmra ngai nai khumichi i aeu nai raawichi ly mawi aheungchi mang y katyn avah na veng bo.
6 Elam pri i keaungngo atang nai risachi ly thailihochi syn naimy ang jeu u bo. Kira pri i tavaimi risachi my py, khopuichi syn u rym bo.
7 Paitiu khuta hawi nai Juda leaunghawichi ly keaungngo ka-richi kawi mang na iy, keaungngo atang nai risachi ly Jerusalem mary apai katheu pa-khochira y angdo u nai ne.
8 Juda pri i amtangra awm nai ngiereichi ly phra veng bo.
Huna nai khala y nang i khumichi ly tavai ateaung khaira yhm i tavai ateaungchi la u bo.
9-10 Mary apaichi phra nai meingtymchi pathyp ai nai khen u. Mary theung i yhmchi kati iy mary apaichi pathyp ai nai lengseaungchi nga ai nai molam y, yhm phyreichi taphra u bo.
11 Tuikan kangngym dengdairei leaung nai tuichi ai mary theung y kadeng ai nai, tui kadengra harei py sa u bo. Na i py nichi ly huni kalop ai jangni khala my pasym pi yb nai keung, hina nai tym hai nai keung Tameuh ai ly tahm khai u y.
12 Huni thym khala y ati cheaungkhang sa thai nai keung Areng ly nang ai vo hai iy, paleung si nai ka-ma-ra patei ai nai hawi, lu vau tabiuliu iy paisiu amchiu ai nai thui pi yb nai ne.
13 Nang ly huna nai sa ai nai jeng y, pawi sa lawh nai ne. Si, beramchi tleh, cha iy kreip hang nei bo. “Khawndam dei u ai bo i, vai ly achi cho nei u sina,” nanai nang ly thui nai ne.Ref 22:13: 1 Kor 15:32
14 Ati cheaungkhang sa thai nai keung Areng mymy kypkyp my kai teng y, “Huni khumichi ly hini hawi y naira molam y heng nai sala ryrei, mana khala py kamngo lawi naira nga u ai ny y. Hini ly ati cheaungkhang sa thai nai keung kai, Areng my thui pi nai leu ne,” napi.
Sebana ai pany hai nai
15 Ati cheaungkhang sa thai nai keung Areng ly kai ai samrang yhm kalop pacheang nai keung Sebana i yhm y chei iy ni teng y,
16 “Nang ly nangmy ai ati palawn mo? Lengseaung mawi para ra y nangmychi i vui tapreaung tapiu thiu ai nai, sa thai naira nang teng y awm a?
17 Nang ly aly len nai khumi leaungrei ne py ne lym ai. Na i py Areng ly nang ai syn iy patheu vui ai.
18 Mymy ly nang ai lijai alyn kamta kalym vui iy, khri pa-rei kau parai nai pri mang y aphi vui ai. Nang ly huni pri y nangmy ai tahm apasang nai tavai ka-ri sahawi y dei ai. Nang ly nangmy yhmkeung i yhm y tahm anem hai ai.
19 Areng ly nang ai kalop patheu iy, kalop kalenra i nai pala vui ai,” nanai thui hai nai ne.
20 Areng ly Sebana teng y, “Kai ly kaimy i miseaung Hilkia i chapo Eliakim ai palau iy,
21 nangmy i kalop hawi ka-pu ateaung nai ateaung ly ni ai ateaung hai iy, nang i khobai akawm hai. Nang i nga nai sa thai naira ngiereichi ni teng y au ai. Huni khumi ly Jerusalem mary i khumichi hawi Juda pri khumichi i vui, ampo kamta lawm ai.
22 Kai ly ni ai Davida i katu chanau lawm nai keung, samrang i kalop sa ai nai sa thai naira au bebe ai. Ni ly kalop sa naira y aly len nai ne i, ni i sa nai kalopchi ai ami py sa palai vui thai ai ny y. Ref 22:22: Amt 3:7
23 Kai ly amchyh lei y na pa-rei tahen thleng nai khangmui kamta, ni ai khaw pa-rei khai ai. Ni py my i yhm dengtheung bawibawichi i vui y tahm awm hai ai.
24 “Na i py amjo amnauchi hawi, ni teng y abyh anghawi naichi ly ni i vui y myn kaji lawm ai. Khangmuira y bang nai laawm sorachi kamta, nichi ly ni teng y anghawi u ai.
25 Hina nai tym nai khala y amchyh lei y na pa-rei tahen nai khangmui ly ahyn lengkau iy, atlym vui ai. Hunira y bang nai ngiereichi py phra pawn ai,” nanai Areng my leu pei nai ne.