21
Babulon mary anawi nai paleung mei y niu nai
1 Hini leu pei nai ly Babulon mary i vui ne.
Khutaha daichi ka-ym theung y aho prei nai ali tengkaleng kamta, ka-jeira ly jei hawi parai nai pri mang dengdairei ang tym ai.
2 Ana piupa nairachi, vaineng takan nai hawi taphra nairachi ai paleung mei y kaniu bo.
Aw Elam tavaimichi awi, tiu u! Aw Media tavaimichi awi, marychi ai katanmeuh u! Tameuh ly Babulon mary i khumichi my pei nai ngari kamtang anawn hai ai.
3 Paleung mei y niu nai, thai naichi deaungkho y kai ly deaungdi tapen nai neampachy kamta athengra iy, patang naira avum nai ne.
4 Kai i lu ly ami kalaka naimy, kai ly jei nai paleung kaso theu na bo. Kai ly dym tengsa kadeaung nai ne. Na i py huni neng ly kai ai athengra hai nai ny y baly, ati sai py so y nai ne.
5 Paleung mei y dym biu cha nai pawi pui harei sawn yb nai kaniu nai ne. Angvynchi ateh ai nai sampraibyh bai yb bo. Nichi ly cha nei u nai thym khala y, “Tavai luchi awi! Nangchi i khupui angvei u rym!,” nanai leu pei nai vaimy tym ryp bo.
6 Huni bo y Areng my kai teng y, “Nang chei ly tamcheaung leaungrei ai khai chum baly, ni i niu naichi amti pi teang ai nai thui pi ba.
7 Leaungnyh ka-bom, leaungnyh ka-bom keaungngo atang nai risachi ang jeu nai py, keaungngo kano kasauchi, kula-iuchi atang nai khumichi ang jeu u nai py niu lawh baly, huni khumichi ai khen patawm ai nai tamcheaung teng y taviu kheng ba,” nanai leu pei bo.
8 Tamcheaung my, “Areng, kai ly hini angdeangra salo y angdo iy, vum kanithun tamcheaung ang mo nai ne,” nanai aeu iy thui pi nai khala y,
9 keaungngo atang nai risachi ly leaungnyh ka-bom, leaungnyh ka-bom vaimy theu u bo. Hunaibaly tamcheaung my, “Babulon mary anawi veng bo. Nichi i chiu nai myn ngiereichi py, khaileaung y tleu piupa veng bo,” nanai satang thai hai nai ne.Ref 21:9: Amt 14:8, 18:2
10 Kai i khumichi awi, nangchi ly chohvui kamta ati piupa nai avum u bo. Na i py kai ly Israela chengchi i Tameuh, ati cheaungkhang sa thai nai keung Areng teng i dengdairei thai nai satang ai, vai nangchi teng y kang thai hai pi bo.
Edom pri khumichi teng y leu pei nai
11 Hini leu pei nai ly Edom pri i vui ne.
Edom pri i khumi leaungrei my kai teng y, “Aw tamcheaung awi, dym tengsa kheih ai nai mana tanrei kra ai mo, mana khala y tem ai mo, nanai kai ai thui pi ba,” nanai aeu naimy deng bo.
12 Kaimy py, “Khutawi mo tym ai bo. Na i py dym tengsa tym ali teang ai. Nang deng bi ai nai ngai lawh baly, jeu bi iy deng ba,” nanai pathang pi.
Arabia pri molam y leu pei nai
13 Hini leu pei nai ly Arabia pri i vui ne.
Dengkeaung keung prau y nai Arabia khu ka-peangra y, cha nei vawnchi tang nai ka-richi anawn reng nai, nangchi Dedan chengchi awi,
14 nangchi teng y ang jeu u nai, tui ahai nai khumichi ai tui pei u. Nangchi Tema khumichi awi, tavai kapreangchi ai teicha teinei pei pi u.
15 Khumichi ly mychi ai tleh ai nai haisau tamochira i nai py, ko ai angveirym nai thailihochi teng i nai py, tavai takai ngiereichira i nai py, tleaung ai nai preang u nai ne.
16 Huni bo y Areng my kai teng y, “Sanengrei awm nai bo khala y Keda cheng theaungchi i phum-ang ly tama pyn vui ai.
17 Huni cheng theaungchi theung y sorai paleung awm keh nai thailiho pa naichi py, maidenreichy awm khyh ai. Hini ly Israela chengchi i Tameuh kai, Areng my thui pi nai leu ne,” napi.