2
1 Naibaly huna nai kamta khusangdeaungdu ai palum nai ly cheang angym bo.
2 Tameuh mymy i atitichi sa nai ly cheang angym bo i, saryh kani y anawn nai ne.Ref 2:2 Heb 4:4, 10
3 Mymy ly saryh kani y amtheaung hai iy khai takhra bo; ati mana nai mo nabaly mymy ly kalop sa angym veng nai deaungkho y anawn nai ne.Ref 2:2-3 Theu 20:11
4 Naibaly huna nai kamta khusangdeaungdu ai sa nai ne.
Eden Akho
Areng note 2:4\xk Areng: Hebrai leu y Jehovah, napi. \x* Tameuh my khusangdeaungdu ai sa nai khala ly
5 khaileaung salo y kani nai hai y rai nai deaungkho y keung prau nai py, hm amdi nai py by y; khaileaung y amti amjang pati nai khumi py by y leang rai;
6 na i py khaileaung theung mang tui theu hai iy am-i hai bo.
7 Naibaly Areng Tameuh ly khaileaung salo i khaileaung phyrei la iy khumi myn sa; notareang mang hengra kangho hm pi i, khumi ly heng amteaung bo.Ref 2:7 1 Kor 15:45
8 Naibaly Areng Tameuh my nisi mang i Eden meingtymra y akho sa i, hu y mymy i sa nai khumi ai khai.
9 Mymy ly khen apu parai nai dengkeaung keungchi hawi cha kahawi thengthai keung cheaungkhang py prau hai bo. Akho um pareaung y ly hengra pei nai dengkeaung keung, hawi nai hawi y nai pany thai nai dengkeaung keung prau hai.Ref 2:9 Amtaw 2:7, 22:2, 14
10 Tavo harei ly Eden akho theung y tui leaung hai; Eden akho palem mang y leaung nai khala ly tavo palyhrei amprei hai bo.
11 Angchei i tavo ly Pishon napi i, Havila pri verei y leaung prei.
12 (Huni tavora y muku hawi keh nai hawi rimui py, lengseaung vang katengchi py theu.)
13 Pa-nyh i tavo ly kihon napi i, huni tavo ly kusha pri verei y leaung prei nai ne.
14 Pa-thom i tavo ly Tikri napi i, Asuria pri nisi mang y leaung nai ne. Palyh i tavo ly Euphrat napi.
15 Naibaly Areng Tameuh my khumi ai ly Eden akho kry ai nai hawi kalop sa ai nai hu y khai bo.
16 Areng Tameuh my, “Nang ly akho theung i thengthai athai cheaungkhang cha pajau mang;
17 hawi nai hawi y nai pany thai nai thengthai athai ly nang cha ai nai avo y; nang cha lawh baly, cha nai kani y my dei takengkei ai,” napi.
18 Naibaly Areng Tameuh my, “Khumi neampacho mymy tlairei awm khyh nai ly hawi y leang: kaimy mymy ai sabawm ai nai amlau nai ahawi leaungrei sa pi ai,” napi.
19 Areng Tameuh my khaileaung phyrei la iy tavo cheaungkhang hawi amso mawi cheaungkhang ai py sa. Naibaly Tameuh my nichi ai amyn pathi ai nai khumi teng y pahawi achu; naibaly khumi my amyn pathi i amyn lo u bawibawi.
20 Hunai kamta amso mawi cheaungkhang hawi tavo cheaungkhangchi ai amyn pathi pi; na i py mymy ai sabawm ai nai amlau nai ahawi by y leang rai.
21 Naibaly Areng Tameuh ly khumi ai i hai jyhp iy, i nai thym khala y khumi teng i pana hiu harei la i, huni ai ly ngan bawn hai bo.
22 Areng Tameuh my pana hiu hawi sa nai khumi neampachy ai ly neampacho teng y hawi.
23 Naibaly khumi my,
“Hini khumi ly kai i hiu theung i hiu, kai i ngan bawi theung i ngan bawi kypkyp ne;
khumi neampachora i theu nai ne i,
khumi neampachy ne sy,” nanai amyn pei nai ne.
24 Hunai deaungkho y neampacho ly amhm ampo ai khai su iy, aju hawi apom i, nini ly ngan bomrei lawm bo.Ref 2:24 Mt 19:5, Mk 10:7-8, 1Kor 6:16, Eph 5:31
25 Khumi neampacho hawi khumi neampachy nini ly tlang ka-keu awm teu i py kangji apany hawi y.