ATITI AWM ANGCHEI NAI
Ati ti awm angchei nai cha-iu theung y khaileaung pri amteaung angchei nai leaungsaichi thui pi nai ne. Hini cha-iu theung y khusangdeaungdu ai palum nai sai, khumi angso ai palum angchei nai sai, Tameuh ly khumichi hawi amtawn nai sai, nanai satangchi abawi nai ne. Atiti awm angchei nai cha-iu ai ly phy nyhrei patleh pi bo: (1) Pakeung 1-11. Khaileaung palum nai hawi khumi angso chawn angchei nai satang ne. Hini pakeungchira y ly Adam hawi Evi, Ka-ina hawi Abela, Nova hawi tuibai tuitleng theu nai, Babulon yhm ka-sang satangchi ne. (2) Pakeung 12-50. Israela chengchi i amsi sangumchi satang abawi. Angchei i amsi sangum ly Tameuh ai ym nai hawi, mymy i leu tangai naira y chehra by y nanai Abraham ne. Naibaly chapo Isaka, katu Jakob (Israela napi nai) satang, Israela cheng holai nyhrei i ampochi napi nai Jakob i chapo leaung holai nyhreichi i satang, Jakob i chapochi theung i Josepha i satang py, Jakob hawi chapochi i yhm dengtheungchi Aikupta pri y awm nai satang py tabawi patyp bo.
Hini cha-iu theung y khumi i satang thui pi naira y pany hai patyp ai ngai nai ly Tameuh i palum nai leaungsaichi ne. Tameuh my ly khusangdeaungdu ai palum angchi khyp, nanai amteaung iy, mymy ly mymy i khumichi ai kry jojo ai, nanai leu adeu nai hawi patem bo. Cha-iu verei y Tameuh i sa nai saichi pany hai patyp iy, Tameuh ly sa tamang nai khumichi ai tara chih iy pajeng nai sai satang, mymy i khumichi ai pahawi iy nichi ai kahawi palum pi nai satangchi ne. Khumi cheng harei i ym nai sai hawi, huni ym naira khaw hai jo ai nai sabawmra lawm nai py, hini angchei i cha-iu theung y tajiu pi nai ne.
1
Palum angchei nai satang
1 Tameuh my angchei y khusangdeaungdunote 1:1 khusangdeaungdu; ti y baly Temra by y na pa-rei kau nai sai ne. ai sa nai khala,
2 khaileaung ly mo-cha amny y, keuru pui teu. Ati cheaungkhangchi ai um nai suida pangli tui kamsau ai ly kaveng my khiu cheng na. Tameuh i Phailonote 1:2 Tameuh i Phailo; ti y baly Tameuh i sa thai naira; ti y baly Tameuh teng i ali; ti y baly ho parai nai ali. * ly tuisang salo y aho.
3 Tameuh my, “Kangvang awm sy,” napi i kangvang awm bo.Ref 1:3 2 Kor 4:6
4 Tameuh my kangvang ly hawi nai niu i amo theu. Naibaly mymy ly kaveng hawi kangvang ai taprei bo.
5 Mymy ly kangvang ai, “Kani thun,” kaveng ai ly “Vum,” nanai pathi. Dym awm nai bo y, khawn py awm teang; huni ly angchei i kani ne.
6-7 Hunaibaly Tameuh my, “Tui ly phy nyhrei amprei ai nai kani khusang awm sy,” napi i awm bo. Tameuh my kani khusang awm chum baly kani khusangra awm nai tui hawi, anui y awm nai tui ai patleh takhra bo.Ref 1:6-8 2 Pet 3:5
8 Tameuh my khusang ka-hi ai ly “Kani” pathi. Dym awm nai bo y, khawn py awm teang; huni ly pa-nyh kani ne.
9 Naibaly Tameuh my, Kani anui y kacheng amteng ai nai tui ly meingtymrei y akachu sy, nanai leu pei i awm ryp bo.
10 Tameuh my kacheng ai ly “Khaileaung” pathi iy, tui awm achu nai ai ly “Pangli” pathi bo. Naibaly Tameuh ly hawi nai niu i amo theu.
11 Naibaly Tameuh my, “Amti amjang hawi thengthai keung cheaungkhang khaileaung i nai prau sy,” nanai leu pei i hunai kamta prau ryp bo.
12 Huna nai deaungkho y khaileaung y cheaungkhangchi prau i, Tameuh ly hawi nai niu i amo theu.
13 Dym awm nai bo y, khawn py awm teang; huni ly pa-thom kani ne.
14 Naibaly Tameuh my, “Vum hawi kani thun taprei ai nai kanichi, sanengchi, reita pawichi note 1:14 reita pawi; ti y baly neng katyh. * khai takhra ai nai kani khusangra kangvangchi awm sy;
15 khaileaung salo y kangvang ko ai nai kani khusang mang y angvang nai awm sy,” napi i, hunai kamta awm ryp bo.
16 Hunaibaly Tameuh my kangvang len parai nai nyhrei sa i, kanito ly kani thun y peang ai nai hawi, lo ly vum y peang ai nai py sa, mymy ly ka-sichi ai py sa teang.
17 Mymy ly khaileaung salo y angvang hai ai nai ly
18 kani thun hawi vum y peang iy kangvang hawi kaveng taprei ai nai kani khusang mang y kangvangchi khai pi; naibaly Tameuh ly hawi nai niu i amo theu.
19 Naibaly dym awm nai bo y khawn py awm teang; huni ly palyh kani ne.
20 Naibaly Tameuh my, “Tui theung y heng nai amjy cheaungkhangchi kawi sy, ali theung y akheang nai tavochi py awm sy,” napi i, awm ryp bo.
21 Hunaibaly Tameuh ly pangli theung y heng nai amjy cheaungkhang napi nai tui theung i mana mawichi hawi, tavo cheaungkhangchi sa. Tameuh ly hunichi ai hawi nai nui i amo theu.
22 Mymy ly tui theung y awm nai py, tavochi py pangli kawi na pa-rei peung sy, nanai amtheaung hai bo.
23 Naibaly dym awm nai bo y, khawn py awm teang; huni ly pa-ngo kani ne.
24 Naibaly Tameuh my, “Khaileaung ly daichi mawi katheang kalen hawi tawnbawi cheaungkhang peung sy,” nanai leu pei i, hunaibaly peung ryp bo.
25 Naibaly Tameuh my huni bawibawichi sa nai bo y hawi nai niu i amo theu.
26 Naibaly Tameuh my, “Achi ly amychi ka-tawm khumi ai so u sina; nichi ly achi atawm ai i, ngochi ai py, tavochi ai py, khawn nai hawi khawn y nai mawi cheaungkhangchi peang ai,” napi.Ref 1:26 1 Kor 11:7
27 Hunaibaly Tameuh ly mymy ka-tawm khyp naimy khumi neampacho hawi neampachy ai sa nai ne.Ref 1:27 Mt. 19:4, Mk 10:6
28 Nini ai amtheaung hai i, “Cho chanau neangneang so, nangni i kangpreangchi ly khaileaung pri verei y peung u sy; khaileaung pri py peang u. Nangchi i anui y awm ai nai daichi mawichi, tavochi hawi ngochi ai peang u,” napi.Ref 1:27-28 AA 5:1-2
29 Kaimy nangni cha ai nai amti amjangchi hawi thengthai cheaungkhangchi py, kang khai pi bo.
30 Na i py daichi mawichi hawi tavochi i vui cha ai nai achachi hawi lymlo kangphochi py kaimy khai pi, napi i awm ryp bo.
31 Tameuh my mymy i sa nai cheaungkhangchi ai khen i, khri pa-rei amo theu. Hunaibaly dym awm nai bo y, khawn py awm teang; huni ly tariu kani ne.