18
Abraham ai chapo pei ai nai leu adeu nai
1 Areng ly Mamre thengreungchira Abraham teng y amteng. Kani bi ala nai neng y Abraham ly mymy i kanih yhm pa-khora y ateh nai thym khala,
2 mymy ly angdeang i khumi leaung thomrei angdo nai niu. Nichi ai niu nai khala mymy ly avum ai nai chei praw i, khaileaung y meimai abi na pa-rei lu meung iy;Ref 18:2 Heb 13:2
3 Abraham my, “Arengchi awi, anawn y naimy kai i yhm katlen u vui moh; kai ly nangchi ai pacho panei ai nai ngai.
4 Nangchi kheu asi ai nai tui lo rai si; hini dengkeaung ka-khui y ateh u ly anawn u rai ba.
5 Teicha teinei maidenreichy lo de rai si, huna khala naini nangchi atho awm ai. Nangchi kai i yhm y jeu u nai ly kai ai tahm khai nai bo. Huna nai deaungkho y nangchi ai pacho kyh si,” napi.
Nichi my, “Nang i thui nai kamta ne sy,” nanai pathang u.
6 Abraham ly kanih yhm mang y chei kaliki iy, aju Sarah teng y, “Takodei kanem hawi keh nai lo kaliki ly tako paawp,” napi.
7 Naibaly mymy ly tawnbawi kanghu theung y chei i, sicho veung hawi nai harei la iy i miseaung teng y theaung kaliki ai nai au bo.
8 Naibaly mymy ly sikanu hawi si mawi py nichi mo y sawn pi. Mymy kypkyp my nichi ai dengkeaung ka-khuira y pacho i, nichi ly cha u bo.
9 Naibaly nichi my, “Nang i aju Sarah ly ma y mo?” nanai deng.
Abraham my, “Mymy ly kanih yhm theung y awm,” nanai pathang.
10 Nichi theung i leaungrei my, “Vai i dengdairei lo takawreinote 18:10 vai i dengdai lo takawrei: ti y baly amlo hini neng y, nanai sai ne. *nai khala y, kai kang tym teang ai; huni neng khala nang i aju Sarah ly chapo tapen ai,” napi.
Huni neng khala Sarah ly mymy i nithun y, kanih yhm katheu pa-kho mang tangai nai ne.Ref 18:10 Rom 9:9
11 Abraham hawi Sarah ly khri pa-rei saneng len bo i, Sarah ly tlangchai py tyhp veng bo.
12 Hunai deaungkho y Sarah ly “Kai ly miteaung kacheang nai bo y, i ahawi ai nai mana paleung ano ai jau mo? Naibaly kai i juvo py miteaung cheang bo, nanai paleung theung y dawn naimy panui um nai ne.Ref 18:12 1Pet 3:6
13 Naibaly Areng my Abraham teng y, “Ati mana nai y Sarah ly ‘Kai ly miteaung kacheang veng jau iy deaungdi nga pajau ai a’ nanai panui lawh mo?.
14 Areng so pajau y nai awm a? Kaimy kang thui pi nai kamta vai i dengdairei lo takawrei khala y kai kang tym teang ai i, Sarah ly chapo tapen ai,” napi.Ref 18:14 Lk 1:37
15 Sarah ly jei nai deaungkho y, “Kai panui y leang,” nanai akhi bo.
Mymy ly “Ne, nang ly panui khyp bo,” napi.
Abraham my Sodom mary i vui takeng pi nai
16 Naibaly nichi ly Sodom mary niu pajau ai nai mang y theu u; Abraham py nichi ai tha nai abang teang.
17 Naibaly Areng ly mymy ai mymy naimy, “Kai sa ai naichi ly Abraham teng y pany hai y nai ly avo y.
18 Mymy i kangpreangchi ly cheng kalen hawi sa thai naira awm nai khumi cheng lawm ai; ni deaungkho y cheng cheaungkhangchi ai kaimy amtheaung hai ai.
19 Kai i leu tangai iy, atiti kahawi sa ai nai mymy i kangpreangchi hawi, mymy i chapochi ai leu pei ai nai molam y, kai ly mymy ai vawi takhra nai ne. Nichi kahawi sa baly kaimy i leu adeu nai kamta khyp, ni i vui ati cheaungkhangchi sa pi ai,” napi.
20 Naibaly Areng my Abraham teng y, “Sodom hawi Komorachi i thui tamawn nai ly khri pa-rei ty na; huni marychi i kamngo nai sai py khri pa-rei len na bo.
21 Kai i thai nai thui tamawn naichi ly teng khyp mo, teng khyp y mo, nanai pany ai nai chei kathiu ai,” napi.
22 Nichi theung i leaung nyhrei ly theu hawi i Sodom mary mang y tako hawi jo bo; na i py Areng ly Abraham hawi vanrei awm jo.
23 Abraham ly Areng sahawi y athui i, “Nang ly khumi kamngochi hawi vanrei khumi kahawichi ai py meitang khyp taphra ai bo a?
24 Huni mary theung y khumi kahawi leaung vuipangrei awm lawh i py mary verei taphra ai bo a? Khumi leaung vui pangreichi ai atleu ai nai dawn pi y ai bo a?
25 Nang ly khumi kahawichi ai khumi hawi y naichi hawi vanrei padei rau ai ny y leang. Huna nai ly avo y leang! Nang ly sa ai ny y. Nang huna nai kamta sa lawh baly khumi kahawichi py, khumi hawi y naichi hawi vanrei pajeng naira avum u ai; huna nai ly avo y leang. Khaileaung pri verei ai tara chih nai keung ly meitang naimy tara chih pi ai teu” napi.
26 Areng my Sodom mary theung y khumi kahawichi leaung vui pangrei awm lawh baly, mychi i saho y mary verei kapahen ai,” napi.
27 Abraham my, “Areng, nang teng y vam parai naimy kang takeng veangveang nai ly kai ai pahen kyh. Kai ly khumi teu i, takeng ai nai py ataing y leang.
28 Khumi kahawi leaung vuipangrei theung y, leaung vui palyh pa-ngo pangrei awm khyh baly, leaung pangrei ngai vui nai deaungkho y mary verei ai nang taphra ai a?” napi.
Areng my, “Khumi kahawi leaung vui palyh pa-ngo pangrei awm khyh teu i py kataphra y leang,” napi.
29 Abraham my khumi kahawi leaung vui palyhrei awm khyh lawh baly,” napi.
Nimy ly “Khumi leaung vui palyhrei awm khyh teu i py kataphra y leang,” napi.
30 Abraham my, “Aw Areng, pahen parai naimy kado theu moh kyh ba; kai kang takeng bi ai nai ngai. Hu y khumi kahawi leaung phairei awm khyh lawh baly mana sa ai mo?” napi.
Nimy, “Khumi kahawi leaung phairei awm khyh i py taphra y leang mang,” napi.
31 Abraham my, “Aw Areng, nang teng y vam parai naimy takeng nai ly kai ai pahen kyh ba. Khumi kahawi leaung apomrei awm khyh lawh baly taphra ai a?” napi.
Nimy, “Khumi kahawi leaung apomrei awm khyh teu i py taphra y leang,” napi.
32 Abraham my, “Aw Areng, pahen kyh, kado theu moh kyh ba; hini tlenrei kang takeng bi ai. Khumi kahawi leaung horei awm khyh lawh baly taphra ai a?” napi.
Nimy, “Leaung horei awm lawh baly taphra y leang mang,” napi.
33 Abraham hawi leu arum pajau bo nabaly Areng ly tako pi veng bo; Abraham py mymy i yhm mang y vawi ali teang nai ne.