2
Dei naira i nai heng naira mang y
1 Nangchi py nangchi i taphra nai hawi kamngo nai deaungkho y dei u nai thym khala i nai ly nangchi ai ang paheng bo;Ref 2.1–5: Kol 2.13
2 hunira y ly nangchi ly jangni y hini khaileaung pri i reita kamta tako u nai ly, ali y aly peang nai areng, vai ym y nai chanauchi theung y sa dudu nai phailo i reita kamta.
3 Huni ym y nai chanauchi theung y ly kaichi py jangni y ly tlang hawi paleung i kangai sa iy, kaichi i tlang i ngai phi teng y naira y ly awm bebe veng; kaichi ly khumi takhrachi kamta khyp my kado theu nai chanau y tapen angchi yb veng nai chy bo;
4 na i py Tameuh ly pahen naira neangneang awm i, mymy i tamen nai len parai nai i saho y achi ai ang tamen nai deaungkho y,
5 achi my taphra naira y dei nai thym khala i nai py, Krista hawi vanrei ang paheng teang (pahenra y nangchi ai paheng nai bo),
6 naibaly mymy hawi vanrei ang pathau teang iy, Isu Krista y ly kani pri y mymy teng y ateh hai bo.
7 Hunaibaly mymy ly neng tym ai naira y ly Krista Isu y achi i tlang tleaung y neaung hawi nai deaungkho y, mymy i pahenra khri pa-rei nawi nai sai ly patei pajau ai.
8 Ati mana nai mo nabaly nangchi ym nai deaungkho y pahenra y hengra nga u veng bo; huni py nangmychi teng i theu nai ny y leang, Tameuh i jawm pei nai teu;
9 atiti sa nai deaungkho y ny y leang, ti y baly ami my am-e lawh na.
10 Achi ly mymy i kiu i theu nai ne i, achi ai atiti kahawi sa ai nai vui Krista Isu y ly sa nai ne, huni atiti sa naira y achi i tako ai nai Tameuh my sa rym nai ne. nai
Krista y bomrei lawn
11 Hunai deaungkho y jangni y nangchi, tlang y Cheng Takhra awm nai, tlang mang y kiu y sa nai “Lengkhym Takip” napi naichi my ly nangchi ai “Lengkhym Takip y” nanai napi naichi awi;
12 hunai thym khala y nangchi ly Krista ai pany y nai, Israela kamkawm hawi akhawi takhra nai, khaileaung pri y athang khai naira pipi by y nai hawi, Tameuh ny y naimy awm u iy, adeu nai leu maikawmra y angvyn y awm u nai ly pany u jojo.
13 Na i py vai ly nangchi, jangni y palo parai naira y awm naichi ly Krista i thi y ang kasa hai bo.
14 Mymy ly achi i aly naira ne, naibaly mymy y kamkawm nyhrei nai ai ly khumi kangtha bomrei sa iy aly naira sa thai ai nai,
15 ado y nai atiti sa naichi leu pei nai reita awm nai ly mymy i tlang y tamen hai iy, kamkawm nyhrei nai ai ly bomrei sa, naibaly nichi sala i patle nai ampang ly anawi hai bo.Ref 2.15: Kol 2.14
16 Naibaly kraws i saho y ly ado y naira ai padei vui nai deaungkho y , huni kraws i saho y tlang bomrei y nyhrei nai ai ly Tameuh hawi aly hai pajau teang ai.Ref 2.16: Kol 1.20
17 Naibaly ang jeu iy, nangchi palo parai naira y awm naichi teng y aly nai satang ang thui pi, kasa parai naira y awm naichi teng y py aly nai satang ang thui pi teang.Ref 2.17: Is 57.19
18 Achi ly mymy i saho y Phailo vanrei y Ampo teng y kun thai ai naira nga mei nai ne.
19 Hunaibaly vai ly nangchi ly angvyn py ni awm nai py ny y leang bo; na i py khumi kachaichi hawi, saleaung vanrei awm iy Tameuh i dengtheungchi lawn u bo;
20 Krista Isu kypkyp ly taki i lengseaung avo keh nai lawn iy, nangchi ai amtaw thau naichi hawi amochi i lengseaung leng nai tleaung y ang sa hai nai ne;
21 mymy y ly lengseaung padyh nai takhra takhra adyh parai pa-rei my acha typ iy, Areng y ly achura yhm kachai lawn dudu bo;
22 nangchi ai py mymy y ly Phailo y Tameuh i awm ai naira padyh u achu nai ne.