EPHESI
AVANGCHI TENG Y PAWLA I
CHA PA NAI
1
1 Pawla, Tameuh i kangai y Krista Isu i amtaw thau nai my ly: Khumi kachai Ephesi avang y awm nai Krista Isu y ka-ym awm naichi teng y ly:Ref 1.1: Ataw 18.19–21, 19.1
2 Tameuh achi Ampo hawi Areng Isu Krista i dengdairei pahenra hawi awmnem naira ly nangchi teng y awm sy.
Krista saho y nga nai phailo amtheaungrachi
3 Achi i Areng Isu Krista i Tameuh hawi Ampo ai ly palo nai awm sy. Ni my kani pri mang y ly Krista y phailo mang i amtheaung naira cheaungkhang y achi ai amtheaung hai bo;
4 hunai kamta achi ly tamen naira y chai nai hawi, cheh ai by y pa-rei my mymy i mo y awm thai ai nai, khaileaung palum y rai kha y achi ai Krista y ang vawi veng bo;
5 hunaibaly mymy i tamen naira nang parai nai sai palo ai nai, mymy i kangai kawn nai kamta ly Isu Krista i saho y achi ai mymy i vui chanau y ang palawn ai nai ang khai rym chum veng nai bo.
6 Huni pahenra ly Ngai Parai Nai y jawm my ang pei;
7 achi ly mymy y ly mymy i thi deaungkho y atleu naira nga, mymy i pahen nai nang parai nai sai kamta achi i taphra nairachi ang pahen nai bo.Ref 1.7: Kol 1.14
8 Huni pahenra ly mymy i cheng naira hawi ka-vo pany naira bawibawi y ang bawn nai tleaung y bawnra iy,
9 mymy i kangai leu thui nai sai ang pany hai nai ne;
10 hunaibaly mymy ly mymy y tau nai kamta neng angym khyp nai khala y ly kani mang y atiti awm naichi ai hawi,khaileaung tleaung y atiti awm naichi ai py, ati cheaungkhang ai Krista y pahawi achu ai nai ly mymy i ngai nai kamta ne.
11 Ati cheaungkhangra y mymy i kangai tau nai kamta sa nai keung i kangai y ka-vo khai rym nai kamta, kaichi,
12 Krista ai athang khai manme chum naichi ly mymy i nang parai nai sai palo ai naira lawn ai nai, Krista kypkyp y ly kaichi ai mymy i yhmtheaung lawn ai nai ang sa nai ne.
13 Mymy y ly nangchi py leu meitang, nangchi i heng nai Satang Kahawi ly tangai u iy, ym py ym u nai bo y mymy y ly adeu nai Phailo Kachai y ang pajawp hai typ bo.
14 Huni ly Tameuh i nang parai nai sai palo ai nai, mymy i kypkyp ai atleu ai nai, achi i yhmtheaung amtym ai nai pany hai yb nai ne.
Pawla i chiu sa nai
15 Hunai deaungkho y kai py nangchi theung y Areng Isu y ym naira awm nai hawi, khumi kachai bawibawichi ai tamen nai py kapany iy,
16 achi i Areng Isu Krista i Tameuh, nang parai nai Ampo ly,
17 mymy ai pany naira y cheng nai hawi, hawihai pany nai phailo ang pei thai ai nai, kai i chiu sa naira y ly nangchi ai chiu sa hai iy, nangchi i tlang tleaung y kawn nai leu thui nai ly ka-nawn y leang;
18 hunaibaly nangchi i paleung i mei angvang hai iy, mymy i palau nai athang khai naira hawi, khumi kachaichi y mymy i yhmtheaung amtym nai nang parai naira i nang nai sai hawi ,
19 achi ym nai keungchi mang y mymy i atiti sa thai naira khri pa-rei len nai saichi ly mana atawm mo, nanai nangchi ly pany u pajau thai ai nai,
20 Krista y sa nai mymy i atho ham naira sa nai sai kamta ly, mymy ai kadeichi theung i dengdairei pathau nai thym khala y,Ref 1.20: Sam 110.1
21 mymy ai ly areng naira hawi, aly peang naira hawi, atiti sa thai naira hawi, peang naira bawibawi, hini khaileaung pri y harei khyh ny y naimy, vai pri tym ai naira y py amyn pathi nai cheaungkhangchi i salo kangteng y kani pri y mymy i lamtang mang y ateh hai bo.
22 Naibaly ati cheaungkhang mymy i kheu anui y khai iy palau takhra kamkawm i vui y mymy ai ly ati cheaungkhang bawibawira y lu lawn ai nai ang sa hai bo;Ref 1.22: Sam 8.6Ref 1.22–23: Kol 1.18
23 palau takhra kamkawm ly mymy i tlang ne, ati cheaungkhang kawi hai nai keung i angym naira ly.